E critico y experto den arte contemporaneo, Adi Martes ta bin realisando un investigacion tocante origen di nombernan na Aruba.
Sr. Martes a yega di publica varios buki caba riba arte plastico, pero esaki ta un investigacion cu ta transcende e frontera di su experticio riba tereno di arte plastico.
Durante su presentacion na Biblioteca Nacional Aruba su seccion Arubiana-Caribiana, sr. Martes a bisa cu e origen di e investigacion aki a nifica “cobamento den nos historia”. E ta analisa con den nos comunidad ta wordo introduci nombernan nobo y con e nombernan a cambia y adapta den historia.
Fuente di “inspiracion”
Sr. Martes a papia riba dunamento di nomber na Aruba, nomber di cariño y tambe nomber di bofon of mala fe of… mala fama. Un di su fuente di inspiracion pa investiga riba nomber na Aruba tabata e avisonan di morto; ademas di Archivo Nacional Aruba (ANA).
Un forma pa duna nomber na Aruba ta inspira den e nomber di diferente Santo di e religion Catolico. Den esaki e famoso kalender di Bristol cu ainda ta existi of tambe e misal of buki di Santonan di misa tabata un fuente di inspiracion pa e mayornan di antes.
Sr. Martes a laga sa cu mayoria di nomber a wordo traha asina: E prome nomber a bini di cada mayor cu tabata duna su yiu e nomber hereditario di e padushi of madushi. E di dos y di tres nomber a bini di un Santo, manera Toribio. Tambe di un otro miembro di e famia, ya sea un omo of tanta, y te hasta e nomber di e madrina of padrino. El ta indica cu madrina y padrino tabata hunga un rol hopi importante den pasado, specialmente si algun di nan tabata rico, ya cu e iha tabata haya hopi regalo.
E ta haya cu awendia tin poco mayor cu ta duna su yiu pa ehempel e nomber di Toribio, ya cu moda a cambia y ta sigui cambia. Di e 12.729 baby cu a nace na Aruba for di aña 2000 te cu luna di april 2016, un so tabata yama Toribio. Mientras cu e nomber di Toribio a wordo uza frecuentemente den pasado pa batisa e muchanan.
Na aña 1831 cu ta e prome aña cu e proceso di registracion di nacemento a cuminsa oficialmente na Aruba, di 140 baby registra, 35 di nan tabata yama Maria combina cu otro nomber popular e tempo ey, manera Ana, Elizabeth, Elena, Luisa, etc… Mientras nomber mas popular pa mucha homber tabata Juan of Jean, Jose of Joseph. Hendrik y Nicolas.
Na aña 1831 e nombernan anterior tabata popular, pero –segun sr. Martes- nan tabata popular basta tempo caba, ya cu nan tabata aparece riba un lista di hendenan cu ta pidi tereno na aña 1767. Tambe nan ta aparece riba e famoso documento of prome texto di Papiamento na Aruba na 1803.
“Balut” ta un di e nomber cu ta aparece riba e lista di 1767 pero e nomber aki a bay den via di extinsion. “Balut” tabata un hende cu hopi placa cu tabata biba na Alto Vista y su nomber tabata Luisa Lucas Guadalupe Silvestre cu a nace na 1724.
Nomber di cariño
El a bisa cu den su investigacion el a coba den hopi documento historico, pero lo mas curioso ta cu nunca el a haya un nomber indjan of algo cu parce. Sr. Martes ta haya cu talbes tin algun nomber scondi den e “toponinonan” of nomber di cariño.
Algun nomber di cariño cu ta aparece riba un lista cu sr. Martes a compila ta: Angechi (Angel); Bebbe (Gilberto); Booshi (Ambrosio); Cachi (Nicolasa); Cadjodjo (Carmen Josefa), Camimi (Herminia); Chinto (Hyacinto, Jacinto); Den Den, Des (Lourdes); Etta, Ety (Edwin); Fela (Filomena), Fenchi (Francisco) Goy (Gregorio); Herry (Leoncio); Ibi Gilbert, Hubert); Isha (Aixa, Luisa); Kerino (Seferino); Lio (Lidio); Maca, Macay, Machi, Machia (Margarita); Nadijs (Leonardo); Ovito (Victor); Pachi, Padu, Pafai (Raphael); Quito (Rafael); Rica, Rina (Christina); Shon A, Shon Cai, Shon Co (Dominico); Tachi, Taita (Charles); Tere (Teresita); Uchi, Ula(Ursula); Vale (Valeriano); Wachi (Oswaldo); Yendi (Jan Hendrik); Zako (Isaac).
Tambe hopi luga na Aruba tin nomber di e sitio unda e hendenan a biba manera Babijn, Simon Antonio, Tanki Leendert, etc…
