Otro siman corte di apelacion ta duna veredicto: Mike de Meza dispuesto pa sigui bringa su caso te final

Ayera tardi a tuma luga tratamento di caso di apelacion cu parlamentario y candidato pa minister Mike de Meza a entama contra Ministerio Publico (OM). E caso a ser trata tras di porta cera y despues cu esaki a termina de Meza hunto cu su representantenan legal a duna un declaracion na medionan di comunicacion presente tocante con e caso a bay.

E abogado liderando e ekipo legal di de Meza, Sra. Desiree Croes a expresa cu nan a sali cu “un bon sentimento atrobe” y a indica cu pa loke ta trata contenido mes di e caso e huesnan tabatin “hopi comprension” pa Sr. De Meza.

De Meza tabatin e oportunidad pa splica e huesnan, den un par di minuut, den kico e ta pasando na e momentonan aki y a haci esaki hopi cla y nan por a wak cu huesnan ta compronde e parlamentario su situacion.

Abogado Croes a indica cu e huesnan a bisa cu solamente nan mester wak algun detaye formal door cu ta trata un articulo nobo, un articulo den ley diferente cu masha poco ta ser usa. El a splica cu OM tabata di opinion cu de Meza mester a haci cosnan den otro manera, pero de Meza y su ekipo legal a indica cu nan ta di opinion cu nan a haci e cosnan na e manera corecto

El a agrega cu ta trata solamente un punto formal y riba esey so nan mester duna nan decision ainda pa asina despues nan bay riba e parti di contenido di e caso mes y segun el a informa huesnan a priminti cu den un siman lo haya un contesta di Hof.

Pa loke ta trata e peticionnan cu a ser trata durante e caso, abogado Croes a splica cu ta trata di dos cos. E prome ta cu for di algun siman pasa de Meza oficialmente a ser declara como un sospechoso. E abogado ta sigui splica cu nan ta di opinion cu aworaki cu OM a bisa esey, nan mester ta mas cla den su splicacion y no solamente bisa pa wak un cierto articulo. “E articulo ta un paraplu artikel cu e por ta asina hopi diferente cos. Nos kier claridad,” el a enfatisa.

Di dos cos cu nan ta pidi ta pa OM informa si nan ta bay persigui de Meza of no pasobra aworaki OM ainda no a confirma si ta bay persiguie y ademas, el a agrega, ni sikiera nan a yam’e ainda y ya ta dos luna pasa cu nan a laga sa cu nan ta consider’e un sospechoso, despues cu hues a obliga nan, pero asina mes, segun Croes, e manera cu nan bis’e tabata djis referiendo na un articulo y esey, el a enfatisa, no ta suficiente.

Pa loke ta e reaccion di OM, abogado Croes a bisa cu nan a reacciona cu solamente un zin y a bisa cu nan no ta duna niun comentario mas di loke nan a bisa caba.

Di su banda e parlamentario y candidato pa minister Mike de Meza expresa cu nan “nan ta sigui bay dilanti.” El a splica cu su abogadonan a duna full e splicacion y cu el a keda sumamente contento cu e trabou cu nan a bin ta haci. El a splica cu durante e tratamento di e caso di apelacion e tres hues na Corsou a puntr’e si e tabata kier a duna su punto di bista, cual el a haci y a splica nan kico e ta pasando aden.

De Meza cu na momento cu tabatin e screening, su screeningnan di OM, KPA, e screening di salud, test psicologico y di droga tur cos a sali bon, pero den e screening di Departamento di Impuesto (DIMP) nan a bin riba un caso di 16 aña pasa y sugestivamente dunando cierto acusacionnan cu, segun e parlamentario, no ta cuadra.

El a splica cu cosnan cu a tuma luga tabata riba instruccion di gobernador y formador e tempo ey cu a indica cu si e activo den comercio mester pone e negoshinan riba un distancia, cual el a sigura el a haci a traves di dos compania di accountant y notario y e dossier ey a ser entrega na gobernador, formador e tempo ey cu a bira prome minister y a ser entrega tambe na directora di Departamento di Impuesto. “Y awor 16 aña despues bo ta bin tende tocante algo, pero e no ta cuadra. Te aworaki mi ta sinta warda kico realmente e acusacionnan ta,” el a remarca.

Contestando pregunta tocante si e ta sinti cu si e por a haci algo miho of si e ta sinti cu el a haci algo cu no tabata corecto cu awor ta pone cu e ta den e situacion aki, de Meza a sigura cu pa 30 aña caba e tin oficinanan di accountant ta haci tur su cosnan di impuesto. “Mi mes no ta experto den esey y p’esey eigenlijk tin e oficinanan di accountants, specialistanan di belasting y pa 30 aña nan semper a yena tur mi cosnan pa mi. Ami no ta sinti cu mi lo a haci algo robes si tabatin un omision of algo,” el a enfatisa.

Por ultimo parlamentario de Meza a indica cu e lo continua eherce su trabou como parlamentario y presenta pueblo. Ademas el a sigura cu e ta dispuesto pa sigui lucha si ta necesario y ta dispuesto pa hiba e caso aki te na Corte Europeo si tin mester.