Riba su rednan social, Ombudsman di Aruba, Jurima Bryson a comparti informacion tocante su bishita na Bonaire, invita pa Ombudsman Nacional, mr. Reinier van Zutphen. Durante e bishita, Ombudsman Bryson por a compaña team di Ombudsman Van Zutphen durante nan investigacion.

“Nos ta den ultimo fase pa habri Bureau Ombudsman Aruba,” Bryson a splica riba su pagina di Facebook. “Nos profesionalnan ta den training/ begeleiding y den cuadro di palabracionnan haci na e ultimo koninkrijksoverleg encuanto esaki, Nationale Ombudsman a invita mi pa compañ’e na e bishita cu su persona hunto cu su team a haci na Boneiro, pa asina tuma nota di diferente keho cu tin eynan di ciudadanonan.”

Mr. Reinier van Zutphen a duna un conferencia di prensa encuanto esaki y tambe a publica un rapport extenso.

“Mi a siña masha hopi mes y tabata pa mi un experiencia unico pa wak di cerca con mi colega ta trata e kehonan aki,” Sra. Bryson a comenta.

Ademas, el a conta cu e kehonan cu a trata na Boneiro tabata tocante e topiconan di deramento di desperdicio (afvalstortplaats), erfpacht y huurgront, natuurvergunning, transporte publico, y cobamento (afgravingen).

 

Sra. Byrson a manda un mensahe na pueblo Boneriano: “Mi dushi hendenan di Boneiro – como Ombudsman di Aruba – mi ta sinti mi semper na cas cerca boso y mi ta uni mi mes na locual mi colega Nationale Ombudsman a bisa tanto den su conferencia di prensa como den su rapport.”

“Un crisis ambiental”

Esaki ta e palabranan cu Ombudsman Nacional di Hulanda Caribense, mr. Reinier van Zutphen a usa den su conferencia di prensa na Boneiro.

Den su rapport, Van Zutphen a bisa cu OLB (Gobierno di Bonaire) a actua den violacion di e rekisito pa accion rapido y e rekisito pa duna bon informacion. Den e casonan menciona – deramento di desperdicio (afvalstortplaats), erfpacht y huurgront, natuurvergunning, transporte publico, y cobamento (afgravingen) – ta parce cu gobierno di Bonaire no a actua suficiente rapido y decisivamente. Den tur nuebe caso cu Ombudsman a atende, gobierno no a tene su ciudadanonan informa adecuadamente tocante e procesamento di nan aplicacion of solicitud, no a duna claridad ora a solicita esaki, y no a responde na keho na tempo of di forma adecua. Servicio di delivery di gobierno ta laga di desea, y no a tuma e incertidumbre y malcontento di ciudadanonan suficientemente na serio. Segun Ombudsman, esaki no ta conducta adecuado.

Noticiero di Reino, BES-reporter a reporta tocante e comentarionan di Van Zutphen den un conferencia di prensa. Papiando tocante cobamento ilegal, el a bisa cu ta yena e buraconan bandona cu desperdicio peligroso, causando daño mayor na naturalesa y ambiente. Mas preocupante ta e situacion di e dump na Lagun. Van Zutphen a bishita e sitio pa su mes y a mira cabrito y burico ta cana den e desperdicio y come di dje. Segun e Ombudsman, esaki ta un menasa directo pa salubridad publico y seguridad di cuminda, pasobra e desperdicio tin toxina cu por drenta cadena di cuminda via e animalnan. El a papia di “un crisis cu mester atende inmediatamente” y a haci un yamado pa stop inmediatamente e dump.

Van Zutphen tabata visiblemente conmovi pa e storianan y e condicionnan cu el a encontra na e dump. “Mi a keda sin palabra ora mi a mira loke ta pasando na Lagun. Hende ta hala rosea cu substancianan toxico eynan. Esaki no ta djis un problema ambiental, e ta un atake contra salud publico. E no por continua asina.”

E falta di permiso di naturalesa tambe a crea situacionnan dificil. Ranger y guia cu ta traha den naturalesa no por traha legalmente, pasobra no tin comite cu ta procesa nan aplicacionnan, loke ta nifica cu sea nan ta keda sin trabao of nan mester traha sin permiso, y riesga haya sancion.

Finalmente, Van Zutphen a bolbe punta riba pobresa y desigualdad na Bonaire, unda aproximadamente trinta porciento di e poblacion ainda ta biba bao linea di pobresa. Segun e Ombudsman, e minimo social ta demasiado abao, haciendo casi imposible pa famia y mayornan soltero pone pan riba mesa. E Ombudsman a enfatisa cu tin desigualdad compara cu Hulanda Europeo.

“Manera mi a anuncia siman pasa den cuadro di intercambio di experiencia pero tambe problemanan comun riba e islanan Ombudsmannan di Reino ta traha hunto riba diferente area,” Ombudsman di Aruba, Jurima Bryson a skirbi. “Riba invitacion di Nationale Ombudsman mi a bay Boniere pa acompañ’e den su investigacion. Pa loke ta trata e problema di “afvalstortplaats” mi persona tabatin e oportunidad di wak e proceso di cerca y combersa cu stakeholders y personanan cu ta biba den area. Nationale Ombudsman a duna di conoce cu trata aki di crisis ambiental cu mester atencion di inmediato. Mi ta uni mi mes na e palabranan aki.”