Recientemente, incidentenan involucrando cacho cu ta morde hende of ataca otro bestia a bolbe hala hopi atencion den comunidad local. Pa cu esaki, Ministerio Publico (OM) a reacciona den un comunicado di prensa, recordando tocante e maneho cu ta na vigor desde januari 2023, unda OM ta persigui tur doño di cacho involucra den caso di mordida.
“Ministerio Publico ta persigui en principio tur doño di cacho despues di un incidente di mordida, unabes Polis of otro cuerpo di investigacion traha proces-verbaal,” OM a bisa den e comunicado.
E maneho aki ta valido desde prome di januari 2023 y ta wordo aplica independientemente di si e victima ta un persona of un bestia (su doño). OM a splica cu esaki ta nifica cu e victima por ta un hende of un animal, pero ora ta trata di un animal, ta su doño ta keda denomina como e victima, ya cu e animal no ta un rechtspersoon, es decir, no tin status huridico. Pues daño na un animal ta daño na su doño, segun OM.
Cu e maneho aki Ministerio Publico ta busca pa enfatisa e responsabilidad di doñonan di cacho.
Na mes momento, Ministerio Publico ta traha pa baha e cantidad di incidente di mordida y pa fortifica seguridad di ciudadanonan y di bestianan en general.
