Corte den Prome Instancia a trata ayera e caso penal ‘Bromelia’ contra e sospechoso K.R.V. (30), ex-dirigente di Stichting Sportsubsidie Aruba (SSA). V. su mes no tabata presente den Corte, mirando cu e no ta na Aruba y no a bolbe mas tampoco pa e tratamento dilanti hues. E ta wordo acusa di estafa di SSA, malversacion di fondonan publico, labamento di placa y maluso di funcion.

Den e periodo di mei 2023 te september 2024, V. a malversa mas di Afl. 180.000. E placa aki a wordo, entre otro, pasa via cuentanan bancario di cuatro otro persona (asina yama ‘money mules’), pa finalmente yega riba cuenta di e sospechoso. Den practica esey ta significa cu e tabata paga e subsidionan na su mes. E no tabata ni duda pa falsifica e firma di e minister di Enseñansa y Deporte diferente biaha, segun un comunicado di prensa di Ministerio Publico. Banda di K.R.V. tin mas sospechoso den e investigacion aki, entre nan e money mules envolvi. Nan lo ser yama pa un Cita cu Fiscal of TOM-zitting (Transactie Openbaar Ministerie).

Ministerio Publico ta tuma V. hopi na malo loke el a haci. Atrobe e ciudadano Arubano a keda perhudica pa un dirigente cu ta usa placa di Pais Aruba pa financia su estilo di bida luhoso.

Placa destina pa engrandece deporte, a ser malusa. Cu esey V. a causa daño na integridad di gobierno, di SSA y otro stichtingnan gubernamental.

Aunke V. a paga SSA back gran parti di e placa cu a somenta, Ministerio Publico ta haya cu un medida di compensacion di daño contra dje ta na su lugar, pa asina e paga e suma cu a keda habri: Afl. 7.720,63.

Ministerio Publico a exigi un castigo di prison di 30 luna contra dje. Tambe Ministerio Publico ta pidi pa V. perde e derecho pa traha como ambtenaar pa un periodo di siete aña. Ministerio Publico ta ademas exigi encarcelacion inmediato di V., pa motibo cu ta calcula cu e riesgo ta existi cu e lo por trata di evita ehecucion di e castigo.

Hues a suspende tratamento di e caso te 27 di februari venidero. Riba e fecha ey ta bay tuma e caso di nobo y cera. Posiblemente hues lo dicta sentencia mes dia tambe.

Audiencia den ausencia

Manera menciona den e comunicado di Ministerio Publico, e sospechoso no tabata presente den corte pa e audiencia pasobra e no ta na Aruba.

November ultimo a circula e noticia cu V. tabata kedando e tempo ey na Slovakia, na un adres desonoci pa autoridadnan di Aruba. Esaki a sali afo durante un audiencia preliminar di e caso diabierna ultimo, segun a keda reporta den medionan di comunicacion local.

E ausencia aki a crea hopi conmocion na november durante un audiencia den corte, durante cual abogado di e sospechoso, Vito Carlo, a indica cu e sospechoso tabata bibando den exterior, specificamente na Slovakia.

Esaki a crea algun incertidumbre, pa motibo cu segun ley, mester entrega e dagvaarding na e sospechoso den su propio man cu algun dia di anticipacion. Door cu su adres no ta conoci, a pesar cu funcionarionan di ley di Aruba a haci nan esfuerso pa cumpli cu e rekisito aki, no a logra. Medionan local a reporta cu hasta a pone e documento pafo di corte ya cu no a keda otro opcion.

Defensa di K.V. a purba di argumenta cu e citacion no tabata valido pasobra e lo a cay fuera di e limite legal di tempo, pero e hues a rechasa e argumento aki. Segun hues, ya cu e sospechoso no a duna su adres, e manera publico con a post na Aruba tabata legal y dentro di e limite di tempo.

Tampoco Landsrecherche por a interoga casa di e sospechoso, loke a stroba nan investigacion.

Abogado Carlo a indica cu e sospechoso no tin ningun plan di bolbe Aruba, a pesar cu segun Hues, tabata spera cu e sospechoso lo a presenta fisicamente pa e tratamento di e caso ayera. Sinembargo, for di november caba a informa cu den su ausencia, tratamento di e caso lo bay door.

Caso Bromelia

Tabata na october 2024 cu Stichting Sportsubsidie Aruba (SSA) a informa cu a duna retiro inmediato na director K.V., pa motibo di iregularidadnan.

Stichting Sportsubsidie Aruba (SSA) a indica cu nan a entrega un keho dia 25 di september 2024 na autoridadnan di Landsrecherche pa iregularidadnan detecta dentro di e fundacion.

Mediante un comunicado, nan tambe a informa cu “e iregularidadnan detecta ta regarda transaccionnan financiero sin cu e obhetivonan deportivo planea a wordo realisa. SSA ta laga e proceso aki den man di e autoridadnan hudicial corespondiente pa haci nan trabao.”

Tambe tabatin controversia pasobra e director di SSA tabata un persona cercano na ex-prome minister Evelyn Wever-Croes (MEP). Wever-Croes e tempo aya a señala cu “berdad ta trata di un persona cu ta toca na mi famia, pero no ta pa e motibo ey cu el a wordo encarga cu e puesto, sino tur su preparacion financiero na universidad y despues den deporte. A pensa cu e ta e persona cu por a wordo confia cu e posicion, awor tin sospecho di malversacion.”

Controversia ocasiona pa caso Bromelia eventualmente a resulta den retiro di Endy Croes como minister di Deporte na 2024, despues cu Parlamento a vota pa aproba un mocion di desconfiansa contra e minister, despues di un sesion largo. Parlamentarionan a considera cu e no a maneha e informacion den e caso aki di un manera adecuado y no tabata satisfecho con e situacion a desaroya.

Otro sospechoso

Durante e audiencia na november, y manera OM a informa den su comunicado ayera, tin mas persona sospechoso den caso Bromelia. Esaki ademas di e tres persona cu a keda identifica na october 2024. Minister di Deporte e tempo aya, Endy Croes (MEP), a bisa na october 2024 cu tabatin tres persona cu lo tabata ricibiendo subsidio “pero no tabata organisa pa e proposito cu nan ta manda un carta aden.”

Augustus ultimo, actual minister di Deporte, Gerlien Croes (Futuro) a informa cu a suspende presidente di SSA, H.R., pa motibo cu e ta sospechoso den investigacion di caso Bromelia. H.R. a asumi e funcion di director despues di suspension di K.V.

“Como minister encarga mi a wordo informa (…) riba un investigacion penal tumando luga den Stichting Sport Subidie Aruba unda cu e Presidente di e Raad actual ta un sospechoso,” minister Gerlien Croes a publica riba Facebook na augustus. “E persona concerni ta alabes un trahador di sector publico di un departamento cu ta resorta bou di mi ministerio, consecuentemente, segun ley ta prescribi mi a emiti por escrito un suspension temporal di e persona aki su trabou, pendiente investigacion.”

Segun reportahenan den prensa local, tabata H.R. mes a entrega e keho formal contra K.V., pero despues a resulta di ta sospechoso den e mesun caso.