Ayera atardi a cuminsa core e rumor cu personanan di nacionalidad Afgano por a bin Aruba den calidad di refugiado como parti di e plan di ayudo humanitario pa loke ta trata e crisis cu pais Afganistan ta bibando na e momentonan aki.
Por a compronde cu “segun un informante di Buitenlandse Zaken di Hulanda, tin e gran posibilidad cu den e siguiente lunanan nos dilanti un grupo di 200 Afgano lo por wordo reubica na Aruba, na Curaçao 350 y na Boneiro 80. Nan lo haya permiso y tambe lo bay den un proceso di integracion. Esey ta pa e ayudo humanitario cu Hulanda lo duna den e crisis Afghano. Na Aruba tin pensa di usa e mankamp na tereno di Citgo pa acomoda e Afganonan te ora cu nan lo por integra den e comunidad Arubiano”, e texto tabata indica.
Pa cu esaki, Bon Dia Aruba a acerca prome minister demisionario Evelyn Wever-Croes pa puntra si esaki ta berdad na unda cu e unico contesta di su parti tabata “esey NO ta berdad”.
Afganistan ta bibando momentonan di tension halto for di algun dianan pasa na unda cu gruponan Taliban a tuma posesion di casi henter e pais causando miedo pa tur su habitantenan cu a dicidi di bandona nan pais, incluyendo su presidente Ashraf Ghani na unda cu segun el a informa pa medionan di comunicacion internacional tabatin e posibilidad cu e lo por wordo asesina.
