Mediante un comunicado di prensa, ex-politico, Otmar Oduber a ratifica un biaha mas e inhusticia, cu e ta sinti, Ministerio Publico ta haciendo den su contra pa loke ta trata e caso penal Flamingo, cu ainda no por tin un ciere p’e y cu a cuminsa ya caba tres aña pasa.

“Ta parce cu Ministerio Publico no kier perde cara, pero aki no ta trata di perde cara sino di ser husto”, asina ex-minister Otmar Oduber a duna di conoce e siman aki.

 

Den un comunicado di prensa, Oduber ta remarca cu autoridadnan a drenta su cas na juni di 2020, a coba tur caminda buscando prueba pa e caso penal Flamingo, cu tabata consisti di 8 acusacion, pero segun e ex-politico, awe no a keda ningun di e acusacionnan ey.

“Cuatro aña di pensa, duda, dolor y golpi di tur banda mester yega na un fin,” asina Oduber ta remarca.

El a recorda cu tin mas cu 3 aña caba cu “un persecucion feroz” a inicia contra su persona culpando e riba shete diferente cargo “a base di redo y shisheria na polis.”

El a sigura cu esaki a keda demostra na momento cu Ministerio Publico a laga tur e acusacionnan inicial cay pasobra, segun e ta señala, e investigacion a mustra cu niun di e acusacion tabata berdad.

“Si a desgracia y malogra e bida di un persona cu a sirbi su pais cu tur honor pa mas di 23 aña. Despues cu a investiga y a ripara cu no tin nada di berdad den e acusacionnan inicial, awo Ministerio Publico a bay colga na un denuncia falso di Marisol Tromp,” el a splica den e comunicado.

Un denuncia, segun el a sigui splica, cu a drenta despues cu e investigacion di e caso Flamingo a inicia y cu a wordo presenta pa parlamentario Marisol Lopez Tromp. “Puro revancha y nada mas,” el a bisa.

Oduber, na su turno, tambe a entrega un denuncia contra Lopez-Tromp pa e acusacionnan falso cu el a presenta den su contra. Y aworaki, segun el a indica, Ministerio Publico kier inventa algun caso pa hustifica nan fayo.

“Danki Dios cu semper mi a hiba un maneho transparente y habri, y awe full mangement di DIP por testigua esaki tambe”, Oduber a señala.

Na november di aña pasa, Oduber a bay corte pa pidi hues comisario pa termina e investigacion of duna un fecha final pa Ministerio Publico tuma un decision. Hues comisario no a bay di acuerdo cu e peticion aki. E investigacion te ainda ta andando y januari di e aña aki e dossier mester tabata cla pa tuma un decision den e caso, segun Ministerio Publico a informa nan.

Te na e momentonan aki Oduber ta wardando un decision di hues comisario si ta bay duna un fecha final pa e caso of no.