Nos por ripara cu campaña electoral a cuminza, aunke na un manera casi timido. Esey tin tur cos di haci cu e crisis causa pa Covid-19, cu ta pone tur forza politico dilanti e pregunta y desafionan grandi actual. Un di e temanan cu si ta atende caba ta e progreso den e proyecto di rehabilitacion di e refineria, combina cu e proyecto pa trece gas natural, den forma liquido (LNG; Liquified Natural Gas) na Aruba, tambe na beneficio di WEB Aruba NV, cu por cambia di uso di heavy fuel oil pa gas natural. Esaki tin, manera splica na varios ocasion, obhetivamente e bentaha di ta un combustible cu ta kima hopi mas limpi, cu menos emision di gas dañino y toxico den medio ambiente. Esey ta na nos fabor, tanto pa nos propio habitantenan como pa nos contribucion na e lucha mundial contra efectonan negativo relaciona cu cambio di clima.

Despues di por ta di acuerdo cu esey, ta bolbe naturalmente e aspectonan unda e opinionnan – politico y di otro indole – ta diferencia atrobe. Di un banda nos tin e noticianan for di seno gubernamental, expresa mas tanto via parlamentario di e partido mas grandi den e coalicion, un poco straño pasobra nos ta spera mas tanto noticia for di e compania(nan) estatal cu ta envolvi den e proyectonan aki, y di e promer ministro mes, cu ta directamente responsable pa e asunto aki. Di otro banda, y nos ta contento cu esey, nos a cuminza tende e sonidonan critico di otro banda, cu ta mustra riba e cautela cu mester practica den e asunto aki, pasobra apenas a cuminza contempla e cosnan aki. Den nos edicion di ayera nos tabatin opinion di un conocedor local cu ta adverti pa e aparente gritonan di victoria, y ta mustra riba varios desafio cu mester haya contesta promer cu por haci e cambio faborable ey pa gas natural.

Nos ta comparti e ultimo opinion aki, y nos redaccion ta trahando riba un publicacion mas extenso tocante e avance cu uso di LNG tabatin te awe den region di Caribe, y kico ta e problemanan cu e expertonan di e materia a investiga y comenta den varios estudio, cu ta abarca henter nos region, incluyendo e islanan y e paisnan continantal cu tin costa Caribense. Y e estudionan aki ta papia un idioma cla, riba varios punto clave. Un di nan ta e volumen di gas cu un cliente mester consumi pa por haci uso efectivo y na un prijs competitivo di gas natural. Un di e conclusionnan general ta cu practicamente tur estudio ta limita na e paisnan mas grandi den nos region. Algun por ehemplo tin como islanan mas chikito Bahamas y Barbados, cu ta sustancialmente mas grandi cu Aruba. E estudionan ta dirigi na e paisnan den region mas grandi, cu ta ofrece un mercado bastante mas grandi cu Aruba, y ta trata di e islanan cu tin un poblacion di mas di un miyon habitante, bay ariba. Cu excepcion di Cuba, pa motibo obvio, y Haiti, cu tin otro problema pa atende, tur isla mayor, Republica Dominicana, Jamaica, Puerto Rico y Trinidad & Tobago, ta inclui den esaki. Tambe ta contempla situacion na e paisnan di continente cu tin costa den Caribe. Paisnan manera Venezuela, Colombia, Panama, Nicaragua, Honduras.

Sorpresa number uno: tur teritorio mayor den e region ta envolvi caba den proyectonan di LNG. Esaki ta trece cune cu mester pone un ‘vraagteken’ grandi tras di e posibilidad pa desaroya un centro di distribucion di gas na Aruba, si mayoria di e islanan ta na distancia grandi den arco norte di nos region y ademas ta involucra caba cu e negoshi aki. Fuera di esey, e islanan chikito, si tin un forma pa abastece nan, esey lo ser haci for di e hubnan den nan cercania. Tambe Aruba ta cerca di costa Venezolano y Colombiano, ambos proveedor di gas natural. Nos por bira talvez cliente di un di nan, mas tanto Colombia, pero ‘centro regional di distribucion’? Soñar no cuesta nada…

Sorpresa dos: e asunto di volumen maximo alcanzable na Aruba. A pesar di tur e propaganda di e refineria ta dificil imagina un reapertura di e refineria, sigur den e condicionnan actual, pero tambe di mes pa e condicionnan cu ta existi pa mas di 40 aña caba. Esaki ta un tema extensamente trata den e medio aki, pero na otro ocasion nos lo ripiti. Den e contexto aki, nos no ta haya nada straño cu a cera un deal separa cu Eagle LNG pa suministra gas natural na WEB; tocante e refineria ta reina actualmente un silencio. E pregunta clave ta: den ki forma lo por trece gas natural Aruba pa WEB, tumando na cuenta e limitacion di volumen cu Aruba lo conoce, sin conta cu e refineria? Tin indicacion cu na e nivel di produccion di energia electrico, di alrededor di 100 MW, cu un capacidad instala un poco mas amplio, nos por ta cay den un categoria cu ta dificil pa haya gas natural na un prijs competitivo. Lo mester studia e asunto aki hopi bon, inclusive e estudio di otro tipo di gas, manera LPG (Liquified Petroleum Gas). Esaki no ta parce algo di core haci promer cu eleccion, y no pa motibo di eleccion tampoco.

LEAVE A REPLY

Please enter your comment!
Please enter your name here