E grupo di oposicion contra e regimen Madura a expresa nan satisfaccion pa e acogida y exito cu e consulta popular a haya cerca e comunidad Venezolano estableci na Aruba.

E comunicador social Venezolano, Luis Zarraga kende tabata un di e coordinador di e consulta popular aki na Aruba, a elogia e participacion di e Venezolanonan cu a mustra un biaha mas nan civismo y determinacion contra Nicolas Maduro.

Aunke a wordo habri 11 centro rond di Aruba pa e Venezolanonan mayor di 18 aña identifica, ya sea cu cedula of paspoort Venezolano vigente of caduca, por a haci uzo di nan, pero mayoria di nan a haci’e di forma virtual, el a bisa.

Eleccion versus Consulta

Te cu entrevista aki a tuma luga ayera den oranan di merdia a wordo conta alrededor di 6 miyon 400 mil voto di e consulta, pero ainda ta pendiente e votonan cu e Venezolanonan a emiti pafo di nan pais. Esaki tabata un señal cu oposicion Venezolano a considera como positivo, ya cu e tabata mas di e resultado di eleccion di siman pasa cu nan a considera uno fraudulento.

Den e caso aki ta wordo papia oficialmente di mas cu 6 miyon di Venezolano cu a expresa nan mes contra e regimen di Maduro. Segun Zarraga e consulta tabata un exito enorme y tambe di un transcendencia democratico pa Venezuela.

El a añadi cu segun empresanan di encuesta serio, e eleccion parlamentario ultimo na Venezuela no ta surpasa ni sikiera un 3% di asistencia. Zarraga a cualifica e eleccion aki como ‘nefasto’ cu e regimen di Maduro a organisa. E ta deduci cu si e eleccion aki no a surpasa niun 3% di e votado, esaki kiermen cu e participacion di mas cu 6 miyon di Venezolano den e consulta popular ta superior.

Ademas el a agrega cu eleccion di siman pasa no tabata uno valido, debi cu e mesun Conseho Electoral y Corte Supremo di Husticia no tin validez. Tabatin un cantidad di eror constitucional cu ta haci cu e eleccion aki no a haya reconocimento internacional. Esaki debi cu Nicolas Maduro kier a bin cu e eleccion aki mirando cu dia 5 di januari proximo e Asamblea Nacional dirigi pa e presidente encarga di Venezuela, Juan Guaidó, mester a entrega e asamblea aki na otro asamblea cu mester a wordo eligi den cuadro legal y constitucional, entre otro cu presencia di observadornan internacional locual no a sosode. “Pero e asamblea actual no por wordo entrega na un asamblea ireal… esey ta e problema grave,” el a bisa. Den e caso aki y uzando un termino di futbol, Zarraga a laga sa cu e “bala aworaki ta den e veld internacional.”

Consulta na Aruba

El a bisa cu na Aruba e consulta aki a wordo biba cu alegria. “Nos ta sinti nos mes satisfecho pasobra un gran cantidad di hende a bishita e sitionan of centronan,” segun Zarraga.

Mayoria a yega di expresa cu nan a participa via digital di e consulta aki. Te hasta nan tabata mustra e number of codigo unico y intransferibel cu esunnan cu a participa a haya pa demostra cu e proceso aki tabata uno confiabel.

Sinembargo e por a sinti un sentimento mixto tambe. E prome sentimento tabata di alegria. Pero di otro banda nan tabata sinti un sentimento di impotencia y rabia. “Berdad cu e tabata masha straño!” el a expresa.

Apesar cu nan tabata alegre tambe tabata existi un ambiente di temor y miedo. Zarraga ta haya esaki algo natural, ya cu ta existi un antecedente. Den pasado a wordo celebra un eleccion y despues a wordo divulga un lista di esunnan cu a vota contra Chavismo. “E lista ey tabatin un efecto hopi negativo pa hopi hende. Y e hendenan a keda cu miedo,” el a laga sa.

Apesar cu e Venezolanonan no kier a expresa nan mes di un forma habri, ya cu e regimen aki ta uno ‘destructor y criminal,’ pero e ta haya cu e pueblo Venezolano ta uni keto bay contra e regimen di Maduro. E ta sinti cu e Venezolanonan ta ‘sintonisa,’ ya cu nan tin mas cu 21 aña caba bibando e situacion aki. Pues tur bon Venezolano y amante di democracia tabatin un deseo grandi di participa den un evento importante, manera un consulta popular.

E consulta popular aki tabata uno mundial, ya cu ultimo añanan mas cu 5 miyon Venezolano a yega di bandona nan pais natal debi na e crisis interno di tur indole produci pa e regimen actual. Zarraga a bisa cu den cualkier pais di mundo unda tabatin presencia di mas cu shen Venezolano, nan a cera cabes pa asina lanta nan bos contra dictadura Chavista- Madurista, y mustra nan mes na fabor di democracia na Venezuela. E slogan di e consulta popular aki tabata na Spaño: “Venezuela Alza la Voz.”

Kico lo bin awor?

Encuanto kico lo bin despues cu e pueblo Venezolano a lanta un biaha mas nan bos contra e regimen Chavista-Madurista. E ta haya cu loke ta bini awor ta mas participacion activo y decisivo di e comunidad internacional pa busca un salida pronto na Venezuela. Zarraga a declara cu e consulta aki cu tabatin tres pregunta basico tabata uno ‘mas huridico cu politico.’

Un aspecto cu e ta considera importante ta cu e consulta aki no a bini for di Asamblea Nacional. Tampoco for di e presidente interino, Juan Guaidó y tampoco for di niun partido politico. Sino cu e consulta aki a nace for di e sociedad civil Venezolano cu a conta cu e sosten di diferente facultad universitario di derecho na Venezuela. E decanonan di e facultadnan aki a reuni cu specialista constitucionalista di Venezuela, y tambe experto huridico internacional, specialmente di Europa y Merca.

E intencion tras di esaki ta esun di busca un salida riba e situacion interno di Venezuela cu ta pas cu e aspecto legal y constitucional di Venezuela.

E ta haya cu e mesun comunidad internacional a propone pa Venezuela su pueblo por bini cu un solucion. Pero un solucion pacifico y no intervencionista. Pasobra e mesun constitucion aki traha durante e prome gobierno Chavista ta bisa cu e ‘soberano,’ kiermen e pueblo, ta esun cu ta ‘dicta y pone,’segun Zarraga.

Mirando cu e comunidad aki ta esun cu a bini cu e sugerencia pa soluciona e asunto di Venezuela teniendo cuenta cu aspecto legal, e sociedad civil a bin cu e consulta aki, pero awor e punto central lo ta: Kico nan lo haci awor?… Cual lo ta e recomendacion di e paisnan internacional?

“Nan lo bin cu mas sancion contra e dictadura?… Nan lo bin cu un horcamento politico y internacional contra e dictadura?… Of nan lo manda e helmnan blauw di Nacionnan Uni?” Zarraga a bisa cu cualkier lo bira e escenarionan den cuadro di organisacion mundial y legal, nan lo ta algo bon pa Venezuela.