Diamars 8 di juli, a tuma luga e prome dia di un simposio importante cu ta trata e Protocol di Integridad, un tema crucial pa un gobernacion bon, responsable y transparente. Esaki ta un proyecto cu a tuma tempo pa prepara, pa asina Aruba, Corsou, Bonaire y Sint Maarten por start pareu y den un linea unifica riba nivel di integridad den funcionnan publico.
Minister di Husticia mr. drs. Arthur Dowers, a asisti na un simposio interesante relaciona cu integridad gubernamental. Sr. Jose Rosales, portefeuillehouder pa Integridad, cu ta traha hunto cu Sr. Oene Bouwman cu a traha e handleiding cu ta sirbi como base pa e protocol nobo, a dirigi e simposio.
E simposio a cuminsa diamars pa tur esnan den funcion di liderazgo den e organisacionnan gubernamental, pa duna direccion cla riba con integridad mester ta parti di tur decision y accion publico. Parti merdia tabata dedica pa Minister Publico, PG, y otro instancia clave.
Diahuebs y diabierna lo toca turno na demas miembronan di KPA (Korps Politie Aruba) y otro organisacion cu ta parti di e cadena hudicial, pa haya mes informacion y guia. E obhetivo ta pa tur funcionario, sin excepcion, sa kico ta spera di nan, kico mester tene na cuenta, y con pa preveni falta di integridad den futuro.
Segun un comunicado di gobierno, a traves di e simposio aki, ta enfatisa cu gobernacion integro no ta un opcion, pero ta fundeshi pa confiansa di pueblo y bon gobernacion.
