Ombudsman di Aruba, mr. Sra. Jurima Bryson ta señala cu hopi biaha ley, decision y maneho no ta online of ta dificil pa haya online. Ademas, tin biaha locual ta publica online no ta actualisa.
Esaki ta haci dificil pa e ciudadano sa kico su derechonan ta y cua obligacionnan e organonan administrativo y instancianan tin segun ley. Esaki ta resulta den limitacion huridico di un ciudadano.
Ombudsman ta un institucion di keho di segundo liña, esey ta nifica cu prome cu acerca Ombudsman mester a trata di resolve e keho cu e instancia mes prome. Si en caso e manera cu e keho aki mester ser entrega ta den un ley of un maneho, y esaki no ta accesibel, e ciudadano por ser perhudica. Pa Ombudsman ta importante cu e ciudadano por haya di antemano e instancia (gubernamental) corecto caminda e por entrega un keho.
E problema aki tin consecuencia tanto pa e ciudadano como e organonan administrativo. Ciudadanonan no semper sa cua reglanan ta valido pa nan. Tambe, e ora por ta asina cu organonan administrativo no ta wordo bon controla si nan ta cumpli cu e reglanan.
Un estado di derecho cu ta funciona bon ta rekeri pa tur ley, regulacion y documentonan di maneho ta facil pa haya y mester por consulta esakinan sin costo.
Den cuadro di e situacion aki, Ombudsman a manda un carta di preocupacion (zorgenbrief) pa Minister di Asunto General, sr. Mike Eman dia 3 di februari 2026.
Como un institucion independiente y imparcial, Ombudsman a presenta varios conseho pa haci ley, regulacion y documentonan di maneho miho disponibel digitalmente. Esakinan mester ta completamente disponibel online, facil pa haña y mester wordo actualisa regularmente.
Falta di accesibilidad
Den e carta, Ombudsman ta menciona cu durante e trabao preparatorio di Bureau Ombudsman, el a nota cu decreto, ordenansa nacional y regla di maneho ta dificil pa haya digitalmente, of no ta publica na tempo.
“Esaki ta mina certidumbre legal,” Ombudsman a skirbi. “Ora tur hende ta spera di conoce ley, e principio aki por tin significado solamente si legislacion, rgulacion y reglanan di maneho relaciona por ser consulta di un manera accesible, comprensivo y actualisa.”
Ombudsman ta nota cu den practica, esaki no ta e caso: “mientras un cantidad di ordenansa nacional y decision ta disponible (digitalmente), otronan ta disponible apenas parcialmente of no ta disponible digitalmente en absoluto.”
Ademas, “fuentenan existente hopi biaha ta dificil pa busca of no ta actualisa.”
Falta di conscientisacion
Segun Ombudsman, pa motibo di e accesibilidad digital limita di e legislacion, regla y maneho, hopi biaha ciudadanonan no ta na haltura di e derechonan cu nan tin vis-a-vis autoridadnan di gobierno of institucionnan. “Como resultado, ciudadanonan no semper sa ki poder cuerponan administrativo of institucionnan tin, ni na ki grado nan ta legalmente obliga di tin un procedura di keho – cu tur e posible consecuencia cu esaki por tin.”
Den e carta, ta reitera cu Ombudsman ta un institucion di keho di segundo linea, loke ta nifica cu e ciudadano mester por entrega nan keho na e institucion relevante prome. Pero ta nota cu e limitacion den e accesibilidad y disponibilidad di ordenansa nacional, decision y maneho ta hacie dificil pa ciudadanonan por sa na kico nan tin derecho, y asina ta obstaculisa acceso na husticia y na un maneho efectivo di nan keho.
“Legislacion, regulacion y maneho mester ta structura claramente y accesible libremente pa tur hende.”
Violacion di standard di conducta adecua
Den su carta, Ombudsman ta nota cu “e falta di acceso digital na regulacion, legislacion y maneho ta viola varios standard di conducta adecua, incluyendo pero no limita na transparencia, accesibilidad, certidumbre legal y ‘fair play’.
“Pa e motibo aki, mi ta considera urgentemente deseable pa mehora e accesibilidad digital di legislacion, regulacion y maneho a corto plaso.”
Recomendacion
“Den contexto di bon gobernacion y e promocion di conducta debido den gobierno,” Ombudsman ta haci diferente recomendacion na prome minister Eman, “bao ken ta cay e responsabilidad di Departamento di Legislacion y Asunto Legal (DWJZ) y Bureau di Informacion Publico (BUVO).”
- Considera mas digitalisacion di tur ley, decision y reglanan di maneho vigente pa asina haci nan disponible pa publico di un manera central, accesible y ‘user-friendly’.
- Explora e posibilidad di desaroya of reforsa un base di dato online oficial den cual por consulta documentonan di legislacion, regulacion y maneho sin costo, preferiblemente ekipa cu funcionnan di buskeda avansa y un bista di amiendanan historico.
- Considera tuma medida structural pa sigura e actualidad y confiabilidad di e base di dato mediante actualisacion regular y control di calidad.
- Curasha cuerponan administrativo y institucionnan di gobierno pa publica informacion completo y actualisa riba nan website respectivo tocante e legislacion, regulacion y reglanan di maneho cu ta aplica na nan.
- Ademas, considera desaroya iniciativa cu meta pa aumenta conscientisacion legal entre ciudadanonan, incluyendo provee informacion cla tocante nan derechonan y e proceduranan disponible pa entrega keho.
Keda na altura di tur desaroyo
Bureau Ombudsman ta mantene comunidad informa via e siguiente canalnan di comunicacion:
Facebook: Ombudsman Aruba
Instagram: ombudsmanaruba
LinkedIn: Ombudsman Aruba
