Durante un conferencia di prensa ayera mainta, Banco Central di Aruba a anuncia nan actividad “Conoce bo Banco Central.” Cu e actividad aki, CBA lo ta habriendo su porta pa prome biaha pa henter comunidad di Aruba.
“Nos ta sumamente contento di por yama boso bon bini na Banco Central pa comparti cu comunidad un invitacion special. Pa prome biaha, Banco Central di Aruba lo habri su portanan pa comunidad,” Penelope Tromp-Gomez a indica.
El a splica cu den cuadro di e trayectoria di actualisa Banco Central di Aruba su identidad, nan ta reconoce e importancia pa nan ta mas cerca ainda di e comunidad y pa e motibo ey tambe nan kier reforsa e lasonan aki.
“Di e manera aki nos ta bay habri nos porta y den un ambiente familiar y interactivo nos ta desea pa tur hende, grandi y chikito, por bin conoce Banco Central di Aruba, con ta haci e trabao pa proteha e balor di e florin, mantene stabilidad financiero, supervisa institucionnan financiero y tambe zorg pa brinda e seguridad cu pagonan na Aruba ta sucede na un manera eficiente y tambe confiabel,” el a remarca.
E actividad ta bay tuma luga dia 22 di november.
Haydelyn Thijsen a splica cu relacion cu e trayectoria di rebrand y compromiso pa ta cerca di comunidad nan ta organisa e evento aki, cu lo bay ta un actividad familiar unda cu grandi y chikito por cera conoci cu e trabao cu Banco Central di Aruba ta eherce.
El a sigui splica cu durante e dia aki nan lo tin diferente seccion cu lo enfoca riba diferente aspecto di e trabao di Banco Central pa mantene stabilidad financiero, conscientisacion di seguridad cibernetico y tambe educacion financiero
“Publico lo por siña mas di Banco Central den su rol, e balor di nos florin, sigura stabilidad financiero y oportunidadnan pa cuminsa un carera aki na banco central,” Thijsen a agrega.
El a splica cu nan lo tin cuater seccion, cu lo tin hopi informacion y cu lo ta seccionnan interactivo y participativo tambe. E prome seccion ta titula ‘Banco Central di Aruba: antes awor y den futuro’. Di dos seccion lo ta titula ‘Tesoro: Aruba su florin’. Di tres seccion ta tocante operacionnan cibernetico y e ultimo seccion ta ‘finanzas den bo man’.
El a splica cu e prome seccion lo refleha Banco Central su tareanan principal, su historia, direccion strategico y tambe con pa traha na Banco Central.
Di dos seccion lo tin un exposicion caminda lo mustra placa di papel y monedanan di pasado y di awor.
E di tres ta bay enfoca riba operacionnan cibernetico y lo ta un actividad interactivo, unda lo conscientisa comunidad tocante seguridad cibernetico.
Y e ultimo lo tin tayernan financiero pa tanto hende grandi como mucha, tocante con pa maneha presupuesto, con pa spaar y tambe lo tin weganan di puzzel pa mucha.
Pa loke ta e logistica di e actividad, Banco Central lo percura pa tin amplio parkeo den bisindario y esaki lo ser coordina pa Banco Central hunto cu e autoridadnan concerni. Adicionalmente, pa e evento aki Banco Central lo colabora cu Kiwanis Club Palm Beach.
Thijsen a agrega cu durante e actividad lo tin presencia tambe di KPA cu nan unidad di cacho K-9, Brandweer y Ambulance, cu lo duna tur bishitante informacion pa conoce mas di nan trabao.
Den transcurso di simannan, Banco Central lo comparti mas informacion importante.
“Pa nos di Banco Central ta hopi importante pa nos yega aun mas cerca di comunidad y ta p’esey nos ta haci un invitacion cordial na comunidad completo pa bishita nos dia 22 di november,” el a remarca.
Tocante e aspecto di seguridad, a splica cu aunke Banco Central ta un instituto cu hopi seguridad, pa e dia aki ta bay usa otro reglanan. Ta bay habri henter e banco, tin exposicionnan paden di e banco tambe. Ta bay adapta e reglanan y tur hende por pasa drenta e banco. Naturalmente manera tur otro evento, nan ta check tas pa obhetonan cu por ta peligroso.
