Anteriormente nos a papia tocante e hurricane belt y con cambio di clima ta causando cu expertonan ta considerando y investigando un ampliacion di esaki. Sinembargo, esaki no ta e unico cambio significante cu nos lo por mira den un futuro cercano si e moda di cambio di clima sigui cana manera e ta bayendo.
Otro cambio cu e investigadornan ta considerando ta e aumento di categoria di horcan, mirando cu tin evidencia cu e nivel di extremidad di horcan actualmente ta mustrando posibilidad di pasa e limitenan cu tin estableci actualmente.
Pa nos por compronde e seriedad di esaki, prome nos tin cu compronde con ta yega na e nivel di un horcan y kico exactamente esaki ta nifica.
Den aña 1973, National Hurricane Center a introduci un escala yama e Saffir-Simpson scale, un sistema di 5 categoria cu ta clasifica horcan basa riba e intensidad di su biento. Na nivel mas abao di e sistema ta e categoria 1, pa tormentanan cu tin bientonan di mas o menos 119 pa 152 kilometer pa ora. Na e nivel mas halto tin Categoria 5, pa desasternan cu biento di mas o menos 252 kilometer pa ora y mas.
Tin varios diferente escala di intensidad den uso. E escala di Saffir-Simpson ta usa pa Merca su National Hurricane Center, cu otro escalanan diferente usa den otro partinan di mundo. Importante ta cu cada escala usa no tin un punto final of ultimo posicion, pues nan ta escala habri. Esaki ta nifica cu e categoria final semper ta basa riba bientonan cu surpasa e velocidad di un cierto nivel, pero sin un limite halto.
Tin di nota y tene na cuenta cu ora ta trata cu naturalesa, nada no ta un garantia di 100%. Por calcula y pronostica naturalesa pero nunca bisa cu certeza completo loke ta bay sucede. Naturalesa por cambia na ultimo momento y sin aviso algun, y esaki ta haci cu hopi biaha e realidad por ta ambos pio of miho di loke a spera. Por ehempel, den aña 2013, e ciclon Oswald, un tormenta di Categoria 1, a causa yobida pisa y inundacion na Queensland y New South Wales, mientras cu e horcan di Categoria 5 na 1992, Andrew a causa daño catastrofico cu biento, pero cu tiki yobida y daño di tormenta ora cu el a golpia Florida.
Den e mita siglo desde cu e escala a keda introduci, temperaturanan tanto riba tera como lama a aumenta constantemente como resultado di emision di gasnan dañino. Manera nos a menciona anteriormente, esaki ta causando cu horcan ta birando cada biaha mas intenso, cu bientonan mas fuerte y yobida mas pisa.
Cu tormenta catastrofico surpasando e nivelnan standard pa un categoria 5, algun cientifico a cuminsa argumenta caba cu e escala di Saffir-Simpson no ta adecuado mas pa ilustra e menasa di e horcannan presente.
Ora cu un horcan di categoria 5 cu velocidadnan di te hasta 250 kilometer pa ora ta bayendo bo direccion, bo ta prepara di manera diferente compara cu ora ta papia di un horcan di categoria 1. Den un mundo mas cayente, ciclon ta anticipa di bira menos comun pero mas intenso ora cu nan ta forma. Esaki, segun investigacionnan menciona riba World Economic Forum, ta nifica cu por ta tempo pa cuminsa considera e introduccion di un horcan di Categoria 6 na e escala di horcan.
Nos a yega di papia cu e preparacion di un horcan di Categoria 1 ta diferente na e preparacion di un horcan di nivel 5, y esaki ta pa motibo cu ta considera cu un horcan di Categoria 5 lo causa daño inmenso, na nivel di ta un catastrofe pa loke e haya den su caminda. Esaki ta haci cu un escala ta necesario pa por tin por lo menos un idea di ki impacto e horcan lo por tin, pero tambe ta haci necesario pa tin un escala unda e categorianan ta representa adecuadamente.
Preparacion den un temporada di horcan semper ta un punto den cual ta pone enfasis, sinembargo e preparacion aki semper ta uno general y normalmente no ta bay hopi profundo. Cu e ayudo di e escalanan aki, nos por midi cu mas precision y siguransa con profundo nos preparacion mester ta y kico nos por spera di e evento cu ta biniendo den nos caminda.
Te cu awo, tin un solo horcan cu a surpasa e nivel di Categoria 5, cu su bientonan yegando velocidad di te hasta 309 kilometer pa ora y esaki ta e horcan cu e investigadornan ta nominando pa un Categoria 6. E importancia di tin un escala di horcan ta den e hecho cu esaki ta yuda nos por tin un idea di e daño cu un horcan binidero por causa y e nivel di preparacion cu esaki tin mester.
Den un articulo di investigacion, a trece dilanti argumentonan cu a compara actividad di tormenta historico na un version hipotetico di e escala di Saffir-Simpson cu ta inclui un categoria mas, es pa tormentanan cu tin bientonan di mas di 152 kilometer pa ora. Di 197 horcan cu actualmente tin un clasificacion di Categoria 5 for di 1980 te 2021, 5 diferente tipo lo yega e descripcion di loke por ta un posible horcan di Categoria 6 es Haiyan, Patricia, Meranti, Goni y Surigae.
Den e mesun combersacion cu representante di Aruba su departamento meteorologico unda a papia tocante varios topico, incluyendo e ampliacion di e hurricane belt, tambe a papia tocante y a confirma e consideracion di un categoria nobo. El a menciona cu “aworaki e categoria mas halto ta categoria 5, pero ya caba ta pensando riba subi na un categoria 6. E no ta algo oficial pero ya caba a cuminsa papia tocante esaki,” agregando cu ainda e expertonan “tin cu haya mas data y mas evidencia cu el a bula e number cu ta cay bao di 5, pero si e bul’e basta por traha un categoria 6.”
Segun e experto di Aruba, esaki ta bao teoria cu “si mas cayente keda den atmosfera” e cambionan den nos clima lo keda empeora. Esaki ta resona tambe cu e teoria y moda cu ta mirando cu ta causando e consideracion pa amplia e hurricane belt. Pues esaki ta bira otro factor unda e seguridad di varios pais den planeta, Aruba inclui, ta den peligro.
Pa motibo cu no solamente nos ta den bista di un posible ampliacion di e hurricane belt, sino tambe e posibilidad cu horcan ta birando mas extremo y di nivel mas halto ainda, ta di gran importancia pa keda informa cu e cambionan den clima y e pronostico pa cu esaki. Cu e pronostico y moda di cambio di clima actual, eventonan den naturalesa lo keda empeora y subi di nivel pa loke ta trata con extremo y dificil di anticipa e lo bira.
Naturalesa ta algo cu nos nunca lo por controla pero si cuida y proteha. Mientras mas consciente nos ta di con nos ta biba y interactua cu naturalesa, un miho relacion nos lo tin cune, cual consecuentemente lo haci cu nos impacto negativo riba esaki lo disminui. Manera menciona anteriormente, ta di gran importancia pa tuma accion personal, comunitario, mundial y na nivel di autoridadnan mas halto.
E proteccion di nos planeta ta resulta den e proteccion di nos mes, nos pais y e futuro di nos sernan keri.