Un operacion di stoma por afecta un pashent psicologicamente. Dokter specialista Alex Ponson a splica tocante e operacion y ki efecto e por tin riba un persona su mentalidad.

Ponson ta bisa cu ta berdad cu operacion di stoma por afecta un persona psicologicamente. E ta duna di conoce cu por mira esaki for di estudio cu ta haci rond di mundo. Un ehempel cu el a menciona ta alcohol por ta un problema, tin varios teoria riba esaki.

Segun Ponson ta bisa cu tur su pashent cu ta haci operacion (of cu ta bay opera) pa no bebe alcohol, pa motibo cu despues di operacion e sistema di e persona ta cambia con e ta traha. “E sanger ta absorbe e alcohol mas lihe, e ‘rush’ cu e pashent por haya despues di operacion di stoma (gastric bypass) ta pa cierto hende miho compara con e tabata prome. Pero manera e rush di e alcohol ta bin lihe, despues e ta baha atrobe.”

Con e efecto di alcohol ta traha riba e pashent cu a opera di stoma? Segun e ta splica ora cu tur hende bebe alcohol, esaki tin efecto. E pashent ta busca e sensasion ora nan bebe alcohol. “E rush sinti ey ta diferente ora bo ta haci operacion di stoma; e ta compara cu ban bisa en bes di bebe 3 glas di biña, ya caba cu un glas ta compara cu 5 glas, mesora nan ta gusta e sinti ey. E high di alcohol.”

Sinembargo e sentimento ey ‘ta baha lihe bek’. Si un persona cu a yega di opera bay bek cerca nan y acepta cu tin un problema di alcohol, e ora Ponson ta bisa cu nan ta purba di busca ayudo pa nan.

Ponson ta bisa cu esey ta un motibo cu cierto persona por bira adicto na alcohol, y cu despues esaki por causa problema mental. “Ta preferibel pa despues di operacion keda leu y evita. Ora ta un persona cu ta bebe diariamente, kier mas ora no ta bebiendo.”

Segun Ponson tin un teoria psicologico,cu un persona cu sobrepeso lo por ta adicto na cuminda. “Si e persona no por come mas, e ta bay busca otro adiccion.” Ponson no a yega di mira algo asina pasa, pero e hende cu el a mira desaroya un problema cu alcohol no ta un porcentahe grandi.

El a bisa cu tin yudansa pa personanan cu problema asina, pero tin cu paga p’e. Esaki ta haci cu nan ta prefera di no paga. E ta remarca cu esaki ta e problema riba cual mester haci evaluacion, pa wak kico por haci pa traha un team pa asina por bin cu ayudo mas facilmente.

Bon Dia Aruba a puntra Ponson tocante un hoben cu di su mes a dicidi di baha peso sin operacion, pero e no ta wak su mes manera un persona flaco. Ponson ta contesta cu cada persona tin esey di nan mes un poco, ‘zelf build no ta cuadra cu realidad’.

“Nos tur tin den cabes con ami ta mustra, pero pa mi ora mi wak den spiel, esey ta ami; pero den mi mente mi zelfbeeld ta otro cu realidad”, asina Ponson ta splica. E ta bisa cu un factor di esaki ta ora pone un meta cu un persona kier baha tanto kilo, pero na final no ta alcansa nan meta.

E ta conseha hende cu kier baha peso pa no fiha nan mes riba un peso si nan sa cu no ta bay haal e peso cu nan kier na final. “Bo curpa mes ta busca un balans y un meta, cu tempo bo ta mira cu lo logra. Pero den e parti mental, un psicologo cu experiencia por duna yudansa cu mester.”

Sinembargo Ponson ta remarca cu tin henter un programa ora un persona yega cu problema di sobrepeso. E ta continua splica cu ta purba di dun’e e programa. “Nos ta haci lo posibel cu e recurso cu nos tin aki na Aruba, seguro medico aki no ta cubri cu ayudo psicologico, pues nos no por haci test pa motibo di esaki.”

El a comparti cu pashent ta haya un charla unda nan ta haya henter e informacion. Sinembargo, e ta bisa cu tin asina ‘hopi pashent’ y e informacion cu ta ofrece ta keda na final responsabilidad di e persona mes. “No kere cu operacion ta bay soluciona tur e problema, pasobra e ta solamente un yudansa. Tur esey nos ta splica nan.”