Natalie Lin
Natalie Lin

Ayera Bon Dia Aruba a publica e storia di Leoni Brokke y cu su famia ta recauda fondo den tur manera pa financia su tratamento afo. Awe nos ta trece e storia di Natalie Li, cu ta un otro caso di un pashent cu ta pidi fondo di comunidad pa un miho tratamento.

Sra. Lin ta un pashent di 44 aña di edad cu a wordo diagnostica cu chronische obstructieve longziekte. E malesa aki ta haci e cu pashent ta bira hopi delicado unda cu cualkier problema di salud cu pa nos por ta algo pasahero manera un simpel griep, pa nan por ta terminal. Sra. Lin ta bisa cu dokternan a bis’e cu no tin speransa y no tin cura pa esaki y a mand’e cas.

E la dicidi di sigui haci su mesun buskeda y asina a haya tratamento di stemcell cual lo ta e unico speransa pa un miho calidad di bida pero ta algo cu ta costa hopi placa. Stemcell ta un tratamento unda cu bo mesun celnan ta wordo haci limpi. Nan ta wordo purifica di manera cu ora cu e wordo poni bek den curpa e ta rehubenece e celnan cu ta daña. sra. Lin ta bisa.

Desde dia cu el a dicidi di biaha pa busca su salud afo, su longarts no kier atend’e mas. E ta conta cu dia cu e la bay biaha, e dokter la yama aeropuerto pa bisa e aerolinea kico ta e condicion di sra. Lin y pa no lag’e subi vuelo. Despues di esaki sra. Lin entrega un denuncia contra di e dokter. Segun sra. Lin su dokter no ta kere den e tratamento di stemcell. El a  bay un otro dokter cu si a dun’e un carta cu ta permiti pa e bula.

AZV no ta cubri tratamento

E prome tratamento di stemcell a yud’e bastante, e ta bisa Bon Dia Aruba. Despues el a manda un peticion na AZV pa wordo yuda pa bay haci un segundo tratamento. Pero nan a nenga un biaha mas pa motibo cu e ta un tratamento di experimento, y cu locual sra. Lin tin ta un condicion cu ta den su fase final. E ta bisa cu a manda 3 peticion pa AZV. E prome biaha el a wordo bisa cu no ta necesario pa e bay tuma e tratamento di stemcell aki. E di dos a bisa cu e tratamento ta uno di experimento y e di tres sra. Lin ta bisa cu na telefon el a haya un no pero ainda e no a haya esaki den un carta confirma.

Sra. Lin a haci varios esfuerso pa por cera e placa pa por bay. E biaha aki e lo ta un costo di 9 mil dollar y esaki ta exclui costonan di auto, hotel, oxigen y cuminda por ehempel. E biahe ta poni pa diadomingo aki 2 siman pa bay Tampa, Florida y ainda falta placa. E tratamento aki ta mas caro cu e otro pasobra cu e ta un tratamento mas grandi unda cu e lo haya e tratamento di sanger y beenmerg, e ta conta. Despues e lo mester bay un biaha mas na november y ta depende con su salud sigui despues di un aña e lo mester bolbe bay. Sra. Lin ta bisa cu no ta importa e malesa cu un hende por tin, y cada un merece wordo yuda pa busca un miho calidad di bida y e kier bringa pa esaki.  P’esey e ta recauda fondo via entre otro Facebook y spera cu comunidad lo wak e importancia aki tambe.