Nokia ta bisa cu NASA a acerca e compania pa construi e prome red di comunicacion celular riba Luna.

E fabricante di ekipo di telecomunicacion Finlandes a bisa dialuna cu su division Nokia Bell Labs lo construi un sistema di comunicacion 4G cu lo lansa riba un lander lunar na e superficie di Luna pa fin di 2022.

NASA ta otorgando $370 miyon na 14 compania pa provee tecnologia pa e programa di aterisahe lunar Artemis. E meta di e programa ta pa establece un presencia humano a largo plaso riba Luna, como un ‘warm-up’ pa misionnan na Mars.

Nokia a revela mas detayenan di su participacion despues di un anuncio di NASA siman pasa, cual a bisa cu tabata otorgando e unidad Mericano di e compania $14.1 miyon pa e red. E agencia espacial Mericano tambe ta pagando pa otro innovacionnan den maneho di fluho cryogenico, innovacion riba superficie lunar, y capacidad di decenso y aterisahe.

E red di Nokia lo provee capacidadnan critico di comunicacion pa tareanan cu astronautanan lo mester ehecuta, manera control remoto di rovernan nuclear, nabegacion en bibo, y transmision di video cu definicion halto, segun e compania a bisa.

E ekipo ta inclui un stacion base, antena y software, y ta diseña pa por soporta despegue- y aterisahenan lunar dificil, y condicionnan extremo den espacio.

Nokia ta asociando cu compania Mericano, Intuitive Machines, cual NASA a scoge pa construi un ‘hopper lander’ chikito cu por haya acceso na craternan lunar y ehecuta evaluacionnan di resolucion halto di e superficie lunar for di un distancia cortico.

“Rednan di comunicacion dependiente, resiliente, y di capacidad halto lo ta clave pa duna sosten na presencia humano sostenibel riba e superficie lunar”, hefe di tecnologia di Nokia, Marcus Weldon a bisa.

LEAVE A REPLY

Please enter your comment!
Please enter your name here