Cuidou cu Aruba bira un Puerto Rico na scala miniatura

Hopi biaha ora papia tocante condicion historico, cultural y politico di nos isla chikito, Aruba, tin custumber di ignora henter nos contexto geopolitico. Cu excepcion di e bay-bin entre caos politico of bonanza petrolero na Venezuela, ta parce cu nos no kier imagina e resto di area caminda nos pida rif y calichi ta, entre Sur America y Caribe. 

Tin un tendencia fantasioso di papia tocante Aruba comosifuera e ta constitui di un continente of mundo riba su mes. E mentalidad bruha aki hopi biaha ta manifesta su mes bisti den un disfraz patriotico, lora den bandera, comosifuera nos ta puntra: Kico en realidad e region aki por siña nos? Pakico compara nos mes cu pais mas pober y desdichoso di entorno? Semehante pensamento tragicomico ta yen di ironia. Aruba no ta tribi di wak den spiel, e spiel cu ta nos propio region. Mientras mas nos ta evita dialoga cu otro sociedad tropical tocante con pa soluciona problema contemporaneo na nivel regional, mas dependiente nos lo bira di e matriz di Hulanda y e otro paisnan di Noord-Atlantico, pa resolve cada problema. Tanten cu nos cera nos mes y keda bira lomba, rechasando intercambio cu cultura pariente y bisiña, mas mester importa experticio realmente aheno for di norte global, na unda cada bes tin menos pasenshi pa asunto di ex-colonia.

Varios comentarista local a yega di bisa cu Aruba lo ta miho para den un constelacion manera e islanan BES, sin examina bon e desigualdad cu a surgi na Boneiro. E activista anti-corupcion Arubiano, Armand Hessels por ehempel, di e NGO “Deugdelijk Bestuur Aruba”, ta un idealista semehante cu tin biaha ta parce incapaz di coregi un hipotesis tocante un solucion facil pa corupcion endemico. Otro locutor local a triminti di boga pa scrap autonomia henteramente, keriendo cu e comitenan di experto y tecnocrata di Hulanda y Union Europeo tin e antidoto contra corupcion y otro problema tropical. Pero e misioneronan moderno aki, maske nan ta declama discurso di “modernisacion” y “innovacion”, hopi biaha ta usa e hermentnan conservativo: metemento, prestamo cu interes halto, predicashi conveniente y moralista di figura manera ex-funcionario y ex-militar Raymond Knops (un di esunnan cu a introduci e structura COHO) y su herederonan politico den Gobierno Hulandes nobo y den Union Europeo.

E reformistanan aki ta pidi algun revision necesario. Ainda tin ley na Aruba cu antiguamente West-Indische Compagnie a traha pa, por ehempel, protege privilegio y posicion di funcionario colonial.

Sinembargo, tambe ta implementa varios condicion di prestamo cu por ta hostil pa autonomia y loke por trece situacion absurdo cune (manera ausencia di luz di trafico na henter Aruba, otro medida “spaardo”).

Generalmente e clase experto ta recomenda remedi di austeridad economico: awa di maraviya ta yobe den forma di aplicacion di un teoria economico neoliberal, loke a genera instabilidad na gran parti di mundo pa mas cu trinta aña. Nan kier wak reduccion radical den sector publico na pais relativamente nobo, pais postcolonial cu ainda tabatin necesidad di crece. E formula di “medida di austeridad” ni sikiera a traha na Europa, na unda Mark Rutte y su coleganan a sembra caos social habriendo caminda p’e demagogia di Wilders y pa e militarisacion nobo.

Kico nos por siña observando un pais cercano manera Puerto Rico? Aruba y Puerto Rico tin hopi semehansa geografico, cultural y hasta historico. Maske e isla mas grandi ta padece di problema mas drastico cu Aruba, ambos pais ta sufri di deficit democratico y ta encera un identidad compleho y mescla. Encuanto finanza, tambe ta existi e version “boricua” di CAft y RAft. Ademas tur dos isla tin frontera maritimo cu Venezuela.

Maske e isla Puerto Rico ta cay bou bandera Mericano, nan lenga vernacula no ta Ingles. Banda di Spaño, ta basta comun pa scucha Spanglish, un mescla creativo di Spaño cu Ingles, papia na cada skina di San Juan. E Portoriqueñonan ta sinti cu nan tin mayor privilegio cu otro pais di Latino America y Caribe, danki na nan paspoort luhoso, di un pais rico cu a reemplasa Spaña como conkistado di nan baranca.

Tambe ambos isla ta habita un limbo di confusion encuanto nan status politico. Puerto Rico ta un caso grave pasobra e no ta reconoci como otro Estado di Merca, pero tampoco e no tin autonomia. Puerto Rico no tin e mesun derechonan cu un Estado di Merca mediante un crisis financiero: no por a declara San Juan bancarota manera cu si por a haci cu e ciudad di Detroit. Di tal manera, Detroit si por a haya pordon pa su debenan colosal, mientras cu Puerto Rico ta bou di un castigo di curatela sin fin defini.

Henter un clase emigrante miyonario di Merca “continental” awendia ta muda bay Puerto Rico pa tuma solo y pa experencia un “tax holiday” radical. Eynan e empresario Mericano no mester paga e mesun impuesto manera riba tera firme, den “Merca continental” (na California, por ehempel). Hasta e desigualdad aki ta relativamente comparabel cu e situacion na Aruba, na unda hotelero ta haya beneficio di un version nobo di e “tax holiday” di antaño, convertiendo e isla den un paraiso fiscal cu awendia ta sisti ainda exclusivamente p’e doñonan di hotel. (Un articulo anterior cu mi a skirbi conhuntamente cu Luis Villegas, “Den e Sombra di Hotel” [publica den Bon Dia Aruba] a expone e mito cu Aruba a stop cu e tradicion aki.)

E cultura Boricua, su canticanan, su poesia, su intelectualidad, semper tabata mara na e soño patriotico, un vision cu cierto melancolia heroico. Pero awendia, e sombra di crisis economico ta scurece horizonte, matando tur speransa historico, y ta comberti e melancolia di e soñadonan den depresion.

Awendia, PR ta den man di e “Financial Oversight and Management Board for Puerto Rico” of FOMB (ta rima cu “Bomb”), un hunta directiva, loke tin paralelo cu varios construccion na Aruba manera CAft, RAft y COHO, cual tur ta implica un disminucion di autonomia isleño, mientras ta introduci mas “austeridad” pa complace creditor internacional.

E miembronan di e comite FOMB oficialmente ta “representa” e isla den un caso di corte na New York dilanti un hues cu ta exigi cu e teritorio aki, mas pober di Merca, paga su debe na Gobierno Federal sin riesga ningun gasto adicional, a pesar di e daño di e horcannan feroz. E organismo aki ta neglisha cualkier dolor cu su calendario y programa rigido por impone riba pueblo.

FOMB su plan pa “revitalisa” Puerto Rico cu “shock therapy” ta envolve: elimina mas cu 55 porciento di financiamento na e sistema di salubridad; corta mayoria presupuesto di e famoso Universidad di Puerto Rico; baha pensioen di hubilado; hisa costo di awa y coriente; y elimina poder di sindicato. Podise nos por conclui cu e “medicina” ta mucho mas pio cu e “malesa”. Asina mes, e tipo di campaña aki ta loke institucion manera IMF ta considera “responsabel”.

E conseho fiscal cu a kita poder di e gobierno isleño, ta e consecuencia di un ley di 2016 cu yama PROMESA (Puerto Rico Oversight Management and Economic Stability Act) PROMESA ta un experimento den Caribe. Danki na “PROMESA”, hopi decision importante gubernamental ta cay den man di FOMB, maske nunca a eligi esaki democraticamente, ya cu Corte Supremo di Merca a autorisa FOMB pa traha den secreto. E Gobernador actual di Puerto Rico tin su puesto den e organisacion ey formalmente; sinembargo, voto e no tin. Mayoria di miembro ta di Merca “continental” y ta comparti mesun educacion y vision: nan ta kere cu boramento di un Estado fragil, wabi y anemico por tin resultado ultimamente positivo, en bes di uno sumamente letal.

Nota di redaccion: E articulo aki ta opinion di e autor y no ta representa opinion di Bon Dia Aruba. Por lesa e siguiente parti den nos proximo edicion.