Ayera mediante un comunicado di prensa, Ministerio Publico a informa cu e citacion den e caso ‘New York’ a keda entrega na un sospechoso di inicialnan N.M.Q.C.d.A. Den e caso penal aki un total di cinco persona a keda condena pa malversacion, violacion di secreto profesional, abuso di funcion y soborno.

Cuatro di nan a dicidi pa acepta nan condena. Ministerio Publico tambe a dicidi pa retira su apelacion den e cuatro caso aki, loke ta nifica cu e sentencia di hues den Prome Instancia a bira irevocabel y por ser ehecuta.

Segun e comunicado, Ministerio Publico kier haci uso eficiente di e espacio limita pa trata caso cu Corte Comun di Husticia ta dispone di dje. Door cu e cuatro caso aki no mester bin dilanti mas, tin espacio pa otro casonan penal, por ehempel di violacion of homicidio, cu pa motibo di esaki e Corte Comun di Husticia por trata nan mas lihe.

Pa motibo di e espacio limita pa trata caso cu Corte Comun di Husticia ta dispone di dje, Ministerio Publico ta manda carta pa sospechosonan cu lo por bin na remarca pa apelacion, pa por sa di antemano si nan ta desea pa sigui cu nan caso den apelacion (hoger beroep).

Asina cos a bay den e caso aki tambe y a resulta cu solamente e sospechoso C.d.A. a dicidi pa no acepta su condena. P’esey e caso lo ser trata den forma di regie-zitting dilanti Corte Comun di Husticia dia 9 di februari 2026. Expectativa ta cu e tratamento den su contenido lo tuma lugar den e prome mitar di 2026. Na un regiezitting e Corte Comun di Husticia ta tuma solamente decision riba e pregunta si tin mester di investigacion adicional, OM a splica.

Secreto profesional

E caso penal ‘New York’ ta trata di corupcion den funcion publico y violacion di secreto profesional door di un agente policial y varios periodista den e periodo di januari 2021-maart 2023.

Corte den Prome Instancia a condena e agente policial na december 2023 pa malversacion, violacion di secreto profesional, abuso di funcion y soborno pa un castigo di prison di 16 luna, di cual 8 ta condicional, y un prohibicion pa eherce su funcion pa un periodo di 3 aña.

E otro personanan a keda condena na castigonan di prison y castigo di trabao comunitario na december 2024 pa corupcion y complicidad den violacion di secreto profesional.

E sospechoso C.d.A. a haya un castigo di prison di 18 luna, di cual 12 ta condicional, y un tempo di prueba di 3 aña.

Percepcion mediatico

E caso aki a nifica un periodo dificil den percepcion mediateca, mirando cu cuatro di e cinco sospechoso ta periodista. A surgi e impresion cu lo tabata trata di un atake contra libertad di prensa y di e derecho di periodista pa haci investigacion di noticia, segun OM a bisa den su comunicado.

“Sinembargo, en realidad e caso ta trata di un agente policial cu den su funcion tabatin acceso na radio di polis y na comunicacion interno di Cuerpo Policial. E tabata sa cu e comunicacion aki ta destina solamente pa polis y no tabata mag di cay den mannan robes. No obstante, el a duna e sospechoso y e otronan envolvi acceso. Nan a scucha durante un periodo di casi dos aña tur comunicacion cu tabata pasa via radio di polis,” OM a indica.

Segun hues den Prome Instancia e scuchamento aki tabata tuma luga unicamente pa beneficio personal, bentaha financiero of buscamento di sensacion. Hues a bisa cu esaki no solamente a viola privacidad di ciudadanonan di Aruba, sino tambe e confiansa cu e ciudadano por tin den Cuerpo Policial y den e forma cu polis ta trata cu informacion sensitivo di privacidad.

Na momento di dicidi e castigo pa C.d.A, hues a tene cuenta cu e hecho cu e sospechoso aki a yega di keda condena den pasado caba pa hechonan similar, cu un castigo maximo di trabao comunitario y un castigo di prison condicional. Es mas, e hechonan den e caso ‘New York’ el a comete durante su tempo di prueba mara na e castigo condicional. Hues ta considera cu esaki ta mustra cu C.d.A. no a siña di e condena anterior y a bolbe viola ley.

Durante e hoger beroep, e Corte Comun di Husticia lo evalua si e hechonan pa cual a conden’e na Corte di Prome Instancia por keda proba. Den e mesun proceso lo contesta tambe e pregunta si por papia di ‘participacion den un organisacion criminal’, y finalmente cual castigo ta adecua.

Libertad di prensa

Finalmente, Ministerio Publico tabatin un comentario tocante libertad di prensa.

“Libertad di prensa ta un derecho fundamental cu mester wordo respeta y proteha, pero e tin limitenan hopi duidelijk. E no por sirbi nunca como un licencia pa haci cosnan contra ley. Solamente den casonan excepcional, ora ta imposibel pa expone un maldad grandi sin kibra ley, lo por hustifica un apelacion riba e derecho aki. Den e caso ‘New York’, hues a wak specificamente si por papia di algo asina, y a huzga cu no tin ningun indicacion di esaki.”

Caso New York
 Manera menciona anteriormente, caso New York ta involucra agente policial, R.Vos kende a keda sentencia dia 8 di december 2023 cu 16 luna di prison, di cual 8 ta condicional, pa malversacion, violacion di secretonan di trabao, abuso di su funcion y soborno di parti di miembronan di prensa. Ademas a prohibie di eherce e trabao di polis pa e duracion di 3 aña.

Pa loke ta e cuatro periodista involucra den e caso, a acusa nan di, for di periodo di 1 di januari 2021 te cu 22 di maart 2023, conhuntamente intencionalmente a viola secretonan cual nan tabata sa cu e ambtenaar, relaciona cu su funcion, tabata obliga pa tene. Nan ta acusa di, den e periodo ya menciona, a participa den un organisacion cu tabata consisti di un y/of mas otro persona cu tabatin como meta pa comete crimen, esta, corupcion di un ambtenaar, y/of tuma y/of duna soborno y/of maluso di funcion y/of violacion di secreto di trabao.

Despues di sentencia inicial di hues den Corte di Prome Instancia, di e acusacionnan cu tabatin riba mesa, pa e acusacion di soborno tres di e sospechosonan a ser declara culpabel. Pa loke ta e acusacion di participacion den un organisacion criminal, tur cuater sospechoso a ser declara liber, pasobra corte ta haya cu no tin suficiente prueba cu nan a comete e acto ey. Y pa e acusacion di violacion di secresia oficial di un agente policial, tur cuater a ser declara culpabel.

Corte a determina cu durante un periodo di mas cu dos aña, e periodistanan aki tabatin acceso na e trafico di portofon di Cuerpo Policial di Aruba. Nan a haci e acceso aki posibel hunto cu e agente policial menciona, pa medio di un conexion digital cu nan a crea entre un portofon y e laptop di e periodistanan individual. Debi na e hecho cu hunto cu e agente policial nan a haci e acceso na e trafico di portofon posibel, mescos cu e agente policial aki, nan a viola secresia oficial.

Corte a determina cu den e mesun periodo, tres di e periodistanan a duna regalo y a haci promesa na e agente policial, pues di e manera aki nan a soborn’e

Pa loke ta e sentencia cu hues a dicta na december 2024, den e caso di periodistanan R.P.L y N.E.A.G, ambos a haya 240 ora di trabao comunitario y 12 luna di castigo di prison condicional, cu un periodo di prueba di 3 aña. E abogado a splica cu esaki kiermen cu si nan haci nan mes culpabel di algo criminal den e 3 aña aki, nan por haya condena di 12 luna di prison.

Den caso di periodista B.L.R.K, el a haya castigo di 150 ora di trabao comunitario, tres luna di prison condicional cu un periodo di prueba di 3 aña tambe. Den caso di B.L.R.K, teniendo cuenta cu e ta residencia na Hulanda, su abogado a splica cu tin areglo cu Reclassering na Hulanda cu na momento cu e castigo bira incondicional, e ora e por tuma contacto cu reclassering na Hulanda y e lo cay bao di nan guia.

Sospechoso N.M.Q.C.d.A. a haya e castigo mas pisa di tur. Door cu ta su di dos biaha envolvi den un caso similar, el a haya un castigo di 18 luna di prison di cual 12 ta condicional, loke kiermen cu e tin cu sinta minimo seis luna den prison, mirando cu e sucedido aki a pasa net dos luna prome cu su tempo di prueba relaciona cu e caso anterior a caba.

Un di e puntonan cu defensa a presenta ta cu periodistanan tin libertad di recopila noticia, y cu esaki ta inclui e informacion cu nan a haya pa medio di e portofon. Hues a splica den su sentencia cu e ta di acuerdo cu e argumento aki y a resalta cu e ta un derecho importante cu mester ser proteha y respeta.

Sin embargo, hues a subraya cu e no ta un derecho sin limite. El a splica cu ta ser limita pa derecho penal y pa normanan di cuido debido. Esaki ta significa cu periodistanan no mag di comete hechonan castigabel pa obtene informacion, y esaki ta precisamente loke a bay fout den e caso aki; e periodistanan a comete hechonan castigabel pa haya acceso na e informacion confidencial.