Pa aña tin alrededor 10 caso nobo di cancer na boca di matriz

Cancer na boca di matriz  ta un di e tres cancer cu mas ta afecta hende muhe. Segun dato cu PR di departamento di Salud Publico (DVG), Jurette Croes a trece dilanti pa aña un promedio di 10 caso nobo ta keda diagnostica di cancer na boca di matriz na Aruba.

Un cifra pa tene na consideracion y reflexiona riba dje ta cu cada aña tres persona ta fayece pa motibo di e tipo di cancer aki.  E edad mas afecta ta entre 25 pa 45 aña cu ta hendenan muhe den un edad relativamente jong. P’esey departamento di Salud Publico (DVG) ta haya importante pa enfoca riba e tipo di cancer aki, ya cu e ta facil pa preveni y tambe pa diagnostica na un tempo tempran.

Vacuna contra HPV
Cuater aña pasa nan a introduci na Aruba e vacuna cu ta proteha e muchanan muhe contra e virus cu por causa a cancer aki den futuro. Tur mucha muhe na Aruba tin e oportunidad cu ora nan yega 6 klas di scol basico nan por haya e vacuna aki. Tur hende ta vulnerabel na e virus di papiloma humano (HPV). Tur hende cu ta sexualmente activo por bin den contacto cu e virus aki.

Segun un investigacion cu nan a haci na aña 2012 a mustra cu muchanan di un promedio di 14 aña ta bira sexualmente activo na Aruba. Esaki ta un edad relativamente hoben. P’esey nan ta considera importante cu e mucha muhe por haya e vacuna hopi mas prome cu nan ta bira sexualmente activo.

Despues di 4 aña di introduccion di e vacuna aki 54%  di e poblacion cu nan kier pa ta vacuna, ta vacuna  actualmente. E ta un cifra di alrededor di 1500 pa 2000 mucha muhe.  DVG no ta considera esaki halto, pero cada aña e cifra ta subiendo. “Nos ta wak un adelanto poco poco di e porcentahe, pero realmente nos kier pa esaki subi mas”, segun sra. Croes.

Safe y efectivo
Tin biaha tin cierto resistencia pa e mucha muhe por haya e vacuna aki debi na informacion divulga rond cu e vacuna aki por ta peligroso of ocasiona daño pa e salud di nan yiu.

E vocero no ta haya cu tin base pa papia un cantidad di historia contra e vacuna aki. E doctor di mucha na servicio di seccion Hubenil di DVG, Jan Hubert a bisa cu e vacuna aki ta hopi safe y hopi efectivo. Ademas nunca ta e intencion di bin cu un vacuna pa haci daño na salud di e muchanan. Pero nan ta compronde e preocupacionnan di mayornan. Sinembargo DVG tambe kier pa e muchanan por tin nan proteccion contra e malesa aki.  Danki na e vacuna e proteccion contra e tipo di virus di HPV cu por ocasiona cancer na boca di matriz ta hopi halto bou mucha muhe vacuna.

Sra. Croes ta bisa cu den tur e añanan cu ta aplicando e vacuna  aki nan no a confronta niun efecto secundario of serio di vacuna. Mas tanto nan a haya e reaccion normal cu tur vacuna por causa, entre otro dolor na e brasa y dolor di cabes cu ta algo cu por sosode temporalmente. “Pero otro efectonan nos no ta wak aki na Aruba.”  Tin paisnan cu a bin cu e vacuna aki prome cu nos, y ya caba nan tin un reduccion di e hendenan muhe cu por ta den un estado preliminar di cancer den boca di matriz.

Sintomanan
E vacuna contra HPV ta yuda preveni e cancer na boca di matriz.  Igualmente e hende muhe adulto por preveni esaki haciendo nan paptest  regularmente. Dr. Hubert a declara cu e parti di prevencion ta hopi importante pa e tipo di cancer aki. E ta suplica tur e mayornan cu ora nan ta ricibi nan carta cu tur informacion via scol pa nan duna permiso pa nan por vacuna e mucha muhe.

E vacuna aki ta gratis y e mucha tin cu tuma e vacuna aki dos biaha. Na inicio di aña escolar nan ta pasa na cada scol basico pa e mayor haya informacion y aplica e vacuna. Y na final di aña escolar nan ta bin cu e di dos dosis pa esunnan cu a haya e prome vacuna  caba. Tambe  tur mucha muhe cu no a haya e vacuna ainda y cu no ta sexualmente activo por haya e vacuna na seccion di Malesa Contagioso di DVG. Esey si tin un gasto of prijs di alrededor di 35 florin.

Di otro banda e dokter ginecologo, Babet Latour a papia riba e cancer aki mes y con e por afecta bida di nos hende muhe na Aruba.  E virus di HPV ta presente den tur hende cu ta sexualmente activo alrededor di 80% di nan lo haya e virus. Pero den mayoria di caso e virus aki no ta causa daño. Tin diferente tipo di virus di HPV, ya cu e ta un virus hopi comun. Pues tin un tipo di e virus aki cu por causa cancer, y otronan cu no ta causa cancer.

E vacuna ta duna proteccion contra e tipo di virus di HPV cu ta mas envolvi den e casonan di cancer den boca di matriz. E efectividad di e vacuna contra e tipo di virus cu ta causa e cancer aki ta hopi halto, ya cu e ta proteha riba e tipo di virus di HPV cu por causa cancer.  Nan ta localisa e virus net den e celnan di e nek di e utero of matriz. Kiermen e parti mas abou di e matriz cu ta conecta cu e vagina. E sintomanan mas comun entre otro ta bashamento di sanger abnormal, fluho vaginal  y dolor den e area ey, specialmente durante relacion sexual. Ta recomendabel pa bishita bo dokter di cas of bo ginecologo.

You May Also Like

Destruccion di naturalesa ta continua….

ORANJESTAD – Den tur medio di comunicacion regularmente sa toca e tema di cuido ...

Dir Svb transpaso fondo.JPG

Gobierno no a pidi SVb contribucion di 60.5 miyon florin

Director di Banco di Seguro Social (SVb), sr. Edwin Jacobs a nenga rotundamente cu ...

Cifra reunion aruparking.JPG

Crecemento di parkeer paga no ta refleha aumento di benta den centro di ciudad

Presidente di Camara di Comercio y Industria di Aruba (KvK), Daphne Agius Cesareo-Lejuez  ta ...

Hulanda pa motibo politico ta nenga Aruba refinancia su debe nacional na interes mas abou

Minister di Financia, sr. Angel Bermudez ta kere cu si Hulanda kier berdaderamente yuda ...

Dos aña sigui departamento Maritimo ta auto sostenibel

2016 tabata un aña di retonan y di logronan positivo, asina  director di departamento ...

jouve.jpg

te cu awo 11 banda confirma pa jouve

Ayera tardi laat SMAC ta comunica cu Jouvert Morning lo conta cu participacion di ...