Varios biaha nos a toca e tema di e binidero Tsunami di automatisacion, y con esaki lo cambia e fundeshi di sociedad den e decada binidero. Pero e mesun fenomeno aki tambe tin un otro banda, esta den forma di oportunidadnan economico nobo.

Usando e hermentnan di mas nobo manera inteligencia artificial (AI) open-source, un grupo chikito por crea balor cu antes simplemente no tabata posibel, te hasta pa un compania grandi. Tambe ideanan manera e Perovskite Solar Factory pa e tereno na San Nicolas ta un idea cu merece di haya mas atencion.

Open-Source AI

Segun data di Bank of America Merril Lynch, nunca e tabata mas facil pa un team di 2-3 hende crea un compania cu un revenue di $1 miyon pa aña. Antes na añanan 1980, esaki lo costa un team di minimo 8 hende, awo esaki a baha na 2, pa aña 2020. Esaki no ta ni tumando den consideracion tur desaroyo masivo cu ta pasando den ramo di AI. Nos no mester lubida cu los di AI paga, awendia tin full un cashi di herment di AI “Open-Source” full disponibel pa pueblo. For di conceptonan di mas high-tech, pa esunnan chikito local, e hermentnan ta disponibel. Tambe nos tin cu nota cu e velocidad cu AI ta desaroya su mes, cu gastonan hasta pa e modelonan mas sofistica paga ta bahando rapidamente. Tur esaki na final por forma e fundeshi hopi fructifero pa innovacion berdadero di sector priva na Aruba.

E ora nos ta yega na e punto, manera kico asina lo ta bon ideanan pa un negoshi moderno?
Well, analistanan di Silicon Valley tur anja ta publica nan Top-10 ideanan mas atractivo cu segun e strateganan aki di California por ta bal $100 miyon US Dollars segun nan analisis extenso.

Pensa di por ehempel si Renewable Energy Services, Carbon Accounting, Augmented Reality Shopping, Sustainable E-commerce, Personalized health, Telehealth & Remote Care, Cybersecurity.

Dus pa esnan cu ta sinti nan mes inspira, usa AI pa haci bo investigacion, despues traha un business plan, asambla un team chikito, automatisa mas hopi cu ta posibel pa keda relativamente competitivo, usa netwerknan cu Gobierno a cuminsa facilita, pa por ehempel fundraising ora yega asina leu cu e concepto ta draai. E oportunidadnan t’ey, y esaki tambe ta conta pa Aruba.

Perovskite Solar Factory

Un di e oportunidadnan mas grandi den area di algo fisico no-digital pa Aruba ta e idea cu mi a propone un par di biaha caba, esta pa Aruba traha su mesun fabrica di panel solar Perovskite. Esaki ta basa riba e uitwerking hopi detaya di ingeniero basa na Suisa su universidad tecnico di mas renombra, esta Polytechnique Fédérale de Lausanne (EPFL).

Loke ta haci e concepto aki asina interesante ta cu no mester di un tereno grandi pa facilita e fabrica aki. Tambe e por ta uno casi full automatisa, y como delaster e team di EPFL a calcula cu e fabrica lo tin un RoI di riba di 100% pa aña den lugarnan bendiciona cu Solo manera nos isla di Aruba. Segun calculacionnan di EPFL, e celnan solar di e generacion nobo aki por produci coriente cu ta 75% mas barata cu e tarifa di Elmar actual. Tambe si traha panelnan na Aruba e ta reduci masivamente e presion riba nos Cuenta Coriente y Reserva, riba un plaso strategico.

Sigur awo cu ta pensando pa ideanan pa e tereno di ex-refineria, esaki ta un concepto cu mi lo menciona un biaha mas, cu lo por beneficia nos pueblo di Aruba den un forma sumamente grandi.