Ayera a tuma luga e di dos dia di tratamento di caso Tulipan, den cual ex minister plenipotenciario na Hulanda Guilfred Besaril y ex director interino di Arubahuis, Glenn Ling, ta ser acusa di malversacion di fondonan publico durante e periodo den nan funcion.

Durante e tratamento di ayera Ministerio Publico (OM) a presenta su rekisitorio y alabes a presenta su exigencia di castigo pa ambos sospechoso. Pa Besaril OM a pidi un castigo di prison di dos aña, incondicional. Adicionalmente OM a presenta un ontnemingsvordering contra Besaril pa un suma di casi 200 mil florin. Contra sospechoso Ling, OM a pidi un castigo di 12 luna di prison, di cual seis ta condicional cu un tempo di prueba di tres aña.

Durante su rekisitorio fiscal di OM a pasa riba e diferente zaakdossier y a enfatisa cu e cu e actonan cu Besaril a comete ta grave y su meta tabata pa enrikece y beneficia su mes c placa di gobierno en bes di beneficia Aruba y e organisacion di Arubahuis, y no a cumpli cu su deber di sirbi su pais di un manera integro.

Den su rekisitorio fiscal repetidamente a cuestiona con Besaril tabata gasta e placa di pais Aruba pa motibonan priva, manera por ehemplo pa paga pa recibonan di Setar di cable TV y internet na un adres priva, pa renoba y cumpra muebles pa un cas di huur na Hulanda, pa haci uso di servicio di VIP, y papa comemento na restaurant, compras na supermercado y pone gasolin pa auto durante su vakantie priva.

Fiscal a enfatisa cu Besaril no tabata sigui e proceduranan necesario pa por haci uso di entre otro, e debit card di Arubahuis, y gasta e fondonan publico di pais Aruba.

Pa loke ta trata e defensa di Besaril, su abogado Doris Canwood a hiba un defensa basta largo den cual detayadamente a trece dilanti puntonan pa purba demostra su cliente su inocencia. Entre otro a remarca cu Besaril ta di opinion cu e no a haci nada pa hacie culpabel di e delito di malversacion.

Abogado Canwood a enfatisa, pa loke ta trata e dossier di telecomunicacion, cu e minister plenipotenciario tin derecho riba comunicacion, tanto na Aruba como Hulanda mirando cu e tabata desplega su trabou na ambos pais. Ademas el a subraya cu e tempo ey no tabatin un beleid pa loke ta trata comunicacion, esaki a keda introduci na 2022.

Abogado Canwood tambe a indica, pa loke ta e renobacion y mueblacion di e cas di huur di e ex minister, cu segun CAD a indica e minister plenipotenciario tin derecho riba un cas bon muebla, y e cas di huur di Besaril no tabata bon muebla. Ademas el a indica cu no a pidi prome minister e tempo aprobacion pasobra ta pidi aprobacion di e prome minister si ta trata di un inversion grandi, cual e mueblacion di e cas di huur no a ser considera un inversion grandi.

Relaciona cu e dossier di vakantie na Aruba, abogado Canwood splica cu su cliente su estadia na Aruba a cuminsa como vakantie priva, pero despues a bira un bishita di trabou door di e bishita di Secretario di Estado Knops.

Abogado Canwood tambe a remarca cu como minister plenipotenciario Besaril tin derecho riba uso di servicio VIP na aeropuerto y cu ministernan plenipotenciario prome cu Besaril a yega di haci uso di e servicio aki y tin e posibilidad di inclui famia den e servicio gasta un of dos biaha pa aña.

Por ultimo, pa loke ta trata e uso di e debit card, cual tanto hues como fiscal di OM a enfatisa Besaril tabata haci uso di dje demasiado facil, abogado Canwood a splica cu e tempo ey no tabatin reglanan pa determina esaki, apenas na 2022 a introduci esakinan.

Pa loke ta trata sospechoso Ling, abogado Demis Ellis, a hiba un defensa basta cortico, contrario na defensa di abogado Canwood pa su cliente.

E defensa di abogado Ellis pa su cliente tabata basa riba e hecho cu Ling no tabatin ningun beneficio personal ni financiero y a enfatisa cu aunke e cliente ta reconoce cu el a cay cortico den eherce su responsabilidad, esaki no ta nifica cu e tabata complice den e actonan di Besaril.

Abogado Ellis a remarca cu no por compara e cu e no a trek Besaril na su faha, cu lag’e haci loke e tabata kier.

E abogado a cuestiona e ponencia di OM cu su cliente Ling a permiti Besaril gasta e fondonan publico sin mas, siendo cu hopi biaha el a ser confronta cu recibo y/of facturanan caminda e placa a ser gasta caba. El a subraya cu con su cliente por a yuda cu algo caminda e placa a disparce prome cu e por a pone su firma.

El a enfatisa cu e hecho cu s cliente a firma despues di e sucedido no ta nifica cu el a permiti e hecho pasa pasobra el a tuma luga prome cu e tabata sa.

Tanto abogado Ellis como su cliente, Ling, a admiti cu e ex director a cay cortico den su funcion como director y responsabel di e presupuesto di Arubahuis y ta lamenta cu e no a actua prome, cual ta e punto di salida di fiscal OM pa loke ta trata e acusacion di complice pasivo, pasobra e tabata sa cu tabatin iregularidadnan, pero no a tuma accion y a laga Besaril sigui haci y deshaci cu fondonan publico.

Na salida di corte, pers oficier Zamira Paesch a duna un declaracion tocante e caso. El a remarca cu na momento cu OM tuma decision pa hiba cierto caso dilanti, tin algun cos cu OM kier subraya. Entre otro ta cu ningun hende ta riba ley, y leynan t’ey pa cumpli cu nan.

El a subraya cu hendenan cu tin posicionnan importante of clave den comunidad, manera por ehempel ex director di Arubahuis y ex minister plenipotenciario, pero tambe otro minister of parlamentarionan, mester realisa cu nan no ta riba ley. “Na momento cu algo contra ley tuma luga, investigacion ta tuma luga y OM ta persigui esaki,” el a indica.

El a splica cu pa OM ta importante pa persigui esaki pasobra e norma den comunidad no por bira, y no mag di bira, cu cierto actonan ta ser acepta. “Ta trata di placa di pueblo, placa di belasting cu tin como destino final pa ser usa pa trabounan pa Aruba, pa un miho Aruba. E destino no por ta hamas pa propositonan priva,” el a agrega.

Paesch a enfatisa pa loke ta trata den e caso aki e rol di e ex director di Arubahuis, cu ta trata di un ex director cu activamente a haci su mes, segun OM, culpabel na malversacion y un cu pasivamente a haci su mes culpabel na malversacion.

El a sigui splica cu e articulo di malversacion door di un ambtenaar ta papia explicitamente tocante esaki unda cu e legislador kier a hacie inaceptabel cu un ambtenaar ta wak cu algo fout ta tumando luga y no ta haci nada tocante esey.

“E articulo aki no t’ey solamente pa proteha e caha di gobierno, pero tambe pa proteha e integridad di full e departamento gubernamental pasobra mester keda confia cu na momento cu pone hendenan na cierto posicionnan clave, ta hendenan honesto, hendenan integro y hendenan cu ta bay haci nan trabou “naar eer en geweten” y esey ta exactamente e esencia di e caso aki,” el a finalisa.