(Infobae) – Bladimir Humberto Lugo Armas, ken tambe a ser acusa pa Ministerio Publico (OM) na 2017 pa violacion di derechonan humano, a ser nombra como Director di Inteligencia di e Guardia Nacional Bolivariano (GNB).

Entre e cambionan mas reciente den Fuerza Armada, e Mayor General Lugo Armas a drenta den e Estado Mayor di e GNB. Na 2017, e Ministerio Publico a presenta cargo contra e pa violacion di derechonan humano, durante e periodo cu e tabata coronel y hefe di e comando encarga cu custodia e Palacio Federal Legislativo. Segun acusacionnan, su permisividad a facilita entrada di un grupo specialisa cu a ataca diputado y lidernan di oposicion.

Riba 5 di juli 2017, un grupo di choke di e revolucion bolivariano a drenta forsa den e Palacio Federal Legislativo, sede di e Asamblea Nacional, atacando varios persona, incluyendo 7 diputado di oposicion. Dianan despues, e fiscal nacional 49 a acusa Oliver Uribe Pinto, pero e investigacion a ser archiva.

“E unico ‘merito’ di Lugo Armas pa bira general tabata su radicalismo na favor di e regimen den e episodio ey den e Asamblea Nacional”, un oficial di e Guardia a recorda, referiendo na momento cu e coronel di e tempo aki Lugo, na 2016, abusando di su autoridad, a saca for di e instalacionnan — pushando — e diputado di Prome Husticia, Julio Borges, na kende e a bisa: “Mi ta maneha mi conflicto manera mi kier”.

Tambe, e oficial a ser denuncia pa agredi e periodista Rafael Hernandez di canal NTN24. E a slap na cara Antonieta Mendoza de Lopez mientras e tabata grita: “cera bo boca, bieuw ridiculo”, na presencia di testigonan, contra e mama di Leopoldo Lopez, lider di Boluntad Popular.

Na 2018, e a prohibi pa simannan entrada di periodistanan na e Palacio Federal y a kita camera di Jose Rivas di canal Venevision. Nicolas Maduro a condecora dje cu e Orden Cruz di e Guardia Presidencial y cu medaya di honor pa merito.

Riba 9 di augustus 2017, Office of Foreign Assets Control (OFAC) di e United States Department of the Treasury a impone sancion contra ocho funcionario di e regimen Venezolano, incluyendo coronel Lugo Armas, pa su participacion den actonan di violencia y violacion di derechonan humano .

Awor, Delcy Rodriguez, mediante Resolucion 000036 di 26 di maart 2026, firma pa e minister di Defensa Gustavo Gonzalez Lopez, a formalisa cambionan y ratificacionnan den e Guardia Nacional Bolivariano (GNB), incluyendo e promocion di Lugo Armas y reemplaso di seis di e 11 miembro di su Estado Mayor.

E siguiente generalnan ta keda den nan posicion: Roberto Alfredo Acosta Garido, Ramon Alexander Castro Pereira, Atilio Jose Peña Ruiz, Manuel Valentin Gutierez Sanchez y Hernan Dionisio Rincon Paz.