Nos hubentud por bay scol atrobe. Despues di dos luna na cas, nan por bay, pero lo mester resolve e problemanan cu e exigencianan di distanciamento social ta trece cu nan. Nos a kere cu nos lo bay tende mas instruccion y guia di banda di e ministerio concerni, pero esey no ta e caso. Loke si ta e caso ta cu a dicidi cu cada scol wak ki dia nan ta habri, y cada mayor wak si nan tin gana di manda nan yiu scol si of no. Esey ta parce un excelente solucion, si bo no tin gana di tuma decision, y bo ta laga henter e asunto na e scolnan mes, y na e mayornan. Nos a kere cu den e pais aki nos tin algo cu yama ‘leerplicht’ pero nos lo a perde algo na caminda. By the way, e ley no ta un obligacion solamente pa e alumno, y su mayornan, pa percura cu e ta bay scol, sino tambe pa gobierno pa percura pa e facilidadnan necesario. Di esey nos no ta tende nada.

Den e caso aki e crisis di coronavirus a percura pa basicamente nos tin solamente 50% di e facilidadnan cu nos mester bao di e normanan nobo. Un klas di normalmente 30 mucha, awor ta mitar di nan por drenta klas, mas o menos. Kico esey ta implica? Cu mester cuminsa usa creatividad pa mira con ta bay traha di tal forma cu mas pronto cu ta posible ta trata di compensa e retraso cu a surgi den enseñansa den e ultimo lunanan di inactividad. Y esey a resulta algo serio, unda nos propio ministro presidente a constata cu pa 60% di e alumnonan no tabatin un apoyo (digital) durante e lunanan ey. Ta p’esey el a yega na e conclusion cu ta basta y cu e scolnan mester habri. Aparentemente e departamento di enseñansa y e ministro encarga tabatin otro pensamento y tabata kier a extende e periodo di inactividad pa e muchanan cu cuatro luna, te fin di augustus. E tempo ey lo nan a usa pa prepara tur maestro y docente pa nan tarea nobo, esun di ‘begeleider’ mientras tres di cada cinco dia di scol e muchanan supuestamente lo traha na cas, guia pa nan mayor(nan). Aki un pregunta masha simple: bo mester di cuatro luna pa bo prepara un docente pa por maneha les digital?

Ningun caminda no ta papia di e daño enorme ora di e manera aki e alumnonan ta como seis luna ‘for di circulacion’. Y esaki cu e agravante cu den e aña nobo e modelo cu nan ta ofrece ta di maximalmente dos dia pa siman na scol, e resto na cas. Esaki naturalmente ta causa un sinnumero di problema. Pa cuminsa cu te awor no a surgi ningun idea con pa resolve e problema di espacio, ni extra hende pa duna les. Riba su mes esaki no ta algo pa reprocha e mandatario en cuestion, pasobra asina leu cu nos sa e no ta asina bon den ‘goochel’. Lo mester traha cu loke tin y dentro di e limitacionnan ey mester busca un caminda.

Por ehemplo, nos por imagina cu despues di dos luna di inactividad, no pa tur, lo por usa e periodo di vakantie pa opera un tipo di ‘summer school’ pa purba gana back loke mayoria di e muchanan a perde den e ultimo lunanan. Pasobra si ta pa un scol habri awor, pa dos dia den siman y dal porta cera atrobe na comienso di juli, ta kico nos ta gana cu esey? Nos sa cu naturalmente lo bin bisa cu ‘e maestronan no por yuda cu a bin Covid-19 y cu nan tin derecho riba nan vakantie…’ Esey legalmente por ta asina, pero si no tin baymento di Orlando toch, anto por mustra algo di e famoso ‘amor pa patria’ yudando e alumnonan stima bin back riba pia, of no? Si derecho riba tempo liber tin prioridad, anto den futuro nos kier keda libra di discusion inutil tocante disposicion pa sacrifica.

Sin embargo, nos mester wak mas leu cu e aña escolar aki tambe. Durante vakantie e scolnan lo no crece ‘por arte de magia’ ni lo haya mas personal docente, ademas di e imposibilidad di paga nan. Esey ta haci tambe cu e departamento di enseñansa ta anticipa pa otro aña no por duna les pa mas cu dos dia pa siman na scol, e resto mester sucede na cas. Manera menciona nan tin un plan pa train e maestro y docentenan den duna les online, bunita, pero que hubo di e alumnonan y nan mayornan cu den e modelo aki mester bira e docente principal… Really? Na Aruba unda mama cu tata tur ta traha, tin ora dos job pareu? Ademas e problema financiero, pasobra e coronavirus a pasa cerca nan tambe. Lo tin di nan sinta na cas sin trabao, pero tambe sin placa pa paga e infrastructura na cas pa nan yiu(nan) por sigui les asina, si acaso nos yega na cumpli cu tur requisito pa haci e forma di enseñansa aki factible. Den e caso aki tampoco tin solucion facil, pero soña cu cantando gloria nos ta drenta era digital tampoco ta yuda.

 

LEAVE A REPLY

Please enter your comment!
Please enter your name here