(Yahoo) – Bad Bunny a keda revela como e artista pa e half-time show di Super Bowl 2026 e siman aki, generando un mezcla di reaccion entre emocion y malcontento di diferente segmento di publico Rubiano.
Mientras hopi fanatico di e rapper Portoriqueño tabata emociona ora di haya sa cu e lo ta liderando e evento, cual ta tuma lugar na Levi’s Stadium dia 8 di februari na Santa Clara, California, otronan tabata critico di e escogencia di Liga di Futbol Nacional (NFL).
Reaccionnan negativo ta parce di considera dos factor clave: cu e ta canta principalmente den Spaño, y cu e ta boga pa migrante memey di e deportacionnan y accionnan di ICE (Agencia pa Aplicacion di Inmigracion y Aduana Mericano) na Merca.
Naci na Bayamon y lanta na Vega Baja, Bad Bunni tin orguyo Portoriqueño hancra den su arte y imagen publico. E artista, 31, ta un sensacion Latino, kende recientemente a conclui su residencia di 31 show na San Juan, y ta describi su album mas recien, Debi Tirar Mas Fotos di 2025, como un carta di amor pa Puerto Rico.
Su album di 2022, Un Verano Sin Ti a bira e prome album den Spaño pa keda nomina pa Album di Aña den premionan Grammy, y Bad Bunny a laga tur hende sa di su amor pa canta den Spaño. E ta credita pa pusha rap den Spaño den popularidad.
Pero e falta di hit na Ingles ta ser mira pa otronan como un problema.
Mientras cu e rapper a bisa cu e ta habri pa e idea di canta na Ingles, no ta algo cu e ta bay djis haci pa complace cierto demografico. “Ta djis cu mi ta sinti mas comodo den mi propio idioma… mi ta pensa den Spaño, sinti den Spaño, come den Spaño, canta den Spaño,” Bad Bunny a bisa Vanity Fair na 2023. Tocante si e ta bay canta na Ingles, el a bisa cu “mi nunca ta bay hacie djis pasobra un hende ta bisa mi mester hacie pa yega na cierto audiencia.”
Hipocresia
Otronan tambe a acusa Bad Bunny di hipocresia pa bay di acuerdo pa presenta den Super Bowl mientras a exclui Merca continental di su Tour Mundial proximo den respuesta na e operacionnan di inmigracion andando, conduci pa administracion di Trump.
“Tabatin hopi motibo pakico mi no a presenta na Merca, y niun di nan tabata odio – mi a presenta eynan hopi biaha. Tur e shownan tabata exitoso. Tur di nan tabata magnifico,” el a bisa i-D magazine na september. “Latino y Portoriqueño di Merca tambe por biaha aki [na Puerto Rico], of cualkier parti di mundo. Pero tabatin e problema di – manera, f**king ICE por ta pafo [di mi concierto]. Y esey ta algo tocante cual nos a papia y tabata hopi preocupa.”
Un usuario riba X a critica Bad Bunny di lidera e Super Bowl 2026 a pesar di scoge pa no inclui Merca den su tour, y a ricibi casi mey miyon reaccion. “E concepto di nenga di presenta na Merca pa protesta contra ICE y despues bay di acuerdo pa e Super Bowl lmfao,” e post a bisa.
Un rapport di Media Culture di 2025 a haya cu e audiencia na cas di e evento deportivo ta den su mayoria hende homber (57 porciento) y Blanco (68 porciento), cu GenX y Baby Boomer contanto pa 60 porciento. Un encuesta separa di Statista na 2023, cu a midi e importancia di e Super Bowl, a haya cu encuestado Blanco a reporta un porcentahe mas halto di rating “hopi importante” compara cu color scur, Latino of Asiatico. “E ta bay canta den Spaño na e evento mas Mericano den e clima politico actual,” otro usuario di X a bisa. “E ta claramente un mensahe intencional.”
