A emiti un orden di aresto pa delito di asalto simpel pa wide receiver di Cleveland Browns, y ex strea di LSU, Odell Beckham Jr., segun polis na New Orleans a bisa ayera.

E orden ta yega mientras videonan riba rednan social ta parce di mustra Beckham ta dal un oficial di siguridad su chanchan durante un celebracion di victoria den locker room di LSU despues di un wega di campeonato nacional universitario dialuna anochi den Superdome.

Browns a bisa den un declaracion cu nan ta na altura di e situacion y den contacto cu Odell y su representantenan, kendenan ta cooperando cu autoridad.

Hungadonan di LSU tabata huma cigar – prohibi den Superdrome – riba potret di e celebracion dialuna nochi. Autoridadnan supuestamente a adverti cu nan por enfrenta aresto.

Riba e video di 27 seconde disponibel riba Twitter, ta mira un oficial cerca di un hungado di LSU sinta riba un bench den locker room. Ta parce cu e oficial ta buscando rond di e bench y puntando riba vloer. Por scuch’e papiando di un ‘kima’ net prome cu Beckham ta acerk’e di patras y ta parce di dal su chanchan.

E orden di aresto ta sigui otro controversia despues di un wega involucrando Beckham.

LSU a reconoce cu a tuma contacto cu oficialnan di NCAA y Southeastern Conference tocante Beckham supuestamente entregando cash na hungadonan di Tigers riba e campo despues di e wega di campeonato nacional.

Vocero di LSU athletics, Michael Bonnette a bisa cu informacion inicial a sugeri cu Beckham a entrega ‘biyete di co’i hunga’ na hungadonan despues cu LSU a derota Clemson dialuna anochi. Sinembargo, investigacion a revela cu Beckham por a entrega placa di berdad, Bonnette a bisa e siman aki, agregando cu ta den contacto cu NCAA y SEC tocante e situacion ‘cu por a pone nos atleta studiante den un posicion comprometi’.

LEAVE A REPLY

Please enter your comment!
Please enter your name here