Dia 30 di april ultimo Gabinete AVP-FUTURO hunto cu AZV a anuncia e lista positivo di remedi adapta cu a drenta na vigor dia 1 di mei. Na mesa di redaccion di Bon Dia Aruba a yega informacion di nos lectornan cu posiblemente ainda e cambio no a drenta na vigor ya cu nan mester paga pa remedi. Bon Dia Aruba a tuma contacto cu director di AZV, Edwin Jacobs, pa aclaria e informacion aki.

Manera ta conoci na october 2022 e lista positivo di remedinan cubri pa AZV a conoce un cambio, cual tabata conforme e Decreto Nacional di dia 13 di juli 2022, y resultado di e asina yama “5 Wave model” cu a keda diseña pa cumpli cu e peticion den reduccion di gastonan di AZV cu 60 miyon florin pa aña.

E lista di remedi di AZV conoce tres cambio importante e momento ey: un grupo di remedi cu ya no ta ser produci ta keda elimina di e lista, locual no tabatin efecto pa e aseguradonan; remedinan cu por ser cumpra den botica sin receta di dokter, manera Paracetamol y Dika, a keda saca di e lista y e asegurado mes mester a paga esaki. E remedinan aki ta ser yama“OTC” (Over The Counter) y generalmente nan ta na prijs rasonabel; y por ultimo cierto remedinan tabata ser cubri solamente ora ta cumpli cu e criterionan estableci. Asegurado cu malesanan cronico a keda ricibi nan remedi y solamente si resulta cu no ta cumpli na e criterionan estableci, e ora e asegurado lo mester a paga pa e remedi aki.

Dia 17 di december 2024 ex-minister di Salud, Dangui Oduber a anuncia cu a aproba e cambio di ley pa asina cubri e remedinan di pensionadonan y cu entrante 1 di februari pensionadonan no lo mester paga pa haya nan remedi mas.

Pero a pesar cu a anuncia cu e cambio aki lo a drenta na vigor dia 1 di februari, informacion tabata circula un siman despues cu e cambio di ley no a drenta na vigor e fecha cu a ser indica.

E momento ey tambe Bon Dia Aruba a tuma contacto cu director di AZV pa puntra si e informacion tabata corecto y si tin un motibo pakico e cambio di ley ainda no a drenta na vigor.

Sin duna mucho detaye, Jacobs a indica cu “e formalisacion di e decision ta den proceso.”

Despues mediante un comunicado di prensa AZV a informa: “UO AZV a ricibi e decision y a inicia e evaluacion tecnico pa ehecucion di esaki. Solamente cu e proceso aki ta tumando mucho mas tempo cu a premira inicialmente. Ta calcula cu e finalisacion di e parti tecnico lo tuma minimo 1 luna mas y maximo 2. Nos ta pidi nos disculpa pa e inconveniencia aki.”

Aworaki, despues cu un gobierno nobo a anuncia un adaptacion nobo na e lista positivo di remedinan cu AZV ta cubri, algun lector a tuma contacto cu Bon Dia Aruba pa expresa cu ainda nan tin cu paga pa remedi, cuestionando si e cambio a drenta na vigor en berdad of no.

Ayera tardi Bon Dia Aruba a tuma contacto cu Sr. Jacobs pa puntra si por aclaria e informacion aki. Sr. Jacobs a splica cu ocho remedi cu prome cu 1 di october tabata ser cubri y cu awor no ta lista mas ta Paracetamol, Dica, Noscapine, Daflon, dos dosis di Venuroton y dos dosis di Fluimucil.

E remedinan aki tabata ser cubri prome cu 1 di october 2022, y cu e cambio di lista di remedi dia 1 di october a saca nan for di lista y cu e cambio mas recien e ocho remedinan aki a keda afo di lista ainda.