(AP) – ‘Oppenheimer’ a gana 7 premio, incluyendo Best Picture, director y actor na e di 77 British Academy Film Awards riba diadomingo, fortaleciendo su posicion como un di e lidernan pa premionan Oscar otro luna.
“Poor Things” a logra hiba cas 5 premio y drama di Holocaust, “The Zone of Interest” a gana 3.
Christopher Nolan, creador di pelicula Britanico, a gana su prome premio como miho director di BAFTA pa “Oppenheimer,” y actor Irlandes Cillian Murphy a gana e premio pa miho actor, pa su trabao como J. Robert Oppenheimer, e tata di e bom atomico. Murphy a bisa cu e ta gradici di por interpreta un “personahe asina compleho.” Nolan a nota cu e armanan nuclear ta un “un topico fuerte y e pelicula inevitablemente ta refleha esaki,” bisando esnan cu a wak e pelicula “danki pa acepta algo asina scur.”
Emma Stone a ser nombra e miho actriz pa su trabao interpretando e personahe Bella Baxter den “Poor Things,” un pelicula estilo steampunk cu a gana premionan pa efectonan visual, diseño di producto, makeup y diseño di costume. “Oppenheimer” tabata lider cu 13 nominacion pero no a logra yega e record di 9 premio. El a gana e careda di miho pelicula contra “Poor Things,” “Killers of the Flower Moon,” “Anatomy of a Fall” y “The Holdovers.” “Oppenheimer” tambe a logra haya trofeo pa edicion, cinematografia y musica ademas di e premio pa miho actor secundario pa Robert Downey Jr., ken a hunga e rol di hefe di comision di energia atomico Lewis Strauss.
Da’Vine Joy Randolph a ser nombra e miho actriz di sosten pa hunga e rol di un chef di scol den e pelicula “The Holdovers” y el a bisa cu el a sinti “e responsabilidad cu mi no ta tuma manera nada” pa conta e storia di e personanan cu no ta representa manera su personahe Mary.
E ceremonia a inclui presentacion musical di Tedd Lasso su Hannah Waddingham y Sophie Ellis Bextor ken a canta su hit Murder on the Dancefloor.
