Operacion calamidad di derame azeta a baha di intensivo pa pasivo

Rampenbureau ta informa Bon Dia cu operacion di haci limpiesa na costanan relaciona cu calamidad di derame di azeta, a baha di intensivo pa pasivo.

Esaki pasobra riba e prome tres dianan 50% tabata cubri y awor aki e ta na 3%,  cual ta haci segun e midimento aki cu no ta necesario pa bin cu mas cu dies hende mas na sitionan afecta pa haci limpiesa. Menasa pa salud di hende no ta existi mas pero e accionnan ta continua diariamente, e departamento ta laga sa.

Hefe suplente na Ramenbureau Rino Hermans ta conta nos cu pa siguiente seis siman nan ta bay mantene un limpiesa di ‘monitor’, te cu 20 di juli. Esaki ta encera cu tur mainta scoutnan ta sali pa wak si tin tarballs riba beach, e ora ta bin cu e ploegnan pa haci limpi. Sr. Hermans: “E no ta mes intensivo cu e prome siman pero si tur dia e ta bay wordo haci limpi. E orario no ta poni pasobra nos a baha caba e operacion di intensivo pa pasivo. ”

Ayera Directie Natuur en Milieu a duna Rampenbureau su analisis di Parke Arikok. “Den operational team’ pa salud di hende, nos a bisa pa mantene e beachnan mas afecta un tiki cera pa uzo te ora nos haya un miho bista. Ora cu nos tin e full limpi, DNM ta duna nos e greenlight pa nos bisa Parke tuma e operacional full over di Parke.” Manera cu Bon Dia Aruba a publica algun dia pasa den nos corant y riba pagina di Facebook Bon Dia 24, tin mas o menos cuater pa cinco area contamina segun Parke Arikok a constata. Varios area manera Fontein na Boca Prins ta totalmente contamina cu crudo cu ta te den e santo y piedranan.

Registra boluntario via Arikok
For di dia un Rampenbureau ta enfatisa cu boluntarionan mester pasa via Parke Arikok pa registra pa evita cu hende ‘cross contaminate’e resto di e area of otro areanan. Ora di meld na Parke, bo ta haya instruccion na kico pa haci anto unda ta pone e saconan cu DOW ta bin busca esaki.  “Peligroso acuut e no ta pasobra e ta na fase 3 caba (tarballs).  Nos no ta nenga ningun hende di haci trabaonan boluntario pero preferiblemente structura,” sr. Hermans ta comenta. E number di telefon atrobe pa haci esaki ta 585-1234.