Prome Minister, Evelyn Wever-Croes, a referi na e situacion actual di e compleho di e refineria y tambe di e terminal di combustibel, esaki despues cu e trahadonan a acepta e ultimo pakete di retiro ofreci pa Citgo Aruba Refinery (CAR).

El a descarta cualkier riesgo cu no lo tin combustibel na Aruba, ya cu gobierno pa medio di RdA a atende pa esaki no sosode. Un tempo tabatin e pensamento cu pais Aruba pa medio di su compania estatal, ta keda doño y opera e terminal. Pero e prome mandatario ta considera esaki como un ‘ilusion’ ya cu pa haci esaki, gobierno mester di placa pa por inverti den e infrastructura di e waf y tambe den e tankinan cu ta den mal condicion. El a bisa categoricamente cu pais Aruba no tin e placa pa haci e tipo di inversion aki. E ta kere cu un di e miho decision ta pa ‘lease’ a base di contract cu otro partnernan pa opera e terminal y tambe e refineria. E ta haya mas factibel cu esaki lo por sosode mas lihe cu e terminal.

 

Trahadonan y terminal.
Premier Wever-Croes a bisa cu unabes cu e trahadonan no sigui na servicio di CAR, tabatin e riesgo cu e luga ta bay keda bashi. Pa loke ta e refineria, e lo keda asina, ya cu gobierno ‘no tin mucho’ pa haci aden debi cu nan espacio financiero ta limita. Pero e terminal, cu ta e fuente pa abastece nos pais di combustibel, si mester tin trahadonan pa atende cune, ya cu e ta vital pa nos economia por draai.

El a splica cu pa e motibo ey, e compania estatal Refineria di Aruba (RdA) a lanta otro compania estatal, Terminal di Energia Aruba (TDEA) pa atende cu e terminal. E compania aki temporalmente ta encarga pa e terminal sigui opera. “E compania aki no tin placa pasobra e ta un compania estatal y no tin placa,” el a bisa. Pero a pesar di nan situacion financiero, e compania di terminal a tuma un grupo minimo di trahado den servicio cu tin mester.

E prome mandatario no tabatin e cifra di e trahadonan cu a bay over temporalmente den e compania cu ta atende cu e terminal. Pero el a compromete su mes cu den otro ocasion lo trece den publico esaki. Nan a wordo tuma over den e compania estatal nobo, pero sin aña di servicio. Tampoco no ta cla cuanto tempo nan lo permanece na servicio di e compania aki, ya cu ainda decision mester cay riba kico lo bay pasa cu e terminal.

E grupo aki ta atende cu e barco cu ta bin carga di combustibel pa nos pais cada dos pa tres siman. E mandatario no ta na haltura tampoco di kico nan trabou ta, y si nan ta cla caba pa identifica cuanto hende ta bay traha, y ki sorto di trahadonan ta parti di e team aki.

LEAVE A REPLY

Please enter your comment!
Please enter your name here