Segun resumen diario di Departamento di Salubridad Publico DVG relaciona cu cifranan di pandemia di Covid-19 na Aruba, ayera afortunadamente a registra menos di dies caso positivo nobo.
Segun DVG, ayera a registra 9 caso nobo di Covid-19, di cual tur ta residente, mientras cu 16 persona a recupera. Cu esaki e cantidad di caso activo ayera a keda na 144. E cantidad di fayecido relaciona cu Covid ta 100.
E cantidad total di test ehecuta na e diferente localidadnan na Aruba, entre otro, laboratorio di hospital, laboratorionan priva y aeropuerto, tabata 63 test. E tasa di positividad (positivity rate) entre nos residentenan tabata 15%. Tendiendo cuenta cu Organisacion Mundial di Salud (WHO) ta recomenda pa yega na un tasa di positividad di 5% of menos, ta curasha comunidad pa keda monitor salud pa presencia di cualkier sintoma – manera tosamento, dolor di garganta, kentura, entre otro – y registra pa haci test.
Di su banda, Hospital Dr. Horacio Oduber a informa cu actualmente tin un total di 21 persona interna pa ricibi cuido pa Covid-19. Di esakinan, 9 ta den Unidad di Cuido intensivo (ICU) mientras cu 12 ta isola riba unidad general di covid.
