NASA a bolbe retrasa e lansamento di su Mars rover di mas nobo un biaha mas – na fin di juli lo mas trempan – e biaha aki pa un problema cu raket.
Si e rover Perseverance no ta na caminda pa mita di augustus, lo mester warda te 2022 na momento cu Tera y Mars ta atrobe den un alineacion apropia, costando NASA alrededor di $500 miyon pa e retraso so.
Managernan awo tin meta di no mas trempan cu dia 30 di juli proximo pa un lansamento for di Cape Canaveral, gastando asina mita di e bentana di lansamento di un luna. E bon noticia ta cu NASA ta purbando di saca mas tempo den e oportunidad di lansamento di e berano aki, cu awo ta dura te sikiera di 15 di augustus. E oportunidad pa bula na Mars ta yega apenas cada 26 luna.
Esaki ta e mision di NASA na Mars mas ambicioso te awo, cu un costo total di $3 biyon. Ademas di busca pa señal di bida Marsiano microscopico den pasado, Perseverance lo colecta piedra y baranca pa su eventual regreso na Tera.
Fabricante di raket, United Launch Alliance, mester tempo extra pa drecha un linea di sensor di oxigeno likido cu a mustra datonan cuestionabel durante un countdown di practica recien, segun oficialnan a bisa diamars. Preocupacionnan tecnico anterior – incluyendo problema cu e crane na e pad di lansamento – a move e lansamento for di e fecha original di 17 di juli na dia 20, y despues dia 22.
Perseverance toch lo haci un intento pa touchdown proximo februari den un riu delta antiguo na Mars, sin importa na ki momento e ta lansa.
Emirato Arabe Uni y China, mientras tanto, ainda ta bayendo dilanti cu nan propio lansamentonan e luna aki of e proximo astronave Marsiano. Rusia y e Agencia Espacial Europeo mester a hala atras, retrasando nan Mars rover te 2022 pa motibo di retraso den test di e astronave, y limitacion di biahe pa motibo di pandemia di coronavirus.
