Oranjestad Investment Group (OIG) a dirigi un carta habri na Minister di Infrastructura Rene Herdé, den cual e grupo di inversionista ta expresa preocupacion tocante e ritmo cu e proceso di revitalisacion di centro di Oranjestad ta avansando. OIG ta pidi pa bolbe sinta na mesa cu e minister pa atende e obstaculonan cu, segun e grupo, ta stroba diferente inversion priva pa por sigui dilanti.

E carta ta representa e ultimo paso den un proceso cu a cuminsa cu un tono di cooperacion entre gobierno y inversionistanan, pero cu durante ultimo lunanan a cuminsa mustra señal di frustracion tocante e velocidad di implementacion.

Den e carta, OIG ta haci referencia na e recorido cu minister Herdé a haci den centro di Oranjestad hunto cu inversionistanan casi un aña pasa. E intencion di e bishita tabata pa mira e situacion di e centro di ciudad di cerca, conoce e proyectonan cu sector priva tabata preparando y papia tocante e diferente condicionnan cu mester ta presente pa revitalisacion por bira realidad.

Segun OIG, sector priva no a keda keto despues di e recorido. Inversionistanan a sigui cumpra propiedad den centro, contrata arkitecto y ingeniero y prepara diferente proyecto. Na mesun momento, suma considerable di placa a ser comprometi pa desaroyo di propiedadnan den Oranjestad.

Sinembargo, OIG ta indica den su carta cu diferente proyecto ainda no por avansa manera tabata spera. E grupo ta apunta na proceduranan cu ta tarda y na dificultad pa coordina entre diferente instancia di Gobierno como algun di e factornan cu ta afecta progreso.

Otro punto cu OIG ta trece dilanti ta contacto cu minister Herdé mes. Segun e grupo, durante ultimo periodo a bira mas dificil pa logra un reunion cu e mandatario. Pa OIG, un encuentro nobo ta necesario pa atende e problemanan concreto cu ta existi y busca solucion pa proyectonan cu ta cla of cu ta den preparacion.

E situacion actual tin su origen den e acercamento entre gobierno y inversionistanan cu a bira mas concreto na 2025. Dia 9 di october 2025, Gobierno di Aruba y Oranjestad Investors Group a firma un Memorandum of Understanding, MoU, na Fort Zoutman. E meta di e acuerdo tabata establece cooperacion entre sector publico y priva pa mehora y revitalisa Caya Grandi y centro di Oranjestad.

Prome cu firma di e acuerdo, minister Herdé, minister Geoffrey Wever y inversionistanan a haci un recorido den centro di ciudad. Durante e bishita nan a atende diferente asunto relaciona cu desaroyo di ciudad, entre otro inversion den edificio, futuro proyecto priva, infrastructura, parkeerplaats, iluminacion, mantencion, mata, limpieza, seguridad y procedura di permiso.

E idea tras di e cooperacion tabata cu gobierno y sector priva lo por coordina nan accionnan di un miho forma. Mientras inversionistanan lo sigui rehabilita y desaroya propiedadnan, gobierno lo atende e condicionnan publico y administrativo necesario pa haci e transformacion di centro posibel.

Na e momento ey gobierno tambe a anuncia un suma adicional di un miyon florin pa trabaonan relaciona cu Wilhelminastraat y Klipstraat.

E acuerdo a crea expectativa cu revitalisacion di e centro lo drenta den un fase mas concreto despues di añanan di discusion tocante necesidad pa trece mas actividad economico, residencia y bishitante back den Oranjestad.

Durante e lunanan cu a sigui, inversionistanan a sigui cu nan actividadnan den centro. OIG a indica despues cu inversionistanan local a compromete alrededor di 60 miyon florin den propiedad den centro di Oranjestad. Esaki ta inclui compra di propiedad y preparacion di proyectonan nobo of renobacion di edificionan existente.

E vision cu OIG ta promove no ta limita na tienda solamente. E grupo ta mira un centro cu diferente funcion combina cu otro. Den e modelo ey, residencia mester bolbe forma parti importante di e centro, hunto cu hotel chikito of boutique hotel, alohamento turistico, restaurant, comercio, actividad cultural y espacio publico.

E rasonamento ta cu Oranjestad no por depende solamente di actividad comercial durante ora di dia. Pa centro bira un area activo y atractivo, segun e vision di inversionistanan, mester tin hende cu ta biba, traha, come, haci compras y socialisa den e area durante diferente ora di dia y anochi.

OIG tambe a indica cu otro organisacionnan, entre nan Aruba Tourism Authority, Aruba Hotel & Tourism Association y CUA, ta comparti interes den un revitalisacion efectivo di centro.

Pero a pesar di e inversion y e cooperacion anuncia na 2025, durante 2026 a cuminsa sali mas señal cu no tur proyecto tabata avansando na e ritmo cu inversionistanan tabata spera.

Un di e puntonan cu a bin dilanti ta regulacion di planificacion espacial y e manera cu cierto tipo di desaroyo por ser permiti den centro.

Pa inversionistanan, e posibilidad pa combina diferente uzo den un solo area ta importante. Un edificio, por ehempel, por tin comercio na e piso abao di caya y apartamento, alohamento turistico of otro funcion na e pisonan di ariba.

Si regulacion of proceso administrativo no permiti suficiente flexibilidad, cierto proyecto por bira menos factibel of por keda para mientras ta busca aprobacion.

Na comienso di augustus, OIG a haci su preocupacion mas publico. E grupo a indica cu, casi un aña despues di presentacion di su strategia pa revitalisacion, diferente proyecto ainda tabata enfrenta retraso.

OIG a pidi mas claridad den comunicacion, miho coordinacion entre departamentonan di gobierno y decision mas rapido unda esaki ta posibel.

Segun e grupo, retraso prolonga tin consecuencia financiero. Cada luna cu un proyecto no por avansa por aumenta costo di construccion, financiamento y preparacion, mientras incertidumbre por afecta disposicion di inversionista pa sigui compromete capital.

Algun dia despues, OIG a bolbe enfatisa cu, den su opinion, e problema principal ya no ta falta di vision. E grupo ta considera cu tin suficiente consenso tocante direccion general cu centro mester tuma. Loke falta, segun OIG, ta pasa di planificacion y combersacion pa ehecucion.

Ta den e contexto aki cu OIG awor a manda su carta habri na Minister Herdé. E carta ta conecta directamente e expectativa cu tabatin alrededor di e acuerdo di 2025 cu e situacion cu inversionistanan ta experimenta actualmente.

Pa OIG, sector priva a cumpli cu un parti importante di e proceso door di sigui inverti, cumpra propiedad y prepara proyecto. E preocupacion ta cu no tur condicion necesario den sector publico ta move na mesun ritmo.

E grupo no ta pidi pa gobierno carga e revitalisacion completo, ni ta presenta e proceso manera un responsabilidad exclusivo di Estado. E modelo cu a ser presenta desde comienso ta uno di cooperacion publico-priva, den cual tur dos banda tin un papel importante.

Sector priva ta pone capital y desaroya propiedad, y gobierno, na su turno, tin responsabilidad pa infrastructura y espacio publico, pero tambe pa e proceso administrativo y regulatorio cu proyecto mester pasa aden.

E carta di OIG ta concentra precisamente riba e punto di encuentro entre e dos responsabilidad.

Si inversion ta cla pero permiso, coordinacion of decision ta tarda, un proyecto no por avansa. Pero na mesun momento, gobierno tin obligacion pa evalua proyecto conforme regla y interes publico. Esaki ta haci coordinacion entre e diferente instancia y inversionistanan un parti esencial di e proceso.

Desde firma di e acuerdo na october 2025, e proceso a evoluciona di un inicio marca pa optimismo y cooperacion entre Gobierno y OIG, pa un situacion actual den cual e inversionistanan ta pidi pa acelera implementacion di e plannan acorda. Durante ultimo lunanan, e grupo a pone mas enfasis riba retraso, burocracia y falta di coordinacion cu, segun OIG, ta stroba diferente proyecto. E carta habri di e siman aki ta e paso mas directo te awor, cu OIG ta dirigi su preocupacion directamente na minister Herdé y ta solicita un reunion pa busca solucion pa e obstaculonan pendiente.

Revitalisacion di centro di Oranjestad ta un tema cu pa hopi aña ta ampliamente discuti, cu diferente plan, vision y propuesta presenta pa bolbe duna centro di ciudad mas bida y actividad economico. E fase actual, sinembargo, por resulta crucial pa determina si e vision ey finalmente lo bira realidad. Cu inversionistanan cu ta indica cu tin capital y proyectonan cla pa avansa, e manera cu gobierno y sector priva logra atende e obstaculonan existente y coordina e siguiente pasonan por haci e diferencia entre un revitalisacion cu realmente ta ser concretisa, of un otro plan cu ta keda principalmente riba papel.