Nos ta sigur… Cu nada no lo pasa…?

Segun gobierno Hulandes no tin motibo pa preocupacion na e islanan mas cerca di Venezuela, en vista di e actual conflicto entre Estadonan Uni y Venezuela, cu na cualkier momento por explota den algo mas serio. No ta trata di contradeci e punto di vista Hulandes aki, pero mester keda vigilante, tumando na cuenta con un situacion mas grave si por afecta nos y mester conoce tur elemento di importancia. Pa por evalua esaki ta necesario contempla e situacion pa cu Venezuela, principalmente e acontecimentonan di ultimo dos decada. Tambe ta importante tuma na cuenta cu e actual gobierno Mericano ta completamente otro actor den asunto internacional cu cualkier anterior gobierno di e pais aki, loke ta trece cune un cantidad di posible opcion catastrofico, cu antes nunca tabata posibilidad realistico.

Hopi importante den e actual situacion ta e manera con gobierno di Nicolas Maduro ta mira e islanan. Nos tin cierto historia caba cu e regimen aki y nan intentonan relaciona cu narcotrafico. Na 2014 a tuma lugar na Aruba e detencion di e militar, hefe di inteligencia Venezolano, Hugo “El Pollo” Carvajal, riba peticion di gobierno Mericano. Tabata señala Carvajal como un exponente importante gubernamental den narcotrafico for di Venezuela. Gobierno di Maduro a propone Carvajal como consul na Aruba y segun bon fuente e tabata pasa bastante tempo na Aruba caba, ya cu su yiu muher tabatin un apartamento cerca di e oficina di gobierno Hulandes. Su aresto por cierto a tuma lugar riba un ‘tip’ di husticia Mericano cu tabata na altura di su regreso na Aruba. E caso den corte a termina cu e decision di huez, cu tabata permisible extradita Carvajal pa Merca, pero ministro di relacion exterior Hulandes a opta pa no continua pone e relacion cu regimen di Maduro bao mas presion y a laga Carvajal liber pa bolbe na su pais, unda el a keda ricibi como un heroe Chavista. No cu esey a sirbie di tanto, pasobra su estadia clandestino na Spaña a termina den su aresto y extradicion pa Merca. E ironia ta cu awor e testimonio di Carvajal, y su informacion di con narcotrafico, organiza pa e regimen Chavista/Madurista ta opera, a bira un di e fuentenan mas valioso pa inteligencia Mericano.

Durante e decada despues di e sucesonan aki, no tabatin señal cla di intento Venezolano pa haya ‘pia na tera’ na nos isla, aunke no por exclui esey tampoco. Sin embargo, e area unda nos pais ta situa tabata semper y te dia di awe un di e zonanan principal pa exportacion di droga. Notable den esaki tabata cu e regimen Venezolano mas recientemente, na 2022, a militariza e peninsula di Paraguana y e parti Venezolano di Guajira , cu e ‘obhetivo oficial’di haya mas control riba narcotrafico den e region. No a tarda pa informacion cuminza core tocante actividad di organizacion di narcotrafico den e zona. Entre otro, e organizacion InsightCrime a informa tocante e presencia di cartelnan Mexicano na e peninsula, entre otro e cartel di Sinaloa, bao di supuesto capa protector di regimen di Maduro.

Recientemente, pa motibo di e tension entre Venezuela y Merca, mando militar Venezolano, den persona di ministro di defensa Padrino Lopez, a anuncia fortificacion di vigilancia militar na Guajira y Paraguana, segun e corant La Mañana (08 sep 2025), di mayor divulgacion na Paraguana. Segun Padrino, a tuma medida pasobra ta trata di dos area di mayor trafico di narcotico. Durante ultimo lunanan regimen di Maduro ta haciendo esfuerzo pa demostra cu nan ta combatiendo narcotrafico activamente cu e tipo di accion aki, aunke esey no ta parce di tin masha influencia riba gobierno Mericano. En todo caso, nos no tabatin mester di su confirmacion pa comproba cu e region aki ta pesta dinarcotrafico; nos sa pa decadas caba cu esey ta e realidad di e region cu nos ta biba aden.

E detayenan describi aki ta obliga nos pensa un poco mas leu. Ta posible cu Merca ta opta pa ataca un zona cerca di nos anto, si nan obhetivo ta pa elimina o limita narcotrafico. Den e caso ey tin un peligro grandi di haya nos mes involucra, pa e cercania di un tal zona di combate. Ademas mester tuma na cuenta e divulgacion internacional reciente di e puntonan di apoyo di Merca den e region, entre nan menciona Aruba y Corsou, manera ilustra den e articulo cu e topico ey den e edicion aki. E pregunta ta si den caso di un posible ataque di represalia Venezolano, kico lo ta nos defensa. Un barco di marina Hulandes no por duna proteccion na tera… Pero tanto na Merca mes como na nivel internacional ta existi duda si combati narcotrafico ta e promer obhetivo. E meta mayor ta parce e recursonan di petroleo y varios mineral, cu ta concentra mas tanto den e parti oriental di e pais. Ademas, si e obhetivo ta un cambio di gobierno, un ataque na e sede gubernamental lo tin mas prioridad. Di otro banda atrobe, si gobierno di Trump ta opta pa no involucra un cantidad grandi di tropa, por cuminza cu accion contra posible neishi di narcotrafico, loke por implica toch accion militar cerca di nos teritorio.

E problema pa Aruba, cu hunto cu Trinidad & Tobago tin e fronteranan mas cerca di Venezuela, ta cu practicamente nada ta den nos man. Nos por desea di kere cu gobierno Hulandes lo logra pa e conflicto no rementa cerca di nos, pero aki tin dos iresponsable bringando, un na Miraflores y un na Cas Blanco…