Pa mas cu un siman caba Aruba su nomber ta riba diferente medionan di comunicacion internacional pa motibo di ta forma parti di un lista di 20 pais cu e consumo mas halto den cocaina. Aruba ta posiciona na number 13 di e lista aki.

Den comunidad aki na Aruba e noticia aki tambe a capta basta atencion. Bon Dia Aruba como un medio di comunicacion investigativo a haci un buskeda mas profundo pa asina saca afo kico tin di berdad cu e lista aki. Segun e reportahe haci pa e diferente medionan, e lista aki ta bin di un update haci pa UNODC (United Nations Office on Drugs and Crime) recientemente. E publicacionnan aki ta duna un impresion eroneo, aunke parcialmente e ta berdad.

Henter e asunto aki a inicia desde cu e chef celebridad di nacionalidad Britanico Gordon Ramsay a dicidi di haci un documentario di dos segmento riba e mundo di cocaina. Ramsay su interes pa esaki a bin ya cu e uzo di cocaina na United Kingdom a bay for di man y ningun hende kier papia di dje segun e celebridad. Segun un encuesta haci na 2016/16, 2.25 porciento di United Kingdom ta consumi cocaina. Esaki ta casi 1.5 miyon di persona cu ta consumi e droga aki.

E chef conoci popularmente pa su series Hell’s Kitchen ta splica cu den su trayecto profesional el a topa cu cocaina na varios ocasion. “Mi a wak cocaina hopi biaha den mi carera. Mi a wordo sirbi, el a wordo duna na mi, el a wordo poni den mi man den pakete chikito di foil. Mi a yega di wordo pidi pa traha soufle cu ne of pa uze manera powder sugar”, tabata su prome palabranan na inicio di e prome segmento di e documentario.

E documentario aki di Ramsay a haci cu medionan internacional a bay busca informacion di cua ta e paisnan na mundo tin e consumo di mas halto per capita y aki ta unda Aruba su nomber ta aparece.

Realidad di e situacion
Bruhamento di palabra ta pone cu ta bin un confusion di e realidad y no ta duna un bista completamente corecto. UNODC no a publica un update ni tampoco a saca un lista nobo sino cu a uza e informacion mas actual cu tin riba e website di UNODC . E data cu a wordo uza pa formula e lista di e 20 paisnan ta pertenece di compilacion cu ta varia den diferente aña (1997 – 2016).

E pais cu e data mas bieu den e caso aki ta Aruba (1997), cu segun encuesta haci e tempo ey, 1.3% di e poblacion (91,345 habitante segun data di CBS) lo ta consumi cocaina. Desde 1997, UNODC no tin un encuesta oficial caminda ta indica kico e situacion mas real/actual ta y si di berdad Aruba lo mester ta riba e lista di e 20 paisnan cu mas ta consumi cocaina per capita.

Bon Dia Aruba lo ta buscando informacion di instancianan local pa asina haya un bista di kico e situacion di droga ta actualmente na Aruba, entre otro di cocaina.