E aña ki un biaha mas e muchanan cu ta haya ayudo di desayuno pa medio di e Fundacion Ban Uni Man Pa Cria Nos Muchanan, a bira menos.
Presidente di e fundacion aki, sr. John Fun ta declara na Bon Dia Aruba cu e ayudo cu nan ta dunando na e muchanan cu mas necesidad cu a cuminsa e aña escolar na augustus ultimo a bira 590 mucha. El a bisa cu ainda nan ta sperando inscripcion di scolnan pa mira si e cantidad ta bay cambia.
Ayudo a bira menos
Sr. Fun ta bisa cu e fundacion aki a yega di yuda hopi mas mucha. Na aña escolar 2014-2015 nan tabatin 795 mucha. Pero lamentablemente nan mester a baha e cantidad aki cu 200 mucha pasobra nan reserva tabata cabando.
E tin di bisa cu e reserva of fondo di e fundacion a drecha un tiki, pero nan no por yuda e 200 mucha cu a cay afo di nan programa di alimentacion. “E ta duel nos masha hopi, pasobra nos sa cu e muchanan ta den necesidad,” e ta bisa.
Sr. Fun ta haci un suplica na comunidad di Aruba pa yuda, ya cu si e fundacion ta haya 200 sponsor nan por tuma e 200 muchanan cu a cay afo bek. Esaki ta e fundacion su deseo pa e ayudo aki por sigui crece na fabor di e muchanan den mas necesidad.
Di otro banda, el a laga sa cu e programa aki a resulta di ta sostenibel, pasobra e cantidad di 590 mucha cu nan ta yudando ta hopi, y cu e fundacion aki tin 15 aña di existencia na 2016. “Kiermen cu e tin un derecho di existencia”, segun Sr. Fun.
Tambe e ta expresa su satisfaccion cu e fundacion aki por yena e necesidad aki den comunidad yudando e muchanan aki. Hopi biaha e hendenan no ta kere, pero tin necesidad den nos comunidad, el a afirma.
Encuanto e posibilidad pa organisa un fundraising cu lo por yuda fortalece nan fondo, Sr. Fun ta laga sa cu pa nan ta resulta dificil, ya cu nan no tin mucho boluntario.
E ta señala cu e boluntarionan ta e miembronan di e directiva y nan ta dedica nan tempo pa organisa e cuminda di e muchanan tur dia. Organisa un actividad di recaudacion di fondo ta demanda hopi esfuerso, y el a bisa cu honestamente cu e miembronan di e directiva nan tempo ta hopi limita. Ya cu e miembronan di e directiva ta traha den hospital cu actualmente ta den pleno construccion.
Sinembargo e fundacion a yega di haya e ayudo di muchanan di scol di EPI caminda nan a yega di organisa actividad chikito.
“Pero toch tur chikito ta yuda pasobra cu 300 florin nos por yuda un mucha na scol henter un aña largo. Tur fondo cu nos ta haya ta yuda.”
Tambe nan ta hayando ayudo di e diferente club social cu ta aporta na e fundacion noble y bunita aki tur aña. “Nos ta hopi agradecido pa cu esey”, asina Sr. Fun a culmina su declaracion.
