(AP) – Organisacion Mundial di Salud (WHO) riba diaranson a promove e prome vacuna na mundo contra malaria y a bisa cu mester dun’e na tur mucha den Africa, como speransa cu lo yuda e esfuersonan pa combati e brote di e malesa parasitico.

Director General di WHO, Tedros Adhanom Ghebreyesus a yama esaki un “momento historico” despues di un reunion unda cu 2 experto di salud di e Agencia di Salud di ONU a recomenda e paso.

“Awe su recomendacion ta ofrece un speransa pa e continente, cual ta carga e presion mas pisa di e malesa. Y nos ta premira cu hopi mas mucha Africano lo keda protegi contra malaria y por crece bira adultonan saludabel,” Dr. Matshidiso Moti a bisa, ken ta director di WHO na Africa.

Organisacion Mundial di Salud a bisa cu e decision ta basa mas tanto riba e resultadonan di un estudio cu ta tumando luga na Ghana, Kenya y Malawi, cu a supervisa mas di 800,000 mucha cu a ricibi e vacuna desde aña 2019.

E vacuna, conoci como Mosquirix tabata desaroya pa GlaxoSmithKline na aña 1987. Mientras cu e ta e prome pa ricibi autorisacion, e ta enfrenta algun desafio: E ta solamente 30% efectivo, y ta rekeri te hasta 4 dosis, y su proteccion ta baha despues di algun luna.

Asina mes, cientificonan ta bisa cu e vacuna por tin un gran impacto contra malaria den Africa, unda ta sucede e mayoria di e mas di 200 miyon caso y 400,000 morto pa aña.

“Esaki ta un gran stap dilanti,” Julian Rayner a bisa, director di Cambridge Institue For Medical Research, ken no a forma parti di e decision tuma pa Organisacion Mundial di Salud. “E ta un vacuna cu no ta perfecto, pero toch e lo stop miles y miles di muchanan su fayecimento.”

Rayner a bisa cu e vacuna su impacto riba e brote di e malesa causa pa pica di sangura, te ainda no ta cla, pero si a señala na esunnan desaroya pa coronavirus como un ehempel cu ta duna speransa y motivacion.

“E ultimo dos añanan aki a duna nos un comprension hopi general di con importante vacunanan ta pa salba bida y reduci hospitalisacion, aunke nan no ta directamente reduci e infeccion of casonan nobo.”

Dr. Alejandro Cavioto, cabesante di e grupo di vacuna di Organisacion Mundial di Salud cu a haci e reconemdacion, a bisa cu disena un vacuna contra malaria tabata particularmente dificil, pa motibo cu e ta un malesa parasitico cu ta plama pa medio di sangura.

“Nos ta confronta cu organismonan extraordinariamente compleho,” el a declara. “Nos no ta den rango di un vacuna hopi eficaz, pero loke nos tin ta un vacuna cu por ser usa y cu ta sigur.”

Organisacion Mundial di Salud a bisa cu e efectonan secundario ta poco comun, pero tin biaha a inclui kentura, cual por resulta den ataca temporal.

Sian Clarke, Co-Director di e Malaria Centre na e London School of Hygiene and Tropical Medicine, a bisa cu e vacuna ta un adicion hopi util na e otro hermentnan contra e malesa, cu por a gasta tur nan utilidad despues di decada largo di uso, manera e netnan di cama y insecticida.

“Den algun pais unda cu e ta yega na temperaturanan hopi halto di calor, muchanan ta drumi pafo unda cu nan no por ta protegi pa e net di e cama,” Clarke a bisa. “Kiermen obivamente si nan lo a ricibi un vacuna, nan lo ta protegi paden y pafo tambe.”

Den añanan reciente, a haci tiki progreso den contra malaria.

“Si nos ta bay baha e presion di e malesa awo, nos mester algo mas,” el a splica.

Azra Ghani, cabesante di malesanan infeccioso na Imperial College London, a bisa cu e y su coleganan ta calcula cu si duna e vacuna contra malaria na muchanan den Africa, e por resulta den un reduccion di 30% en general, cu mas di 8 miyon caso menos, y por lo menos 40,000 menos morto pa aña.

“Pa hendenan cu no ta biba den paisnan unda cu tin un abundancia di malaria, un reduccion di 30% no ta zona manera hopi, pero pa e personanan cu si ta biba den e areanan aki, malaria ta un di nan preocupacionnan mas halto,” Ghani a declara.

“Un reduccion di 30% lo salba hopi bida y l salba hopi mama di tin cu hiba muchanan na centronan di salud y abruma nan sistema di salud.”

E guia di Organisacion Mundial di Salud ta spera di ta un “prome paso” pa traha mas vacuna di malaria cu ta hopi miho den calidad y efectividad.

Esfuersonan pa produci un vacuna di malaria por ricibi un apoyo di e tecnolociga di mRNA usa pa traha dos di e vacunanan mas exitoso contra COVID-19, esun di Pfizer-BioNTech y Moderna.

“Nos a mira nivelnan hopi mas halto di e vacunanan cu e tecnologia mRNA, y nan por ta adapta hopi lihe,” Ghani a bisa, notando cu BioNTech a bisa recientemente cu nan lo cuminsa explora un vacuna contra malaria. “E ta imposibel pa bisa con esaki lo por afecta un vacuna contra malaria, pero nos definitivamente mester opcion nobo pa por combati esaki.”