Por lo menos nuebe persona a muri den dos episodio cu a tuma lugar na zona norte y sur di San Paulo, Brasil, den un ora solamente, entre diamars marduga y diaranson mainta. Te na e momento aki no tin informacion tocante algun conexion entre tur dos crimen cu a tuma lugar na Brazil, segun autoridadnan a splica.
Segun publicacion di corant Folha de San Paulo, cerca di 11 or di anochi, a muri seis persona na un bar situa na e caya conoci como John Lucas Alves, na region di Jacana, den norte di e ciudad aki. Un grupo di homber arma a drenta na un bar y a tira hopi biaha riba nan victimanan. Cinco persona a muri den baño y otro di nan pafo di e lugar.
Den otro sucedido, 3 persona mas a haya bala, ora cu nan tabata na interior di otro bar. Mediconan a laga traslada e victimanan inmediatamente pa hospital di zona ey. E crimen a tuma lugar cerca di un base di polis militar riba caya Ari Rocha Miranda. Den otro ocurencia, na region di Campo Limpo, na sur di e ciudad, dos homber riba un motocicleta a dispara varios bala riba 4 persona den e caya conoci como profesor Nina Stocco, cerca di mey anochi. Despues di e crimen nan a huy.
Segun polis, un di e victimanan a muri di inmedianto. Otro tres a ser hiba na hospital Campo Limpo, pero dos di nan no a sobrevivi. E unico cu ta bibo actualmente ta un di nan cu a haya un bala na su man. Segun un comunicado di departamento di homicidio y proteccion di persona di Brasil (DHPP), autoridad ta investiga e crimen y posibel conexion di ambos sucedido cu a tuma lugar diamars y diaranson.
DHPP ta investiga tur dos lugar unda e asesinato a sucede. Na un prome momento seis persona a muri y otro tres a ser hiba na hospital den e zona cercano. Den e suceso cu a pasa na sur, tres persona a muri, un a keda herida y otro sano y salvo. Polis ta riba caya pa asina haya prueba cu por yuda cu e identificacion di criminalnan.
