Durante un rueda di prensa extraordinario diamars atardi, dilanti di Stadion Guillermo Prospero Trinidad minister di Deporte Gerlien Croes a duna un declaracion despues di reuni cu representantenan di Arubaanse Voetbal Bond (AVB) y Arubaanse Atletiek Bond (AAB) tocante e situacion cu tin andando relaciona cu e proyecto cu tin andando di renobacion di e stadion.

Minister Croes a splica cu tabatin varios desaroyo den ultimo cuater pa cinco siman desde cu el a tuma su responsabilidad como minister di Deporte. El a indica cu el a ricibi den ultimo siman y dianan mensahe y cartanan di preocupacion di no solamente AVB, pero tambe for di AAB.

Manera ta conoci den e ultimo añanan tin un desaroyo andando pa locual ta renobacion di stadion Guillermo Prospero Trinidad. A wak diferente declaracion, mensahe y video cu a ser comparti for di e gabinete saliente y minister saliente tocante desaroyo di e proyecto.

Minister Croes a splica cu na momento cu el a tuma e responsabilidad como minister cinco siman atras, el a haya un overdracht di seis pagina pa locual ta deporte. Den e documento aki, el a indica, cierto pagina ta menciona proyecto di LED Screen na e stadion, cual a yega Aruba dia 19 di maart 2025.

Tambe ta menciona accionnan cu ta bin despues, instalacion y contrato di mantencion, y ki departamentonan ta trekker di e proyecto. Pero segun e mandatarionan eseynan ta dos pa tres punto cu tin den e documento y pues como minister el a bay busca informacion tocante e lider di proyecto y ken ta trek e proyecto.

E mandatario a splica cu pa cuater siman el a organisa varios reunion y tur esnan cu por tin conocemento di e proyecto, por ehempel FFD of Fundacion Lotto pa Deporte (FLpD) cu ta bisa cu nan no ta lider di proyecto. Lotto ta bisa cu nan a inverti den e proyecto pero nan no ta lider di e proyecto, y FFD tambe ta indica cu tampoco nan ta lider di proyecto.

Apart di esey tambe tabatin confusion pa loke ta e yabi di e edificio. Minister Croes a sigui splica cu den e ultimo tres pa cuater siman e mes mester a investiga pa sa kico ta sucediendo.

Finalmente e mandatario a bin na compronde cu tabatin fase uno, cual tabata e parti dilanti di e edificio cu a ser renoba, cual a ser entrega y e yabi ey a ser entrega na un trahado di FFD pa e compania cu a haci e trabou, pero keto bay niun hende ta indica cu nan ta lider di e proyecto.

“E punto ta cu tur hende ta bisa cu nan no ta lider di proyecto. Mi ta sinta cu un proyecto cu mi no sa kico falta di berdad, mi no sa kico ta cla pasobra mi ta haya diferente mensahe. E minister saliente, ta obvio y ta compronde cu seis luna despues ainda e no ta acepta e no ta minister mas y ta yama tur e federacionnan pa informa tocante e proyecto. E minister no a acepta cu su rol a cambia y obviamente tin un wega politico cu niun hende no kier responsabilisa y haci un overdracht duidelijk na mi persona,” e mandatario a enfatisa.

Minister Croes a subraya cu e situacion ta inaceptabel. El a menciona cu e no tin un documento cu ta duna di conoce den ki fase e proyecto ta, kico falta, kico ta e materialnan cu a ser cumpra, kico ta e materialnan cu falta pa ser cumpra, cuanto precies pais Aruba a inverti den e proyecto of cuanto precies Fundacion Lotto ta inverti den e proyecto.

Loke e mandatario a informa cu e la logra identifica ta cu FLpD a hinca hopi fondo den e proyecto aki. El a splica cu tabatin un indicacion cu e prome fase tabata rond di tres miyon, pero ya ta papiando di mas cu tres miyon extra cu a bin. “Mi no tin un overzicht completo y niun hende kier responsabilisa,” el a agrega.

Mirando e situacion cu tabata canando, e mandatario a tuma e decision diabierna ultimo pa yama FLpD, un di e personanan cu tabata encarga cu e prome fase y FFD na mesa pa informa e situacion mester caba pasobra no tin un imagen cla di kico ta sucediendo mientras cu AVB ta en espera pa wak kico ta nan futuro pa loke ta trata weganan cu mester tuma luga den e simannan binidero, y pa AAB tambe e muchanan tin hopi tempo caba cu nan no tin un band pa nan por train.

Den fin di siman minister Croes a tuma e decision pa haci peticion na e organisacionnan aki pa entrega tur e yabinan di e edificio. El a remarca cu e edificio ta di pais Aruba y pa basta aña tabata ser supervisa pa FFD. Den fin di siman a yega na un afpsraak cu diasabra mester a entrega tur e yabinan pasobra tabatin diferente persona cu tabatin diferente yabi.

Diamars merdia e mandatario a tuma contacto back cu e organisacionnan pidiendo e yabinan y a duna deadline di 2:30 di atardi pa entrega e yabinan pa asina sigui pa dilanti y identifica kico ta sucediendo di berdad cu e proyecto y ki ora e ta ser finalisa y kico ta e siguiente stapnan.

E intencion di e reunion di diamars tabata pa hunto cu AVB y AAB drenta stadion y sinta hunto pa wak con nan ta bay sigui pa dilanti.

“E ta duel mi bisa esaki pero asina leu politica ta yega y esaki ta algo inaceptabel na e forma ki y mi a bisa tambe mi no ta acepta tampoco cu na e manera aki, mi no sa si no tabatin riba papel un lider di proyecto, pero tur hende cu nos a papia cune, tur organisacion, tur stichting, tur hende si tabata referi na personanan cu tabata trekker di e proyecto aki. Mi a haya bewijs tambe di mensahe, voicenotes di e minister saliente y personanan cu tabata traha di cerca cune cu nan tin tur informacion, mensahenan cu mi a wak cu mi ta bisa cu ta inaceptable cu pa tanto siman largo ta haci esaki, y mi no ta wak otro motibo cu no ta motibo politico,” minister Croes a enfatisa.

E mandatario a splica cu pa e proyecto aki no tin un contratista, pero tin hopi contratista pasobra hopi hende cu a traha riba e proyecto y yen pida pida separa ta ser haci. No ta cuestion cu e por a yama un hende y e persona ey ta responsabilisa su mes. Pa cada parti pa cada cos cu a keda falta tin un hende.

“Aworaki mester busca solucion responsable pa wak con ta sigui pa dilanti pa finalisa lo necesario pa e uso di e edificio y di eynan ta sigui wak e resto di e proceso. Nos kier traha pa e futuro di e pais aki, ta un lastima cu na e momento aki asina ki nos a bin encontra tur cos, cu asina hopi energia tin cu ser hinca aden y esey ta falta di bon gobernacion y cu nos tin hinca energia pa soluciona tur e retonan aki pa deporte por sigui move. Diabierna ultimo mi tabata den reunion pasobra baseball tampoco no por cuminsa na veld di Pos Chikito… E ta increibel pa wak con a maneha deporte den e ultimo añanan,” el a enfatisa.