(El Tiempo) – Organisacion di Nacionnan Uni (ONU) a condena e ‘uso excesivo di forsa’ na Colombia contra e manifestacionnan contrario na un reforma fiscal, cu a laga por lo menos 19 morto.

“Nos ta profundamente alarma pa varios acontecimento cu a sosode na ciudad di Cali na Colombia diamars anochi, ora polis a tira contra e manifestantenan cu tabata protesta contra reforma tributario, matando y heridando varios persona, segun informacion ricibi”, Marta Hurtado, portavoz di Oficina di Halto Comisionado di Nacionnan Uni pa Derechonan Humano a declara desde Ginebra.

Hurtado ademas a haci un yamada na calma pa via cu awe tin otro jornada di manifestacionnan.

“Nos oficina na Colombia ta trahando pa verifica e number exacto di victimanan y establece circunstancianan di e teribel incidentenan aki na Cali”, Hurtado a bisa.

E portavoz a agrega cu “defensornan di derechonan humano tambe a informa cu nan a wordo acosa y menasa”.

“Debi na e situacion extremadamente tenso, cu soldaatnan y polis desplega pa vigila e protesta nos ta haci un yamada na calma”, Hurtado a declara.

“Nos ta recorda pa autoridadnan di Estado nan responsabilidad di protege derechonan humano, incluyendo derecho na bida y siguridad personal, y di facilita e ehercicio di derecho na libertad di reunion pacifico”, e protavoz a agrega.

Hurtado a conclui cu “armanan di candela lo por utilisa solamente como ultimo recurso di un menasa di morto of di lesion grave”.

Di su parti, Union Europeo a condena e violencia y uso ‘desproporcional’ di forsa contra manifestacionnan na Colombia y a considera pa contene si e situacion lo bira mas dificil, ayera diamars e portavoz di servicio diplomatico di institucion a bisa.

“Nos ta compaña di cerca y nos ta condena e actonan di violencia”, e portavoz Peter Stano a bisa y tambe a agrega cu “ta realmente un prioridad contene e ola di violencia y evita uso desproporcional di forsa” na Colombia na unda e represion pa manifestantenan contra un reforma fiscal a laga por lo menos 19 morto.

Den total, 18 civil y un polis a muri desde comienso di protestanan contra reforma fiscal dia 28 di april, segun un balans di Defensor di Pueblo.

 

LEAVE A REPLY

Please enter your comment!
Please enter your name here