Ayera Crisis Team a duna un update den Parlamento riba e situacion actual di Covid-19 na Aruba. Igualmente nan a informa riba e maneho cu a wordo hiba pa atende cu e situacion aki.

E tabata un reunion cu gobierno a pidi pa reacciona riba e criticanan cu nan ta bin hayando for di algun sector di nos comunidad, caminda nan ta wordo cuestiona cu nan no hibando un maneho transparente den henter asunto aki.

Mirando cu Covid ta un virus cu ta ataca salud di hende, un di e ministernan cu sigur a trece informacion riba e maneho cu a wordo hiba, tabata minister di Salubridad Publico, Dangui Oduber.

Bale la pena menciona cu no a falta e aspecto politico cu semper a caracterisa tur reunion den Parlamento. E mandatario a cuestiona cu lamentablemente politica ta wordo hunga door di oposicion. “P’esey bo ta lamenta con oposicion kier hunga politica cu dolor di hendenan cu tin Covid na e momento aki,” el a declara.

Investigacion

Un punto controversial cu e mandatario no a neglisha ta esun di e leakmento di informacion confidencial di pashentnan cu Covid cu a circula den rednan social. El a laga sa cu investigacion a cuminsa pa haya e responsabel di e acto aki, cu el a cualifica di ‘inaceptabel y mal intenciona’.

E no a duna detaye riba con leu e investigacion aki ta bayendo, pero si cu un keho a wordo entrega na Ministerio Publico (OM). E instancia aki ta haciendo su trabao pa medio di un investigacion independiente. Igualmente el a laga sa cu otro investigacion ta tumando luga na departamento di Salubridad Publico (DVG) pa no solamente mira con esaki por a sucede, sino tambe kico por a haci pa evita loke a sucede, pasobra e ta condenabel.

El a bisa cu ainda nan no sa e fuente cu a divulga e tipo di informacion priva di cantidad di pashentnan cu Covid-19. Pero esun cu a hacie obviamente a haci esaki cu intencion y deliberadamente, segun e mandatario. E ta spera cu e hecho aki no tabata uno politicamente motiva. “Pasobra un hende cu un mente destructivo, maligno, so ta haci e tipo di cos aki,” el a declara den Parlamento.

E mandatario a reitera cu e investigacion lo demostra ken a leak e informacion confidencial di pashentnan cu Covid, y kico tabata su motivacion y proposito pa realisa e tipo di acto aki. E ta spera cu denter di poco nos por haya claridad y informacion riba kico ta e conclusion di e investigacionnan cu ta wordo realisa rond di e caso aki.

Sinembargo riba e asunto aki, miembro di e fraccion di oposicion, Mike de Meza (AVP) a cuestiona cu insinuacion ta wordo haci cu mester wordo aclaria. E parlamentario a condena e hecho cu divulgacion di informacion di pashentnan a wordo haci contra tur regla di privacidad. El a bisa cu e derecho di un pashent mester wordo protegi te hasta den corte.

P’esey un di su pregunta dirigi na minister di Salubridad Publico tabata si e mandatario tin indicacion palpabel y real di e responsabel di e acto aki. Kiermen indicacion cu lo por mustra si lo tin un hende di partido AVP envolvi den e caso aki.

Parlamentario De Meza a laga sa cu mirando e magnitud di e delito cometi, tur hende a boga pa no hunga politica cu e acontecimento aki.

Vacuna

Encuanto e vacuna contra Covid cu henter mundo ta na expectativa di nan, minister Dangui Oduber a laga sa cu ya caba via Hulanda, Aruba ta den e lista di paisnan cu lo beneficia di e vacuna aki.

Tambe el a laga sa cu gobierno tabatin contacto cu Organisacion Panamericano di Salud (PAHO) ya cu tin varios pais di mundo na Merca, Asia y Europa cu ta trahando riba un vacuna. Den e ultimo reunion cu nan tabatin cu PAHO, gobierno di Aruba a wordo informa cu tin 6 vacuna den e ultimo fase di desaroyo y nan ta conseha pais Aruba pa haci un pre-ordo caba di e vacuna.

Segun e mandatario no tin un fecha conoci ki dia e vacuna ta bira disponibel. E mandatario a laga sa cu ainda e prijs costo di e vacuna ta 21 dollar. Aruba no a tuma e decision pa haci e pedido ainda. Nan ta den contacto cu gobierno Hulandes, ya cu den e ultimo reunion sosteni cu Secretario di Estado, Raymond Knops riba e topico di e vacuna, a bisa cu Aruba lo uni cu gobierno di Hulanda ora cu nan ta haci nan pedido na Union Europeo.

Segun gobierno Hulandes, e vacuna Europeo lo bin riba mercado mas lihe cu cualkier otro vacuna. Ademas nan ta considera cu esaki lo ta e vacuna mas confiabel. Na momento cu esaki ta bira disponibel, gobierno Hulandes lo manda un pedido di vacuna pa e islanan di Reino Hulandes tambe. El a sigura cu e cantidad cu ta bira disponibel pa Aruba ainda mester wordo discuti cu Hulanda.

Oduber a agrega cu Hulanda tampoco tin claridad ainda ki dia e vacuna aki ta bira disponibel. Aruba ta hayando informacion diariamente for di Organisacion Mundial di Salud (WHO) y di RIVM di Hulanda, caminda tur informacion ta bisa cu a pesar di e vacuna, Covid no ta bay disparce por lo pronto, y nos tin cu siña y purba deal cu e situacion cu a surgi.

Durante su presentacion den Parlamento, Oduber a bin cu diferente informacion di conocemento publico caba cu a wordo divulga durante e conferencianan di prensa cu a bin tumando luga regularmente desde cu Covid a yega Aruba, luna di maart ultimo.

Situacion

El a sigura cu durante e ultimo lunanan como gobierno y como Crisis Team, nan a percura pa prepara nan mes pa e situacion cu a presenta, entre nan amplia nos capacidad di unidad di cuido intensivo (ICU) den hospital. Tambe el a referi cu lo tin disponibilidad di mas personal di cuido si mester. Igualmente mas ventilator cu ta na caminda.

El a bolbe bisa cu e situacion actualmente ta controlabel, referiendo na e capacidad di cama, tanto den e seccion destina pa e pashentnan di Covid den hospital y e cantidad di ICU disponibel. A pesar cu tin hopi caso positivo – 1232 caso te cu ayera – nan ta mantene e capacidad di camanan den hospital y ICU. “Y esey ta e caso na e momentonan aki,” el a bisa.

Tambe den e siman aki, Hulanda a indica cu si nos tin e necesidad pa mas personal, esaki ta posibel si ta necesario. Ya cu ora ta wordo amplia bo capacidad di cuido intensivo bo mester di mas personal pa atende cune. Nan ta monitor e situacion aki cu hospital, si tin e necesidad real pa esaki of di otro sorto di medidanan.

Si tin necesidad pa busca mas profesional – segun e mandatario – nan a adapta e contractnan cu e personal di cuido aki pa e ta mas flexibel, y tambe pa e personal aki por ta mas disponibel. Pero cumpliendo cu e protocol cu nos tin pa un profesional di salud cu ta bin di afo, el a sigura.

Sin duda tin varios punto cu a resalta durante minister Oduber su presentacion, ya cu nan tin di haber cu desaroyo y acontecimento cu a bin tumando luga recientemente den henter mundo. Entre nan e hecho cu comunidad mester cuminsa custumbra cu e Covid por bira otro virus cu ta convivi cu humanidad manera HIV y sarampi, esaki segun informacion di Organisacion Mundial di Salud (WHO). Igualmente no tin indicacion por lo pronto ki dia e virus aki lo disparce.

Igualmente e mandatario a informa parlamento cu pronto cu ayudo di Hulanda nos lo amplia nos capacidad di ventilador. El a bisa cu e siman aki, Secretario di Estado di Hulanda, Raymond Knops a compromete pa nos amplia cu 6 ventilador mas nos capacidad. Nan lo bini for di Bonaire, mirando cu nan situacion ta otro compara cu esun di nos, ya cu nan no ta registrando casonan positivo nobo e ultimo luna aki.