E medio aki a tuma e decision di tene un entrevista extenso cu e ex-politico, cu algun aña pasa a bandona e arena aki, segun su opinion pa motibo di salud. Nos no ta duda esey, pero loke posiblemente tambe a hunga un papel importante ta cu Ministerio Publico a señala su persona como e sospechoso principal di e caso cu a haya e nomber di Flamingo. E caso aki ta andando ainda, sin yega na un proceso penal, pero tampoco cu un asina yama ‘depôt’, loke ta encera un paro total di e investigacion, loke lo implica tambe cu e persona(nan) involucra por sigui nan bida, sin mas preocupacion pa persecucion penal pendiente.

Manera semper, nos medio ta mantene e regla cu cada persona ta inocente te despues di nan condena. Den e caso aki, sin embargo e pregunta ta surgi pakico e persona aki ta bolbe den politica, si posiblemente aki algun tempo e mester bay defende su mes den corte. Ki tempo esey por ta nos no por bisa, pero en todo caso, si tin persecucion penal esey por bien cuminza promer cu eleccion, cu normalmente lo tuma lugar na september 2025. Y si acaso e ta den un proceso penal pa tempo cu eleccion yega, esey lo no duna e tipo di proteccion manera den caso di eleccion presidencial na Merca, unda bira presidente por habri porta pa para e caso, pordona bo mes, aunke e debate tocante e ultimo posibilidad aki no a termina. Pues manera e asunto ta awor, busca proteccion den politica finalmente no ta yuda, si tin un veredicto irevocable. Pero como cu henter e proceso ey por dura varios aña, un caso penal cu cuminza awor probablemente no lo yega na un veredicto final pa september 2025, si mescos cu e dos ministronan cu un tempo tabata su compañeronan di partido y gabinete, scoge pa bay te na Hoge Raad cu e caso. Esaki por significa cu un persona por bay riba lista pa eleccion, keda elegi y bay sinta den Staten…

No ta pornada Bon Dia Aruba den e entrevista a haci e pregunta con e mes ta mira e asunto di tin parlamentario condena caba den promer instancia, cu ta haci uso di e buraco cu tin te awe den nos leynan, cu ta haci posible e berguenza grandi ey. Su contesta tabata cu e lo sa di respeta su mes y bandona su puesto como ministro o parlamentario, si ta trata di un condena. Esey ta mustra positivo, compara cu su ex-colega y su partido cu ta haya cu e mester keda den parlamento y hasta a celebra na grandi cu el a haya un castigo mas leve cu loke Ministerio Publico inicialmente a exigi. En todo caso esey ta mustra masha noble di su parti, pero e realidad te awe ta cu un parlamentario por keda sinta den Staten, cobrando su salario tranquilamente, te dia cu, na modo di papia, cuerpo uniforma pasa busca su persona, cu na e momento ey por ta tirando un discurso den sala di parlamento… E pregunta ta si e pais aki mester keda permiti cu nos mester pasa den e tipo di berguenza aki, mientras cu ta posible pa regla e asunto aki na un manera contundente. Pa haci esey, y nos a yega di trece esaki dilanti na varios ocasion caba, nos por contempla introduci loke e isla ruman Sint Maarten tin den nan constitucion, cu ta encera regla pa tanto ministro como parlamentario den caso di ta den detencion preventivo, den cual caso ta trata di suspension (schorsing), cu e reglanan corespondiente pa reemplazo temporal. Den caso di condena pa un delito, ta regla pa ambos tipo di funcion politico e reglanan di perdida di nan puesto. Nos no ta bay den mas detaye aki, pero articulo 36 y 50 di ‘Staatsregeling’ di Sin Maarten ta duna e reglanan pa respectivamente ministro y parlamentario. Via Google facil pa haya. Nos ta kere cu mas claridad no lo tin mester y nos ta libera pa semper di e situacion moralmente condenable den cual nos pais ta awor. Pa completa e asunto: na e momento aki Aruba su constitucion conoce regla pa parlamentario cu ta trata e acceso na derecho electoral (kiesrecht), unda ta stipula cu un persona cu ta condena na un castigo di prison di por lo menos un aña y unda alavez a impone e exclusion di su derecho electoral. Esey ta tur loke cu tin y ta pesey nos ta unda nos ta.

Loke naturalmente falta, ta e disposicion di banda di nos parlamentarionan pa inicia e trabao preparativo pa haci e cambio di nos Constitucion corespondiente. Nos ta mira principalmente den direccion di e actual partidonan den gobierno, cu a critica, cu nan razon, e situacion actual di falta di moralidad di e eterno rival, cu ta sigui cu nan parlamentario condena caba, y cu ta en espera di tratamento di su caso den apelacion. No ta suficiente pa djis critica, pero ta posible y necesario pa actua tambe. Y si acaso no kier copia e isla ruman, pone algun hurista cu experiencia traha un texto nobo den e mesun espiritu. Cu e dos parlamentarionan cu e partido careciente di etica y moralidad a perde recientemente y e demas partidonan di oposicion cu tambe mester por duna prueba di nan afan di libera nos di e berguenza aki, mester por tin 14 voto pa cambia constitucion…