E fraccionnan den parlamento tin dos dia pa pasa den tur e documentonan concerniendo e refineria y e acuerdonan cu Citgo y Valero. E oposicion tambe ta mal contento cu no por haya un copia pa nan studia y asina yega na e deadline di diahuebs awor pa entrega preguntanan na escrito.
Mas presion tin ora di lesa e relato di e presidente di parlamento, Mervin Wyatt Ras cu ta indica cu parlamento ta duna ‘prioridad halto na tratamento di e ley Citgo’. El ta bisa cu el a presenta alabes su intencion pa por trata e ley den reunion publico dialuna awor dia. Esaki e presidente a haci durante e reunion Seniorenconvent cu el a yama urgentemente momento cu e ley a yega na parlamento. E Seniorenconvent ta un reunion entre e lidernan di e fraccionnan den parlamento.
Partidonan di oposicion MEP y AVP a mustra nan mal contento riba e echo cu nan no mag di haya un copia di documentonan. Y cu nan por wak nan so bou supervision di gobierno. Nan a exigi pa haya copia, sinembargo. Presidente di parlamento a nota esaki y ta laga sa cu el a manda un carta pa gobierno cu e peticion pa e fraccionnan por haya e documentonan pa asina prepara pa tratamento di ley.
Gobierno a entrega e ley y e documentonan dialuna na parlamento. Lider di MEP ta comenta:
“Durante oranan di mainta e documentonan tabata ter inzage pero bou vigilancia di coordinadornan di Gobierno kendenan tabata cambia turno pa asina sinta controla e parlamentarionan. Esaki ta trece e duda cun’e cu Gabinete Eman tin algo di sconde den e contractonan aki.”
E ta bisa cu mester studia mas cu 2000 pagina den dos dia pa prepara pa e reunion di diahuebs unda mester entrega e preguntanan na escrito pa gobierno.
“Mirando cu e ‘deadline’ ta dia prome di october, y cu Fraccion di AVP no a duna ningun motibo valido pa tene e reunion aki na un manera asina relampago, mi a sugeri pa e fecha wordo hala te cu otro siman pa asina nos haya mas tempo pa prepara nos mes miho riba e ley aki’, sra. Wever-Croes ta bisa.
Riba pagina 4 y 5 den e edicion aki Bon Dia Aruba tambe ta elabora riba e mal situacion na PDVSA, como doño di Citgo, y e consecuencianan sea insiguridad pa reapertura di e refineria na Aruba.
