Corespondencia ta bay y bini entre nos ministro di finanzas y e colegio di supervision CAft tocante e conseho di CAft riba presupuesto 2022, manera e ley local (LAft) ta indica. Lo ta demasiado facil pa categoriza esaki como un simple discusion entre dos partido, unda segun e propio opinion o simpatia por scoge banda den e asunto aki. E situacion ta mas grave cu esey y merece mas atencion cu nos ta mira cu e ta haya den opinion publico. En corto, si e diferencia di opinion entre e bandanan menciona sigui asina, nos ta bay rumbo pa un proposicion di CAft na Conseho di Gobierno di Reino pa duna ministro y gabinete di Aruba un ‘aanwijzing’, un instruccion pa cambia e presupuesto segun loke e Conseho di Ministro di Reino considera apropia.

Esaki no mester implica cu e Gobierno di Reino ta bay di acuerdo cu tur loke e organo di conseho ta propone. Pero di otro banda, cualkier instruccion cu gobierno di Reino dicidi, esaki no ta nada menos cu loke popularmente ta yama un ‘KB’, (Koninklijk Besluit), un decreto real cu no ta laga espacio mas pa debate, sino cu mester cumpli cune. Naturalmente tin caminda di cana ainda pa gobierno di Aruba apela e caso, loke ta habri porta pa un evaluacion di Raad van State si e decreto ta hustifica of no, pero mientras tanto lo mester a cumpli si cu e medida.

Mientras awor aki hopi ta parce na soño ainda, ora yega asina leu cu CAft no keda contento cu e pasonan cu gobierno di Aruba a tuma pa cumpli cu e consehonan, y manda notifica gobierno di Reino di e situacion y propone un instruccion pa gobierno di Aruba, e gritamento tradicional lo cuminza, cu “Hulanda ta mustra su cara colonialista atrobe”, cu “nan ta trapa nos autonomia”, etc. Desde e momento ey lo ta imposible pa hiba un conversacion o discusion a base di argumento, pasobra e camponan pro y contra lo ta forma caba. Pues ta importante pa no perde vista di e hechonan den e asunto aki.

CAft a contesta gobierno di Aruba na mei, manera nan mester pa ley, y a formula 13 punto unda nan kier mira cambio den presupuesto 2022, orienta riba reduci gasto y aumenta entrada durante e aña aki caba, sino e obligacion di bay di 236 miyon florin di deficit e aña aki te na un surplus otro aña ta bira demasiado dificil. Ningun caminda nos ta tende gobierno ni e mandatario responsable referi na e argumento aki. Nos a mira varios rueda di prensa di e ministro concerni unda ta duna e impresion cu CAft ta un set di mahador cu ta gusta tende nan mes papia, pero nada di atende e punto aki. Y pakico no? Pasobra aki tin un desacuerdo grandi entre loke gobierno ta propone haci den e proximo añanan, y loke ta e decision tuma pa gobierno di Reino, cu pa e aña aki ainda Aruba por tin un deficit, pero pa 2023 mester cuminza build up surplus (reserva) pa cuminza atende e debenan enorme cu Aruba tin: pa fin di 2022 esey lo ta alrededor di 5.900 miyon florin (104% di GDP). Gobierno di Aruba en cambio ta pensa di rek e situacion di deficit te na 2026, obligando nos na acepta extra fianza di sigur 400 miyon mas.

Y gobierno di Aruba no por bisa cu nan no tabata sa, pasobra realmente na 2022 caba nos lo mester a yega na un surplus, pero mirando e situacion di crisis, di Covid, a dicidi pa pospone e promer aña di surplus pa 2023. Kico gobierno di Aruba a haci? Propone frescamente un deficit manera describi te despues di e periodo di gobernacion aki. Nos por mira cu aki sikiera gobierno tabata transparente, cos di cual na otro momento mas apropia nan ta carece.

En todo caso, awor nos ta yegando na e momento culminante unda no por keda sconde e conflicto aki. Den su carta di contesta (di 10 juni) CAft a duna ministro di finanzas di conoce cu nan no ta di acuerdo cu su argumentonan y ta pidi pa, segun articulo 12, inciso 1 di ley LAft, pa contesta pa mas tarda dia 24 di juni. Si na e momento ey CAft ta constata cu ainda tin punto cu nan a pidi pa atende y cu no a cumpli, segun e mesun ley nan ta informa Gobierno di Reino di e asunto. “E notificacion aki, conforme articulo 12 inciso 2 di LAft, por bay acompaña pa un conseho motiva pa duna un aanwijzing,” asina CAft ta termina su ultimo comunicacion cu gobierno di Aruba.

Loke a sucede ultimamente ta cu hopi atencion a bay na e aparente acuerdo cu nos promer ministro a cera cu e secretario di estado responsable pa asunto di Reino encuanto e 5% di reduccion di salario, kitando agilmente atencion di e puntoanan di discordia. Ademas e acuerdo di salario tambe a keda colga, pasobra de repente Gobierno di Reino a pospone aprobacion di e acuerdo. Awor si mester bin claridad. Por ta cu e punto di salario ta keda regla, pero esey no ta implica cu gobierno ta logra convence cu nan no mester cumpli cu ningun di e 13 puntonan. E punto ta simple: gobierno kier sigui gasta haciendo debe, y CAft ta haya cu no por.

LEAVE A REPLY

Please enter your comment!
Please enter your name here