E di dos diadomingo di luna di maart ta un fecha masha special pa Hunta di Bombero Dominicano na Aruba estableci na San Nicolas, debi cu nan ta conmemora Dia di Bombero Dominicano.

Nan a cuminsa di nan dia cu hisamento di bandera cu tur honor militar. Tambe nan a dedica un minuut di silencio pa honra e memoria di e victimanan di e pandemia actual.

E aña aki riba dia 14 di maart nan tabatin varios motibo pa celebra: 67 aniversario di declaracion di Dia di Bombero Dominicano. 142 aniversario di existencia di Cuerpo di Bombero di San Pedro de Macoris. 30 aniversario di patronato di ayudo di Cuerpo di Bombero. 12 aniversario di existencia di Academia Internacional di Bombero y 9 aniversario di existencia di pa Hunta di Bombero Dominicano na Aruba. Asina Coronel Rolando Wilson kende ta Comandante di e brigada aki a informa na Bon Dia Aruba. E brigada di bombero aki ta realisa trabao boluntario na beneficio di nos comunidad, entre nan mantencion di casnan di cuido y limpiesa di nos beach. Ademas durante e crisis di e pandemia nan ta brinda pakete di ayudo di productonan di alimento y limpiesa pa e famianan den mas necesidad.

Pa conmemora tur e acontecimento aki, Hunta di Bombero Dominicano na Aruba a organisa un acto senciyo na Logia Star of Unity Lodge No. 5. E biaha aki, nan conmemoracion a conta cu presencia di Consul General di Republica Dominicana na Aruba, Sr. Pedro Ventura kende a wordo huramenta como miembro di e brigada aki. El diplomatico a ricibi e rango di Teniente Coronel transitorio y miembro di e brigada aki. Tambe a huramenta Sra. Ruby Nedd bou e rango di Prome Teniente di e brigada di bombero boluntario.

Pa duna mas contenido na nan conmemoracionnan, Hunta di Bombero Dominicano na Aruba a organisa un servicio religioso celebra pa nan capeyan y coronel, pastoor Jecco. Na final pa clausura nan celebracion nan miembronan a disfruta di un dushi desayuno.