Minister Rudy Lampe a anuncia cu nan ta biniendo cu dos proyecto pa atende cu e fenomeno di dropout. Pero tambe pa atende cu e derecho cu tur mucha tin na educacion cu ta pas cu nan talento, independiente di nan status legal. Aruba como pais ta mara na tratadonan internacional di derecho riba educacion cu ta algo serio cu mester cumpli cune, el a bisa.

Pa atende cu e fenomenonan aki e mandatario a anuncia e proyecto di Casa Grandi (La Nueva Escuela Virtual) y tambe di scol virtual na JFK Edu Center. “Aworaki si bo no por bay scol, scol ta bin cerca bo,” el a declara. Tur aki danki na tecnologia di awendia.

Minister Lampe a laga sa cu e proyecto aki di Casa Grande via online education su version Spaño ta bay inicia na augustus awor. Nan ta haciendo e preparacion necesario. El a bisa cu ya caba tin un firma di Minister President y un firma di dje, como Minister di Enseñansa, pa e proyecto aki lo por bira realidad.

Segun minister Lampe tin un carta di e prome mandatario, pero e ta cualifica e carta aki como uno di comunicacion y no un carta di decision. “Pasobra cada minister ta responsabel pa su cartera,” el a bisa. El a splica cu atendiendo e yamado di Parlamento cu a pidi pa mayor comunicacion debi na e kehonan cu a bin for di Sindicato di Maestro di Aruba (SIMAR), e carta aki a wordo skirbi.

Den su carta e prome mandatario ta reafirma cu e scolnan cu kier bin cambio riba dje ta keda publico, y tambe cu lo bin dialogo. Minister Lampe a indica un biaha mas cu tabatin un fout humano riba e lista cu MinPres a presenta, caminda Prins Bernard a wordo inclui eroneamente den e lista aki.

La Nueva Escuela Virtual

E ta un programa cu a inicia na 2016 y ya caba tin 150 mil studiante den diferente pais. Hulanda mes, minister Lampe a informa, ta evalua aworaki pa start cu un programa similar.

E mandatario ta haya cu si nos tin e fenomeno di dropout den nos sistema di enseñansa na Hulandes, mester crea alternativa pa e muchanan y hobennan. “Pasobra nos no mester acepta un dropout mas,” el a bisa.

Nan a cuminsa promove e sistema Mericano di educacion cu –segun e mandatario– riba tereno di online ta mas avansa ainda cu na Hulanda. E no tin di haber exclusivamente cu e muchanan migrante, sino cu nos sistema di enseñansa te hasta ta faya cu nos mesun muchanan y hobennan local, minister Lampe a declara.

Nan lo bin cu Scol “La Nueva Escuela Virtual” cu e ta defini como un berdadero scol virtual cu un curriculum acredita, y e tin e mesun concepto of modelo di Casa Grande, cu ta un zuster partner di K12.

MoU Merca

Tambe el a laga sa tambe cu como gobierno nan a yega di firma un acuerdo di entendimento (MoU) cu Departamento di Estado di Merca den cuadro di nan proyecto di habri centro di promocion di educacion den varios pais, tambe den Caribe.

Aruba tambe ta bay habri un centro di educacion den edificio di JFK Education Center. El a splica na Bon Dia Aruba cu e sistema di Casa Grande tin di haci cu e sistema Mericano di educacion. Mientras cu esun cu nan firma cu Departamento di Estado cu lo bira un scol virtual na JFK Center ta algo mas grandi compara cu e programa di Casa Grandi cu fondo di Hulanda.

Uso di idioma

Encuanto e programa bilingual aki Spaño-Ingles tin critica cu e enfoke a wordo poni riba e muchanan di habla Spaño so. Mientras cu nos isla ta un comunidad multilingual. Segun e mandatario a dicidi di ofrece Ingles banda di Spaño, specificamente pensado riba e grupo di migrante cu a sali di Venezuela pa busca refugio na Aruba. El a declara cu tambe e muchanan migrante tin derecho riba enseñansa cu ta pas cu nan talento.

Segun minister Lampe e programa di Hulanda, inspira den Casa Grande, ta pa e grupo aki specificamente di Venezuela. Nan por continua educacion secundario of bachillerato bao e sistema aki y bay universidad. Actualmente nan delaster nivel di enseñansa pa nan ta bira EPB, limitando nan talento. Mientras cu scol virtual La Nueva Escuela Virtual kier brinda un miho futuro pa e muchanan aki.

El mandatario ta considera na su luga e peticion haci na Hulanda pa financia e proyecto aki cu ta trata den su mayoria di muchanan y hobennan di Venezuela, estableci na Aruba dor di e situacion interno den nan pais natal.

P’esey banda di Spaño nan ta habri oportunidad cu e programa Ingles, ya cu e idioma aki ta birando universal den sistema di educacion mundialmente, incluso na Hulanda mes. Por ehempel e mayor di muchanan di origen Haitiano a cuminsa mustra nan interes pa e version na Ingles. Tambe hopi mayor -segun e mandatario- a yega di firma pa e tipo di proyecto aki por wordo ehecuta.

El a bisa cu parti di e trabao di e centro aki no solamente ta esun di brinda nos muchanan otro sistema Mericano di educacion, banda di nos sistema Hulandes. E centro tambe tin entre otro un tarea di conseha e studiantenan cu kier sigui estudio na Merca, caminda nan ta haya un Aruba lening. Tambe cu e centro educativo Mericano dor di acuerdo firma, nos studiante por haya un prijs mas barata di nan matricula pa medio di fiansa di Arubalening.