Diahuebs anochi a drenta un informe na Central di Polis cu dilanti Warda di Polis San Nicolas a sucede un otro hit and run, unda un auto a alcansa un peaton crusando caminda y a huy for di e sitio.

Mesora polis a mobilisa y ora e yega na e sitio a topa cu un hende homber riba caminda cu no tabata dunando reaccion. Cu urgencia ambulance a presenta y mesora a cuminsa purba stabilisa e victima. A reporta cu e victima a keda den condicion critico, cual a causa cu ambulance mester a hib’e cu urgencia hospital. Cuerpo Policial a cera varios caminda principal pa ambulance por pasa y hiba e victima lo mas liher posible.

Polis a informa den un comunicado cu specialista di trafico y polis tecnico a presenta na e sitio pa haci investigacion. Como cu e sospechoso a huy for di e sitio, no por a constata mesora ken por ta envolvi den e accidente aki.

Pa su mañan a drenta un actualisacion cu e chauffeur masculino envolvi den e accidente riba Bernardstraat a presenta na warda di polis San Nicolas pa entrega su mes. KPA a informa cu e investigacion ta continua, y cu e victima ainda ta den condicion critico.

Casonan di accidente fuerte ta keda sacudi pueblo
Esaki ta un otro caso lamentable cu a surgi den un periodo unda pueblo di Aruba ta na alerta pa loke ta incidentenan critico y mortal den trafico. Durante e ultimo siman, pueblo a keda sacudi pa e caso tragico unda un pareha mayor a perde nan bida despues cu un chauffeur bao influencia y coriendo cu velocidad sumamente halto a alcansa nan riba L.G. Smith Boulevard den un area turistico y pobla.

Altocomisionario di KPA, Ramon Arnhem, a comparti un mensahe riba Facebook diabierna halando atencion riba e incidentenan recien den trafico. E altocomisario a haci un apelacion urgente na cada ciudadano pa mantene su mes na reglanan di trafico y pa tene consideracion di otro usuarionan di trafico. Arnhem ta enfatisa cu KPA lo intensifica su control den trafico cu man duro, sigurando pa usuarionan keda responsable riba caminda.

Na september 2024, Ministerio Publico a publica cifranan tocante e delitonan cu mas presencia den nos comunidad, cual a resalta di ta core sin rijbewijs y core bao influencia di substancia prohibi. Aunke core bao influencia ta un crimen grave, ta parce cu tin un aceptacion grandi di coremento bao influencia, mas tanto alcohol, cu realmente por bisa cu ta considera esaki practicamente ‘normal’ den nos comunidad. Y esey a pesar di legislacion cu ta duna posibilidad amplio pa impone castigo severo riba esun cu ta viola ley den e sentido aki.

Hopi den comunidad tin un sentimento creciente cu mester bin cambio den no solamente comportamento di usuarionan den trafico, sino tambe di parti autoridadnan pa trece husticia adecua na famia y victimanan envolvi den casonan di accidente severo.