Hulanda, hunto cu Aruba, Corsou, y Sint Maarten, ta intensificando e lucha contra criminalidad, fraude, y corupcion. Den un carta pa Tweede Kamer, Minister di Husticia y Seguridad, Foort van Oosten (VVD) y Secretario di Estado pa Interior y Relacionnan di Reino, Eddie van Marum (BBB) a anuncia cu lo tuma medidanan mas robusto den e proximo añanan pa fortifica e estado di derecho y bon gobernacion den e parti Caribense di Reino.
E carta ta sigui un compromiso haci pa Secretario di Estado Alexandra van Huffelen durante e debate di presupuesto di 23 di october 2024, y un mocion di parlamentario di fraccion VVD, De Vries, kende a defende un enfoke mas robusto pa cu fraude, corupcion y violacionnan di integridad. “Minamento ta forma un menasa pa e estado di derecho, tanto na Hulanda Europeo como den e paisnan Caribense. P’esey e cooperacion ta esencial,” e mandatarionan ta skirbi.
E parti Caribense di Reino pa hopi tempo ta confrontando retonan specifico. Debi na nan cercania na Latino America y rutanan comercial grandi pa Europa, e islanan ta vulnerabel pa contrabanda di droga, traficacion di hende y labamento di placa. E escala chikito di sociedad y e interconexion entre gobierno, negoshi y politica tambe ta aumenta e riesgonan di corupcion y abuso di poder.
Hulanda ta enfatisa cu e problema aki no ta solamente un tema local. Rednan criminal cu ta haya un pia a traves di Caribe tambe ta forma un menasa directo pa seguridad y integridad di sociedad na Hulanda Europeo. P’esey Den Haag ta sostene e paisnan cu experticio, capacidad adicional, y recursonan financiero.
E enfoke conhunto ta consisti di tres pilar: ley penal, administrativo, y e promocion di bon gobernacion y integridad.
Enfoke di derecho penal
Desde 2017, miyones di euro a ser inverti den fortificacion di e Team di Samenwerking di Investigacion Penal (RST), e Departamentonan di Ministerio Publico den e paisnan Caribense, y e Corte Comun di Husticia. E institutonan aki ta haci investigacion riba crimen financiero y economico, manera fraude di belasting, corupcion y labamento di placa. Individuo y politiconan di rango halto tambe a keda inclui.
Segun e ministerionan, esaki tin un efecto triple: e ta castiga comportamento criminal, ta expone vulnerabilidadnan den gobierno, y ta demostra na sociedad cu niun hende no ta riba ley. “Confiansa den e gobierno ta depende di integridad y transparencia. Cada conviccion di un figura publico ta enfatisa e principio aki,” e carta ta bisa.
Na 2021, e presupuesto a ser redobla pa €24 miyon pa aña. Esaki tambe structuralmente a envolve Aruba den e enfoke. Cinco ambicion a ser formula te cu 2028, incluyendo ampliacion di capacidad di investigacion, mehora cooperacion dentro y pafo di Reino, y confiscacion di activonan criminal di un manera mas efectivo.
Enfoke Administrativo
Banda di persecucion penal, medidanan administrativo ta ser implementa. Por ehempel, un protocol spesial a ser estableci na 2021 pa combati crimen organisa y subversivo administrativamente. Ministerio di Interior y Relacionnan den Reino ta aloca €1 miyon anualmente pa esaki.
Un ehempel clave ta e campaña “No riba Nos Isla” (Not on Our Island), cu ta coriendo den tur tres pais. Esaki mester conscientisa ciudadano, negoshi y funcionarionan publico tocante señalnan di minamento. Ademas, e paisnan ta trahando pa establece plataformanan similar na e Centronan di Informacion y Experticio Regional (RIECs) na Hulanda. Esakinan mester ta completamente operacional pa fin di 2026.
Enfoke Bon Gobernacion y Integridad
Un di tres pilar ta fortalece integridad y gobernacion. Sint Maarten tin un Camara di Integridad (Integriteitskamer) for di 2019, cu ta duna conseho y haci investigacion. Aruba a lanta Oficina di Integridad na 2021, y Corsou ta trahando riba plannan similar. Ademas, partidonan politico ta pasa den proceso di screening pa financiamento, y funcionarionan nobo di gobierno ta pasa door di control di integridad.
Funcionarionan publico tambe ta ricibi sesionnan di training y conscientisacion. Hulanda ta sostene e proceso aki, incluso pa medio di comparti conocemento y monitoreo. Hulanda ta colabora cu Transparency International pa sigui e tendencianan di corupcion y integridad mundialmente.
Minister van OOsten y Secretario di Estado van Marum ta subraya cu un iniciativa clave ta e Cumbre di Integridad di Caribe Hulandes, cu ta ser organisa anualmente for di 2023. Oficialnan di integridad di tur seis isla di Caribe Hulandes, y tambe representantenan di Wardacosta, Ministerio Publico, y Koninklijke Marechaussee di Hulanda, ta bini hunto pa comparti conocemento.
E conferencia lo tuma luga na Aruba na november 2025. Eynan, mas discusion lo tuma luga tambe riba un centro di conocemento Caribense pa promocion di integridad, plania pa finalisa na 2026. E centro aki lo ta e localidad principal pa investigacion, training, y intercambio di miho practicanan.
No obstante, den e carta e mandatarionan ta remarca cu Den Haag ta reconoce cu e enfoke no ta sin retonan. Scarsedad di personal na servicio local di investigacion ta haci paisnan altamente dependiente di specialistanan desplega temporalmente for di Hulanda. Facilidadnan di detencion tambe ta sufri di sobrepoblacion. Ademas, e legislacion necesario pa intercambio di informacion tin biaha ta falta.
P’esey, e enfoke ta riba training structural, intervencionnan alternativo, y mehoracion di compartimento di informacion entre paisnan. E contexto local semper ta hunga un rol den esaki. “Un enfoke sostenibel por tin exito solamente si tin un conscientisacion di e realidad Caribense y colaboracion cu partnernan local,” e e mandatarionan a declara.
E mocion di parlamentario di VVD De Vries y e compromiso di e ex-Secretario di Estado ta demostra cu tin boluntad politico pa tuma accion. Otro partidonan, manera e grupo parlamentario PvdA/GroenLinks cu un mocion riba traficacion di droga y hende, tambe a urgi un compromiso mas grandi.
E mandatarionan ta indica cu Gobiernonan di Aruba, Corsou, y Sint Maarten ta reconoce e necesidad. Scandal di corupcion den pasado y violacion di integridad a daña e confiansa di ciudadanonan den gobierno. Restaura e confiansa aki ta solamente posibel pa medio di transparencia, responsabilidad, y accion visibel contra di abusonan.
Den e carta minister Van Oosten y Secretario di Estado van Marum a remarca cu e proximo añanan lo enfoca riba profundisa y amplia e enfoke. Na januari 2026, e C Justitieel Vierpartijen Overleg lo sigui papia tocante e problema amplio di minamento. E resultadonan di e estudio exploratorio pa Centro di Conocementol Caribense pa Integridad tambe lo ser discuti e tempo ey. Hulanda ta enfatisa cu esaki no ta solamente un asunto financiero of huridico, pero tambe uno social. Ciudadano y negoshinan mester sinti cu gobierno ta actua confiabel y husto. Ta asina so e confiansa den e estado di derecho por ser reestableci y mantene.
E lucha contra criminalidad, corupcion, y violacionnan di integridad den e paisnan Caribense di Reino lo ser significativamente intensifica den e proximo añanan. Hulanda y e islanan ta uni forsa pa fortalece tanto e enfoke penal como administrativo.
Cu recursonan adicional, cooperacion internacional, y establecimento di un centro di conocemento Caribense, e enfoke ta riba un strategia duradero y efectivo. Pero exito no ta depende solamente di placa y ley: e contexto local, cooperacion y sosten publico tambe ta crucial.
Manera e mandatarionan ta enfatisa den nan carta: “Ciudadanonan den henter Reino mester por conta cu un estado di derecho solido, resiliente. Colaboracion ta e yabi pa logra esaki.”
