Ayera riba rednan social, comunidad local a expresa nan disgusto pa e aglomeracion di bishitante cu tabatin na Arashi Beach. Conocido activista Nigel Maduro a comparti un video den cual ta mustra un cantidad di persona cu tent y stoel aglomera riba e santo, generando hopi malcontento entre otro usuarionan.
E critica principal di Maduro tabata cu tin asina hopi hende caba riba e beach, mientras cu ainda tin apertura di un hotel na caminda. “Corda shonnan, esaki ta PROME cu e hotel habri. Anto nan ta bay habri un mas na ex-Morgan’s Island,” Maduro a bisa.
Mayoria di comentario a enfoca riba e hecho cu Aruba ta sinti hopi yen. “Bo mester ta loco si bo ta kere tin espacio pa un hotel na Arashi,” usuario R.A. a comenta. “Di otro banda, nan tambe a aproba un hotel na Baby Beach. Pues nos politiconan mester ta loco.”
“Aruba yena cu hotel di punta pa punta yena cu turismo, y asina mes nos pober Rubiano ta [haya dificil] pa tene cabes riba awa!” D.W. a lamenta.
I.L.C di su banda a lamenta cu “Arashi ta yen, Tres Trapi ta yen, Boca Catalina yen, Baby Beach yen, Palm Beach yen, etc. Yen ta yen… y e localnan awo?”
Otro keho expresa pa hopi usuario ta e diferencia compara cu antes. B.R. a bisa: “Ami ta un Arubiano biba 12 aña na [Suecia], iy 2 aña pasa m’a bay Aruba bishita y mi no por a echt kere con Aruba a cambia asina hopi, m’a keda shock di con crowded Arashi a bira, un di mi lamanan faborito ora mi ta mucha, hopi tristo nos naturalesa ta bayendo perdi.” Na esaki, Maduro a contesta cu “hopi Arubianonan cu ta bibando ‘kinan anto nunca no a biba pafo no a wak e cambio pasobra e ta nan ciclo di bida diario. Pero e studiantenan cu a bay pafo y bin back, nan TUR ta wak con mahos y con overcrowded Aruba a bira. Y con nos spots y memorianan ta wordo bendi.”
Esaki no ta prome biaha cu comunidad local ta expresa disgusto y malcontento pa e maneho di turismo masal na Aruba. Sinembargo, esaki no ta keda refleha na momento di eleccion, cu mayoria di votador manteniendo sosten pa e partidonan tradicional.
