Tur aña durante e luna di september e consumo di energia na Aruba ta yega su peak di aña. Sinembargo, e compania di electricidad di Aruba a indica cu luna pasa a surpasa tur record.
E factornan cu ta conduci na esaki ta entre otro e calor excesivo cu ta causa cu e compressor di aircondition su consumo di energia ta aumenta, pa asina por regula y yega na e temperatura desea cu normalmente e usuario ta custuma cune, y un duracion mas largo di uso di aircondition pa alivia di e calor, cu ta contribui na un consumo di coriente mas halto.
“Sea mas consciente cu consumo di coriente. Tuma un momento tur dia pa paga aparatonan cu no ta den uso of no mester ta cendi”, e compania a recomenda.
