Pa drecha San Nicolas… Mester plan di 10 aña…

Atrobe un grupo di comerciante local na San Nicolas ta trece e situacion precario di e ciudad aki dilanti y ta propone algun mehoracion. Loke nan ta propone ta masha humilde y modesto, loke ta mustra simpatico, pero lo no ta ni remotamente suficiente pa trece un cambio sustancial den e lugar totalmente deteriora aki. Un lugar cu sin embargo ta e lugar di biba di un parti considerable di poblacion di Aruba, pa cual nan no mester sinti ni preocupacion, mucho menos lamento pa su estado actual.

Muy probablemente gobierno por keda tranquil despues di e yamado aki pa haci algo. No ta exigi accion directamente, salvo algun punto bastante modesto di mehoracion, loke ta laga e discusion berdadero y fundamental cu mester tuma lugar, tira un banda atrobe. Y esaki mientras cu e realidad ta cu e problemanan di San Nicolas ta asina compleho y asina grandi, cu un plan realistico y cu credibilidad lo ta un plan di sigur 10 aña, loke mesora ta trece un di e principal problemanan politico dilanti: nos no ta custumbra mira plan cu ta sobrepasa un periodo di gobernacion, mucho menos dos o tres. Pa logra esey nos lo mester mira un cierto consenso entre por lo menos e dos partidonan grandi, cu en todo caso ta cubri e lineanan principal unda San Nicolas mester y por ta aki 10 aña. Mirando e sucesonan alrededor di San Nicolas durante ultimo 15 aña ta duna nos solamente un profundo sentimento di pesimismo, na promer lugar pasobra nos no ta mira con e forzanan politico ta yega na otro, reconociendo cu algo grandi lo mester tuma lugar pa rescata e ciudad, ademas aceptando cu ta nan obligacion y tarea pa percura pa esaki. Nos no ta gana nada cu e expresion di algun promesa vago encuanto desaroyo economico nobo cu nunca ta cristaliza, lagando tur hende cu e sabor amargo di e tantisimo fracasonan cu nos a mira pasa nos dilanti den ultimo decadanan.

Esaki a laga nos cu e pregunta grandi: kico si ta posible anto? Esey ta exigi pa nos bay un rato na e punto di salida actual. Esey no ta den cuanto GDP San Nicolas mester bay aporta, sino e pregunta fundamental ki tipo di desaroyo socio-economico ta necesario y deseable pa San Nicolas, cu ta duna un respuesta na e problemanan structural cu tin. Ban cuminza pa pone e puntonan di salida nos dilanti. Aruba ta den un racha di desaroyo turistico, cu riba su mes caba por percura pa e actual poblacion, di mas di 125.000, bira 140.000 den 10 aña. Di esey, si e hotel na Sero Colorado haya su expansion pa 900 camber, nos por mira un crecemento mas fuerte ainda di e demanda pa vivienda adecuado, loke actualmente ta un problema caba. Esey ta mustra nos riba un necesidad grandi cu, ojo, ni siquiera ta contempla e yegada di mas actividad economico, solamente e ‘spin-off’ di e turismo na San Nicolas. Esey ta trece nos riba un pregunta clave: nos mester percura pa hopi mas actividad economico, por ehemplo riba e tereno di refineria, pa hustifica mehora e ciudad, pa cuminza cu e problema precario di vivienda? Esaki lo aumenta na promer lugar e demanda pa mas forza laboral, cu nos no tin… Importa mas hende ainda, ta aumenta mas ainda nos problema di vivienda, banda di otro aspecto di infrastructura cu nos lo mester resolve tambe. Ta parce nos inevitable yega na e conclusion cu ta imposible pa pospone mehoracion drastico di San Nicolas te dia gobierno yega na atrae algun tipo di actividad economico pa e tereno di refineria, mientras cu gobierno ta keda usa esey como pretexto pa no haci nada structural pa atende e problemanan di e ciudad. Ta lamentable cu den pasado recien a usa henter e espacio cu gobierno tabatin pa proyecto ‘PPP’, envez di reserva un parti pa rehabilitacion di San Nicolas. Fuera di esey nos ta mira cu nos ta pasando den un tercer aña di surplus grandi, sin cu tin un claridad ki tipo di inversion ta haya prioridad gubernamental. Y promer cu nos haya critica tocante e destino cu e surplus gubernamental tin segun ley: Si, nos ta bon na altura cu un parti grandi ta bay na paga debe, ningun problema cu esey. Pero ban papia tocante e demas fondonan, cu no ta pa paga indexering di ambtenaar, sino ta exclusivamente pa ‘inversion’. Kico, segun nos opinion, lo mester haya prioridad anto? Atende e problema di vivienda, combinando esaki cu e tarea di ‘repobla’ e casco urbano di San Nicolas. Di tur manera gobierno no por keda expande urbanizacion eternamente den direccion di areanan berde, pero mester planifica uso di e areanan urbaniza caba na un manera mas eficiente, loke lo significa un bentaha grandi pasobra no ta gasta mas riba infrastructura den expansion di e area ocupa pa e poblacion. Cada kilometro di caminda, tuberia, cable pa electricidad y internet, etc. cu nos no mester financia, ta aumenta nos posibilidad financiero pa dedica esaki na rehabilitacion di e ciudad. Ademas, esaki ta e tarea cu ta spera nos den e casco urbano di Playa tambe.

For di loke nos a trata di describi aki ta claramente visible cu esaki por logra solamente cu un plan solido a largo plazo, cu necesariamente mester sali di gobierno. Si esaki no sucede, nos ta keda pega den e eterno ‘regalitonan politico’ cu San Nicolas ta haya de vez en cuando. Poblacion di San Nicolas, y Aruba, merece algo mihor.